Hnaaluene Tus i Samuela
23 Hane hi la itre trengewekë tixenuë i Dravita:
“Trengewekë i Dravita nekö i Iese,
Trengewekë ne la atre hna atrun,
Lo hna iën hnene la Akötresi Iakobo,
Lo atr hne së hna pi dreng e nyimane* la itre nyima i Isaraela.
2 Hnene la ua i Iehova hna ithanata jëne ni;
Hna uti kowe la thinemeng la itre trengewekë celë.
3 Hnene la Akötresi Isaraela hna ithanata;
Hnene la Giti Isaraela hna qaja koi ni ka hape:
‘E tro la ka musi kowe la itre atr a meköt,
Me xoue Akötresie ngöne la mus i angeic,
4 Tro lai a tune la lai e hmakany la kola cicinyi la jö,
Ketre hmakany ka pë iaw.
Tro lai a tune la hao drai thupene mani,
Ka xatuane la feja troa cia qa ngöne la dro.’
5 Celë hi aqane waipengön Akötresie la faming.
Ke hnei nyidrëti hna kuca me eni la isisinyikeu ka pë pun,
Isisinyikeu hna eköthe hnyawa me anyipicin.
Isisinyikeu celë la ka amele ni me amadrinë ni,
Hapeu, tha kepine kö lai matre nyidrëti a akökötren ej?
6 Tro ha apatrene trije la itre ka pë hnënyöngön, tune la aqane apatrene trije la itre sinöe ka ithiny,
Lo itre hna thatreine ea hnei iwanakoim.
7 Ngo maine ketre a pi ketr,
Loi e troa hetre jia ne huliwa, ketre jia ne huliwa fao, me ialetr.
Tro ha dreuthe triji angatr e cili.”
8 Hane hi la ëjene la köni soc ka catr i Dravita: Iasobeam atre Takemoni la hnapan, nge angeic la tan ne la ala kön. Ngöne la ketre drai, hnei angeic hna humuth la ala 800 hnene la jo i angeic. 9 Thupei angeic, Eleazara nekö i Dodo, nekö i Aohi. Angeice fe la ketre ne la köni soc ka catr i Dravita. Hnei angeice lo me Dravita hna thele isi me angetre Filisiti, lo angatr a cile koi Isaraela. Nge ngöne la drai cili, hnei itre soc i Isaraela hna kötre bëek. 10 Ngo hnei Eleazara hna cile catr, nge angeic a humuthi angetre Filisiti jë, uti hë la kola geny me hace la ime i angeic hna cile fë taua. Hane hi la aqane hune* i Iehova. Nge thupene lai, itre soc a xötrethenge Eleazara jë, troa thapa la itre mo ne la angetre Filisiti ka mec.
11 Nge Sama nekö i Age atre Harari la hnaakönin. Hnei angetre Filisiti hna ce ut e Lehi, ngöne la ketre hlapa gaa tru hnei laati. Nge hnene la itre soc hna kötrene la angetre Filisiti. 12 Ngo hnei angeice pe hna cil nyipine la hlapa, me sewe angatr troa thapa. Angeic a isi jë me angetre Filisiti, nge ala nyimu la hnei angeic hna humuth. Hane hi la aqane hune* i Iehova.
13 Ngöne la ijine menu, hnene la ala kön qa ngöne lo 30 lao tane soc hna traqa koi Dravita, ngöne la ngönemenyi e Adulama. Ngöne la ijine cili, hna acile la hna lapa* ne la itre soce i angetre Filisiti, ngöne la Hnathup* e Refai. 14 Ngo Dravita ngöne la hnë zae i nyidrë, nge hetre xötre soce i angetre Filisiti e Bethelema. 15 Ngöne la ketre drai, öni Dravita ka hape: “Ekölö, eni a pi ije la tim hna jöe ngöne la sima ezine la qëhnelö ne Bethelema!” 16 Ame hnene la köni soc ka catr i Dravita, hna catre lö hnine la lapa i angetre Filisiti, me jöe tim ngöne la sima ezine la qëhnelö ne Bethelema. Nge angatr a tro ju troa hamë Dravita, ngo xele ju hi Dravita ma ij, nge nyidrëti a nenge pi e kuhu hnadro qëmeke i Iehova. 17 Öni nyidrë: “Iehova fe! Thatreine kö ni mekune troa iji la timi celë, ke kösë eni a iji la madra ne la itre ka nue mel troa traqa fë timi koi ni!” Haawe, tha iji ju kö Dravita. Hane hi la hna kuca hnene la köni soc ka catre i Dravita.
18 Abisai trejin me Ioaba, nge nekö i Zeruia, la ketre tan ne la köni xa soc. Ngöne la ketre ijin, hnei angeic hna humuthe la ala 300 hnene la jo i angeic. Hlemu catr angeic tune lo köni soc ka catr i Dravita. 19 Ngacama ka hlemu ju hë angeic thene la ala kön, nge tane i angatr, ngo tha hna ce e angeice kö memine la köni soc ka catre i Dravita.
20 Benaia nekö i Iehoiada, la ketre atre ka catr.* Nyimu huliwa ka tru hnei angeic hna kuca e Kabezeela. Angeice hi lo ka humuthe la lue nekö i Ariel, atre Moaba. Nge angeice fe la ka uti ngöne la hnë tha tim, troa humuthe la liona ngöne la ijine mala la kiona.* 21 Hnei angeice fe hna humuthe la ketre atre Aigupito ka qeadridri catr. Hnei Benaia hna isi me hnepe sinöe, ngo kola cile fë jo hnene lai atre Aigupito. Matre Benaia a thapa pi la jo, me humuthe la atre Aigupito. 22 Hane hi la hna kuca hnei Benaia nekö i Iehoiada. Nge ceitu hi la aqane hlemu i angeic memine la köni soc ka catr i Dravita. 23 Ngacama ka hlemu ju hë angeic hune la ala 30, ngo tha hna ce e angeice kö memine la köni soc ka catr i Dravita. Ngo hnei Dravita hna acili angeic troa tan ne la itre ka thupë joxu.
24 Asael, trejin me Ioaba fe la ketre ne lo ala 30. Hane hi la ëje ne la itre soc cili: Eleanana nekö i Dodo qa Bethelema, 25 me Sama qa Harari, me Elika qa Harod, 26 me Helez qa Paleti, me Ira nekö i Ikes qa Tekoa, 27 me Abiezera qa Anathoth, me Mebunai qa Huza, 28 me Zalemon qa Aohi, me Maharai qa Netofa, 29 me Heleb nekö i Baana qa Netofa, me Itai nekö i Ribai qa Gibea e Beniamina, 30 me Benaia qa Pirathon, me Hidai qa ngöne la itre hneopegejë e Gasa, 31 me Abialebon qa Araba, me Azemaveth qa Bahurim, 32 me Eliaba qa Salabin, me itre nekö i Iasen, me Ionathana, 33 me Sama qa Harari, me Ahiam nekö i Sarari qa Harari, 34 me Elifelet nekö i Asebai, nekö ne la atre Maaka, me Eliama nekö i Ahithofela qa Gilo, 35 me Hezerai qa Karemela, me Paarai qa Araba, 36 me Igala nekö i Nathana qa Zoba, me Bani qa Gada, 37 me Zelek qa Amona, me Nahari qa Berotha, lo ka ajö jia ne isi i Ioaba nekö i Zeruia, 38 me Ira qa Iethero, me Gareb qa Iethero, 39 me Uria qa Heth. Matre ala 37 angatr.