Iobu
12 Ame hnei Iobu hna sa ka hape:
2 “Eje hi laka, epuni* la itre ka atre,
Nge tro la inamacan a ce meci me epun!
3 Ngo ka inamacane* fe ni.
Nge tha ka sisitria kö epun.
Drei la ka thatre la itre ewekë cili?
4 Kola hnyima sai ni hnene la itre sineeng,
Ke eni a tune la atr ka hë koi Akötresie matre kepe manathith.
Kola hnyima fë la atr ka meköt me mele nyipici.
5 Ame la atre ka mele tingeting, angeic a methinëne la akötr,
Ke ame koi angeic, ej a traqa hmekuje hi kowe la lue ca ka kötrekötr.*
6 Ka tingeting la itre itat ne la itre atrekënö,
Nge kola lapa xetietë* la itre ka icilekeu me Akötresie,
Ene lo itre ka xolouthe la itre haze ngöne la iwanakoime i angatr.
7 Ngo pane hnyingëne jë kowe la itre öni, nge tro itre ej a ini ö;
Me kowe la itre waco, nge tro nyudren a thuemacanyi ö.
8 Waipengöne* jë la ihnadro, nge tro ej a ini ö;
Nge tro la itre i e kuhu hnagejë a qejepengöne koi ö.
9 Ke drei la ka thatre e angatr laka
Ime i Iehova la ka kuca lai?
10 Eje ngöne la lue ime i nyidrë la nöjei ewekë ka mel
Memine la hnamano ne la nöjei atr.
11 Hapeu, tha hnangenyë kö la ka waipengöne la itre trengewekë
Tune la kola tupathe la xen hnene la thinem?
12 Nge hapeu, tha thene kö la itre qatr la inamacan,
Nge tha eje kö a mama thene la itre ka mel aqeany?
13 Thei nyidrëti la inamacan me men;
Nge hetrenyi nyidrëti la eamo me atrehmekun.
14 Thatreine kö së troa xupe hmaca la hnei nyidrëti hna thëtrij;
Nge pëkö ca atr ka atreine fe la hnei nyidrëti hna thing.
15 Nge ame la nyidrëti a cipane la itre tim, qaqacil asë hi;
Nge ame la nyidrëti a upe la itre tim, ke kola di la ihnadro.
16 Thei nyidrëti la catr me huliwa inamacan;
Nge ewekë i nyidrë la hna amenun memine la atr ka iamenu;
17 Nyidrëti a upe pë ibutr* la itre atresi,
Me ahmon la itretre amekötin.
18 Nge nyidëti a seng la itre otretr hna amë hnene la itre joxu,
Me hnöthe la beletr ngöne la itre gö i angatr.
19 Nyidrëti a upe pë ibutr la itre atre huuj,
Me ukapiëne la itre trene mus;
20 Nyidrëti a cipan la itre trengewekë ne la itre atresi hna mejiune kow
Me xome la wangatrehmekune qaathene la itre qatr;*
21 Nyidrëti a axulune la imethinë kowe la itre he ne nöj,
Me akucakucane* la itretre catr;
22 Nge nyidrëti a amamane la itre ewekë ka sihngödr qa ngöne la melöhlem,
Me xome la melöhlem kowe la lai;
23 Nge nyidrëti a acatrene la itre nöj matre apatren;
Me akökötrene la itre nöj matre xomi angatr kowe la nöje trenyiwa.
24 Nge nyidrëti a xometrije la atrehmekun* qaathene la itre tan ne la nöj
Me amenu angatr ngöne la hnapapa ka pë gojeny.
25 Matre angatr a ethenyi ngöne la melöhlem, ke pëkö lai;
Nge nyidrëti a amenu angatr tune la itre atr ka hmo hnei ka haitr.