Isaia
13 Hane hi la iameköti hnei Isaia nekö i Amoza hna meköle goeën göi Babulona:
2 “Acile jë la ketre hatren hune la itre git ne la itre wetr.
Hë angatre jë, nge halea angatre jë,
Matre tro angatr a lö qa ngöne la itre qëhnelö ne la itre trene mus.
3 Ase hë ni ameköti huliwa kowe la itre atr hnenge hna iën.*
Ase hë ni hëne la itre soceng, matre amamane la elëhning,
Angatr a madrin me pi mama.
4 Drenge ju la itre atr ngöne la itre wetr;
Kösë ketre nöj ka ala nyim!
Drenge ju la mejene la itre baselaia,
La aqane enienij ne la itre nöj hna acasin!
Iehova joxu ne la itre trongene isi e hnengödrai a waipengöne la itre soc göne la isi.
5 Iehova me itre jia ne elëhni i nyidrë
A traqa qa ngöne la nöje gaa nany,
Qa ngöne la ketre cane la hnengödrai,
Matre lepe la ihnadro.
6 Sue jë, ke calemi hë la drai i Iehova!
Tro ej a traqa tune la ketre akötr hna axulun hnene la Ka Tru Trenge Men.
7 Celë hi matre troa geny la nöjei im asë,
Nge troa ae trootro la trengecatre* ne la itre trahmanyi asë.
8 Angatr a meci hnei xou.
Angatr a akötr me meci hnei akötr,
Tune la föe ka hnaho.
Angatr a igoeëtili me hmahma,
Nge kola mama la xou ngöne la luemeke i angatr.
9 Goeën! Cahmijë hë la drai i Iehova,
Memine la wesitr me elëhni, me trengehni,
Matre tro la itre atr a hain la ewekë ka traqa kowe la nöj,
Nge matre troa apatrene la itre atr ka kuca la ngazo.
10 Ke tha tro hmaca kö a melemel
La itre wëtresij me itre fini wëtresij;*
Tro ha miti la jö qaan e hmakany,
Nge tha tro hmaca kö a hudrume la treu.
11 Tro ni a ihnyingë kowe la ihnadro pine la itre thiina ka ngazo i angeic,
Me kowe la itre atr ka ngazo pine la itre tria i angatr.
Tro ni a thupatën la aqane pi tru ne la itre atr ka pi mama,
Nge tro ni a thaipiën la itre ka iaxösisi.
12 Tro ni a kuca matre xalaithe hi la itre atr hune la gool ka lolo,
Nge xalaithe hi la itre nekö i atr hune la gool ne Ofira.
13 Qa ngöne lai, tro ni a jumejume la hnengödrai,
Tro la ihnadro a hmengöhmengön, me enij qa ngöne la göhnen ej
Ngöne la drai ne elëhni atraqatre i Iehova joxu ne la itre trongene isi e hnengödrai.
14 Tune la drube föe hna weje huzun, memine la hnëng öni ka pë atre thupën,
Tro angatr a isa bëek kowe la nöje i angatr;
Tro angatr a isa kötr kowe la zi i angatr.
15 Ame la itre atr hna troa öhn, ke tro ha jaqa angatr,
Nge ame la itre atr hna troa ea, ke tro ha humuthi angatr hnei taua.
16 Qëmekei angatr, tro ha thupathupa la itre nekö i angatr,
Me atrekënö ngöne la itre uma i angatr,
Me angazone* la itre föi angatr.
17 Eni hë la upe koi angatr la angetre Madai,
Itre ka wangacone la sileva
Nge ka wangesixane la gool.
18 Tro la itre tane pehna i angatr a humuth la itre nekö trahmany;
Tha tro kö angatr a hnim
Me utipine la itre nekönatr.
19 Nge ame Babulona, lo baselaia ka sisitria,
Lo emingömingön ne la angetre Kaledaia, memine la hnei angatr hna pi mama fë,
Ke tro ej a tui Sodroma me Gomora ngöne lo Akötresie a thaipië angatr.
20 Tha tro hmaca kö a lapan ej,
Nge pëkö ca atr ngöne la itre xötr atr epin ka troa lapa e cili.
Pëkö ca Arab ka troa acile la itate i angeic e cili,
Nge tha tro kö la ketre atre thup a amekölene la itre öni i angeic e cili.
21 Ngo tro pena ej a nyi göhnen la itre öni wael ne la hnapapa;
Troa lapane la itre uma hnene la itre xa pengöne men.*
22 Tro la itre öni ka ho a ho ngöne la itre ita ne thup,
Nge tro la itre kuli wael a ho ngöne la itre uma i joxu.
Easenyi hë la hawa koi Babulona, nge tha tro kö a nyixane la itre drai i angeic.”