Iobu
32 Haawe, tha hnene hmaca kö la köni atre cili hna sa koi Iobu, ke xecie koi Iobu laka, ka meköti angeic.* 2 Ame hna elëhni hnei Elihu, nekö i Barakela atre Buza, qa ngöne la fami Ram. Angeic a elëhni koi Iobu, pine Iobu thele troa pi meköt hui Akötresie. 3 Nge angeice fe a elëhni kowe la köni sinee i Iobu, ke thatre kö angatre la nyine troa sa, nge hnei angatre fe hna upezö Akötresie. 4 Nge pine laka, qatre catre kö angatr, matre hnei angeic hna treqene troa sa koi Iobu. 5 Matre ame hë la Elihu a öhne laka, tha ithanata hë la köni trahmany, ame hnei angeic hna elëhni. 6 Nge hnei Elihu, nekö i Barakela atre Buza hna sa ka hape:
“Nyipici laka, eni petre hi a öhne la jö*
Nge itre qatr epun.
Celë hi matre, hnenge hna xomehnöthe la qëng ngöne la metrötr,
Nge tha qaja pi kö ni la hnenge hna atre.
7 Ame la mekunang ke, ‘troa nue la itre qatr* troa pane ewekë,
Me nue la itre ka nyimu macatre troa inine la inamacan.’
8 Ngo ame la ka hamë inamacane koi angatr,*
Ke ua i Akötresie ka eje thene la itre atr, lo hnamano ne la Ka Tru Trenge Men.
9 Tha hnene casi kö laka, iqia matre ka inamacan,
Nge tha itre qatre hmekuje kö la ka trotrohnine la meköt.
10 Celë hi matre öning: ‘Drei ni ju,
Nge tro pena ni a qaja la hnenge hna atre.’
11 Hnenge hna treqe epun troa ithanata;
Nge hnenge hna drenge hnyawane la mekuna i epun
Lo epuni a thele la nyine tro epuni a qaja.
12 Hnenge hna drei epuni hnyawa,
Ngo pëkö ca ka amaman laka, ka tria Iobu*
Nge ka atreine sa kowe la itre trengewekë i nyidrë.
13 Matre the qaja kö ka hape: ‘Öhne hë huni la inamacan;
Akötresieti la ka cile koi Iobu, ngo tha ketre atre kö.’
14 Nge pine laka, tha hnei Iobu kö hna ithanata koi ni,
Tha tro kö ni a sa koi nyidrë thenge la itre trengewekë i epun.
15 Ame la itre atre celë, angatre hi a lapa menu;
Ke pëhë nyine tro angatr a sa me qaja.
16 Hnenge hna treqen, ngo tha ewekë hmaca kö angatr;
Angatr a lapa e cili, nge pë hë nyine sa.
17 Haawe, tro pena ha ni a ithanata;
Me qaja la hnenge hna atre,
18 Ke tiqa ha ni hnei trengewekë;
Nge kola upi ni hnene la uati hmitrötr ka eje theng.
19 Nge ceitune hi la trenge xeleng me waina hna thing,
Tune la itre trengene waina ka hnyipixe ka troa kaqa.
20 Haawe, tro hë ni a ithanata matre uqa pi ni!
Nge tro ni a fe la ineqëng matre qaja la mekunang.
21 Tha tro kö ni a ië hna hnim;
Me atrune* la ketre atr,
22 Ke thatreine kö ni atrunyi ketre;
Wanga troa canga apatrenyi ni hnene la Atre Xupi ni.