Hnaaluene Tusi Itre Joxu

9 Ame hnei Elisaia hna qaja kowe la ketre nekö i perofeta, ka hape: “Sile jë la iheetre i ö hune la gö i ö. Nge xome jë la trengenë oel celë, nge canga tro jë e Ramothe-gileada. 2 Nge e traqa ha eö, tro eö a thele Iehu nekö i Iehosafata, nekö i Nimesi. Ce angeic me itre xa tane isi, nge tro eö a sipo angeic troa mejë, nge tro epon a ce tro kowe la hnahag e koië pune la uma. 3 E cili, tro hë eö a nenge la oel hune la he i angeic me hape, ‘Hane hi la hna qaja hnei Iehova, “Eni a ië eö troa joxu ne Isaraela.”’ Thupene lai, tro eö a fe la qëhnelö me canga kötr.”

4 Matre hnene la nekö i perofeta cili, hna tro e Ramothe-gileada. 5 Nge ame hë la angeic a traqa, öhne ju hi angeice la itre tane isi ka ilapany. Nge öni angeic: “Hetre macange koi nyipë tane isi.” Matre öni Iehu: “Drei thei eahun?” Nge sa jë hi lai atr ka hape: “Koi nyipë tane isi.” 6 Ame hnei Iehu hna mejë, me lö hnine la uma. Nge hnene lai atr hna nei oel hune la he i Iehu, me hape: “Hane hi la hna qaja hnei Iehova, Akötresi Isaraela, ‘Eni a ië eö troa joxu ne Isaraela, nöje i Iehova. 7 Qa i ö troa humuthe la fami Ahaba joxu i ö. Nge tro ni a të la madra ne la itre perofeta, itre hlueng, memine la madra ne la nöjei atre i Iehova hna humuth hnei Iezebela. 8 Tro la fami Ahaba a mec. Nge tro ni a apatrene la nöjei trahmanyi* ne la fami angeic, nge uti fe hë la ka co e Isaraela. 9 Tro ni a kuca kowe la fami Ahaba, la hnenge hna kuca kowe la fami Ieroboama nekö i Nebata, me kowe la fami Baasa nekö i Ahia. 10 Nge ame Iezebela, tro itre kuli a öni angeic, ngöne la hnepadro e Iezerela. Nge pëkö ka troa kelemi angeic.’” Thupene lai, hnene la atre tro fë maca hna fe la qëhnelö, me canga kötr.

11 Matre ame hë la Iehu a lö qa hnine la uma, hnene la itre xa tane isi ne la joxu hna hnying ka hape: “Matre tune kaa? Kola uë eö hnene lai hmo?” Sa jë hi Iehu ka hape: “Atre hi epun la pengöne la itre atre cili, me itre hnei angatr hna qaja.” 12 Ngo hnei angatre kö hna catre fë ka hape: “The thoi kö, pane qaja jë koi hun.” Matre Iehu a qaja jë la maca ne lai atr, me nyixane ka hape: ‘Hane hi la hna qaja hnei Iehova, “Eni a ië eö troa joxu ne Isaraela.”’” 13 Ame hnene la itre tan hna canga una la itre iheetre ka qea i angatr, me amë hune la ieskalie koi Iehu. Thupene lai, angatr a ufi trutru jë me sue ka hape: “Joxu hë Iehu!” 14 Ame hnei Iehu nekö i Iehosafata, nekö i Nimesi hna nyiqane thele troa humuthi Iorama.

Nge qa i Iorama memine la trongene isi Isaraela asë e Ramothe-gileada troa isigöli Isaraela, ke hnei Hazaela joxu ne Suria hna isi me angatr. 15 Ngo e thupen, hnei Iorama hna bëek a tro Iezerela troa nyinyine la eatre i nyidrë, ke hna eatrë nyidrë hnei angetre Suria, lo nyidrëti a isi me Hazaela joxu ne Suria.

Ame hnei Iehu hna qaja ka hape: “Maine aja i epun, tha tro kö sa nue la ketre atr troa tro qa ngöne la traon, me qaja trongën e Iezerela la ewekë ka traqa.” 16 Ame hnei Iehu hna të hune la ikatre i angeic me tro Iezerela, ke Iorama a meköle fë la eatre i nyidrëti e cili. Nge Ahazia joxu ne Iudra fe e cili, qa i nyidrë hna wai Iorama. 17 Matre ame hë la kola öhne la itre sooce i Iehu hnene la atre cil hune la ita ne thup e Iezerela, angeic a canga qaja ju ka hape: “Hana la la ketre trongene isi.” Matre öni Iorama jë hi: “Upe pi la ketre atre ti hos koi angatr, matre hnyingë angatre ka hape, ‘Ka tingetinge kö la tronge i epun?’” 18 Ame hnene la ketre atre ti hos hna tro koi angatr me hape: “Hane hi la hnyinge i joxu, ‘Ka tingetinge kö la tronge i epun?’” Ngo sa jë hi Iehu ka hape: “Eö a qeje tingetinge fë nemen? Tro jë hutröng, nge xötrethenge ni jë!” Matre önine la atre thup ka hape: “Ame lo ka tro fë maca, traqa ha angeic koi angatr, ngo tha bëeke kö angeic.” 19 Ame hna upe hmaca pi la ketre atre ti hos. Nge ame ju hi la angeic a ixelë me angatr, öni angeic: “Hane hi la hnyinge i joxu, ‘Ka tingetinge kö la tronge i epun?’” Ngo sa jë hi Iehu ka hape: “Eö a qeje tingetinge fë nemen? Tro jë hutröng, nge xötrethenge ni jë!”

