Salamo
Thatraqane la atre jumi traem; Masekil* ne la itre nekö i Kora, nyine nyima thenge la nin, “Lili.” Nyima ne ihnim.
45 Kola manomano la wenethëhming pine la ewekë ka mingöming.
Öning: “Eni a nyimane* la ketre joxu.”
Haawe, epi tro la thinemeng a tune la peen* ne la atre cinyany* ka maca.
2 Mingöminge catre kö nyipë hune la itre nekö i atr.
Mingöminge me lolo la itre trengewekë ka tro qa ngöne la që i nyipë.
Celë hi matre, hnei Akötresie hna amanathithi nyipë epine palua.
3 Atre ka catre fe, othe ju la taua i nyipë ngöne la gö i nyipë,
Nge heetrë nyipëti jë hnene la lolo me mingöming.
4 Nge ngöne la emingömingö i nyipë, tro jë troa hun ngöne la isi;
Nyinyape jë troa isigöline la nyipici me ipië me meköt,
Nge tro la ime maca i nyipë a kuca* la itre huliwa nyine hain.
5 Ka idrei la itre ane pehna i nyipë, nge itre ej a akeine la itre nöj qëmekei nyipë;
Itre ej a thin axulune la hni ne la itre ithupëjia ne la joxu.
6 Akötresieti la therone i nyipë epin, epine palua;
Ame la sine tö ne la Baselaia i nyipë, ke sine tö ne la meköt.
7 Hnei nyipëti hna hnime la meköt me methinëne la iangazo.
Celë hi matre hnei Akötresie, lo Akötresi nyipë, hna ië nyipë memine la oel ne madrin, nge tru kö la madrine i nyipë hune la itre sinatronge i nyipë.
8 Ka pui muro,* me aloes, me kanel,* la itre iheetre i nyipë;
Qa ngöne la hnalapa i nyipë ka mingöming hna kuca hnei jian ne elefa, nyipëti a madrin kowe la itre nyine elo miuzik ka hetre filen.
9 Ame thene la itre föe hnei nyipëti hna wangatrun, ke hetrenyi fe la itre nekö i joxu.
Hnene la isola hna cil ngöne la götrane maca i nyipë, nge eahlo a heetrëne la gool ne Ofira.
10 Haawe nekö jajinyi fe, drenge hnyawa ju, nge hnangenyëne jë;
The mekune hmaca kö la nöje i ö, me hnalapa ne la keme i ö.
12 Tro la nekö jajiny ne Turo a traqa fë ahnahna;
Tro la itre atr ka trenamo catr a thele tro eö a kepe angatr.
13 Mingöminge catre la nekö i joxu jajiny ngöne la hnalapa i nyidrë;
Angeic a heetrëne la itre iheetr hna thaipin hnei gool.
14 Tro ha tro sai angeic kowe la joxu ngöne la itre iheetr hna sil amingömingön.*
Tro ha alöne koi nyidrë la itre jajiny ka xötrethenge angeic, ene lo itre sinatronge i angeic.
15 Tro ha tro sai angatr memine la madrin, me iqëmek ka madrin;
Tro hë angatr a lö kowe la hnalapa i joxu.
16 Tro hë la itre nekö i ö a nyihnane la itre xötrapane i ö.
Tro hë eö a acili angatr nyine joxu hune la fen asë.
17 Tro hë ni a inine la ëje i ö kowe la nöjei xötre atr elany.
Celë hi matre tro la itre nöj a atrunyi ö epin, epine palua.