20 Ame hnene la atre thup hna qaja ka hape: “Ame lo ka tro fë maca, traqa ha angeic koi angatr, ngo tha bëeke kö angeic. Nge ame la atre wejemeken, angeic a ti ikatr tui Iehu api* Nimesi, kösë aqane nyinyapene hmo.” 21 Nge öni Iorama jë hi ka hape: “Hnëkëne jë la ikatreng!” Ame hna hnëkëne la ikatre i nyidrë, nge hnei Iorama joxu ne Isaraela, me Ahazia joxu ne Iudra, hna isa tro hune la lue ikatre i nyidro, matre ixelë me Iehu. Nge hnei angatr hna ixelë me angeic ngöne la hnepadro i Nabotha qa Iezerela.

22 Nge ame hë la Iorama a öhnyi Iehu, öni nyidrë: “Iehu, ka tingetinge kö la tronge i eö?” Ngo sa jë hi Iehu ka hape: “Troa tingetinge tune kaa, e tro pala kö Iezebela thine i ö a nyi föe ne gojeny, me kuci iöni?” 23 Iorama a canga ujë jë memine la ikatre i nyidrë troa kötr, nge öni nyidrë koi Ahazia ka hape: “Ahazia, kola tra thethi së!” 24 Ame hnei Iehu hna xome la pehna i angeic, me pehna Iorama. Nge hnene la ane pehna hna lö nyipine la lue iape i nyidrë, nge ej a utra xulu pi qa ngöne la wenethëhmi, nge nyidrëti a kei ju hune la ikatr. 25 Matre öni Iehu koi Bidekara, lo tan ka xatua angeic ka hape: “Xomi angeice jë, nge triji angeice pi ngöne la hlapa i Nabotha qa Iezerela. Mekuna i ö lo nyiso a ti hos hutrö i Ahaba keme i angeic, lo Iehova a qaja koi nyidrë ka hape, 26 ‘Eni Iehova, öning, tune la aqane öhne ni la madra i Nabotha eidr, memine la madra ne la itre nekö i angeic, tro fe ni a të la ngazo i ö e celë, ngöne la hnepadro celë, celë hi trengewekë i Iehova.’ Haawe enehila, xomi angeice pi, nge triji angeice pi ngöne la hnepadro celë, thenge lo hna qaja hnei Iehova.”

27 Nge ame hë la Ahazia joxu ne Iudra a öhne lai, nyidrëti a canga kötre pi, me tro qa ngöne la uma ne eëny. (E thupen, hnei Iehu hna huzu nyidrë me hape: “Humuthi angeice pi fe!” Nge hnene la itre atr hna pehna nyidrë, nge nyidrëti hune la ikatre i nyidrë, ngöne la gojenyi ne tro Gura e Ibeleama. Ngo hnei Ahazia pala hi hna kötr me traqa e Megido, nge meci ju hi nyidrëti e cili. 28 Ame hnene la itre hlue i nyidrë, hna ati nyidrëti hune ikatr a tro Ierusalema. Nge angatr a ami nyidrëti jë hnine la hua, me kelemi nyidrë me itre qaaqaa i nyidrë ngöne la Traone i Dravita. 29 Hna acili joxu Ahazia troa joxu ne Iudra, hmekune lo kola 11 lao macatre ne mus i Iorama, nekö i Ahaba.)

30 Nge ame hë la Iehu a traqa e Iezerela, drenge hi Iezebela, matre hnei eahlo hna tha paudra ka wetrewetre kowe la luemeke i eahlo, me iseje hnyawa. Thupene lai, hnei eahlo hna tu qa ngöne la mamala troa goeën e kuhu. 31 Nge ame hë la Iehu a lö ngöne la qëhnelö ne la traon, öni eahlo koi angeic ka hape: “Tune kaa Zimeri lo atre humuthe la joxu i angeic?” 32 Matre Iehu a gala jë draië me sue ka hape: “Drei la sine xöleng? Drei?” Ame hnene la ala lu, maine ala kön ka huliwa koi joxu, hna tu troa goeë angeic. 33 Nge öni angeice jë hi: “Ukapië eahlo pi qa ngöne la mamala.” Ame hnei angatr hna ukapië eahlo, nge hna thuthu la madra i eahlo kowe la ngöne uma, me kowe la itre hos. Nge hnene la itre hos i Iehu hna waja ficanyi eahlo. 34 Thupene lai, angeic a lö jë troa xeni me ij, nge öni angeic kowe la itre trahmany: “Tro jë wange lo föe hna ejin, nge kelemi angeice jë, ke nekö i joxu lai.” 35 Ngo ame la angatr a tro troa kelemi eahlo, inenatre i eahlo pe hi, me waca, me wanakoime la ka lapa pe. 36 Nge ame hë la angatr a tro troa thuemacanyi Iehu, öni angeic: “Kolo hi lai a eatrën lo hna qaja hnei Iehova jëne Elia hlue i nyidrë qa Tisebi, lo öni nyidrë, ‘Tro itre kuli a öni Iezebela ngöne la hnepadro e Iezerela. 37 Tro la ngönetrei Iezebela a tune la agetri öni ngöne la itre hlapa ne la hnepadro e Iezerela. Qa ngöne lai, pëkö ka troa qaja ka hape, “Iezebela la.”’”