Angetre Amekötin

6 Ngo hnene hmaca kö la angetre Isaraela hna kuca la ngazo qëmekei Iehova. Matre hnei Iehova hna nue angatr kowe la ime ne la angetre Midiana koi 7 lao macatre. 2 Nge pine laka, angetre Midiana a musinë Isaraela, hnene la angetre Isaraela hna kuca la itre hnë zae* ngöne la itre wetr, me ngöne la itre ngönemenyi, me ngöne la itre götran ka jol troa tro kow. 3 Ame lo kola jumi feja hnene la angetre Isaraela, kola traqa hnene la angetre Midiana, me Amaleka, me angetre Koië troa lepi angatr. 4 Hnene la itre atre cili hna acil la itre itate i angatr thene la angetre Isaraela, matre apatrene la itre hna menuën uti hë e Gaza. Pëkö ca xen hnei angatr hna amë pe kowe la angetre Isaraela, goi pë fe ca mamoe, me kau, me boliko. 5 Ke hnei angatr hna traqa fë la itre öni me itre itate i angatr ka nyimutre, tune la itre sipa; thatreine kö troa e la etru i angatr, me itre kamela i angatr. Nge angatr a traqa ngöne la nöj matre troa angazon. 6 Celë hi matre pë hë ca ewekë ne la angetre Isaraela hnene la angetre Midiana. Ame hnene la angetre Isaraela hna treije koi Iehova.

7 Ame hë la angetre Isaraela a sipo ixatua koi Iehova, pine la angetre Midiana, 8 hnei Iehova hna iupi fë maca jëne la ketre perofeta me hape: “Hane hi la hna qaja hnei Iehova Akötresi Isaraela: ‘Hnenge lo hna thepe epun qa Aigupito, lo nöj ka thahluë* epun. 9 matre hneng e cili, hna amele epun qa ngöne la ime i Aigupito, me qa ngöne la ime ne la itre ka folosa epun. Nge hnenge fe hna helën la itre ithupëjia qa ngöne la nöje i angatr, matre troa hamë epun. 10 Nge öninge lo: “The tro kö epuni a xouen la itre haze ne Amora, lo nöj hnei epun hna lapan, ke Iehova ni Akötresi epun.” Ngazo pe, tha hnei epun kö hna drei ni.’”

11 Thupene lai, hnene la angela i Iehova hna traqa e Ofera, me lapa fene la sinöe ka tru i Oasa atre Abiezera. Nge ame Gideona nekö i Ioasa, angeic a lepelepe qitr ngöne la hna weje wene vin, matre tha tro kö a öhnyi angeic hnene la angetre Midiana. 12 Ame hna mama pi koi angeic la angela i Iehova, me hape: “Ce Iehova me eö, atr ka catr.” 13 Ngo sa jë hi Gideona ka hape: “Menu hë ni joxu, ngo maine ce Iehova ju me eahun, nga hnauëne kö hö la kola traqa la nöjei ewekë celë? Ekaa ha la itre iamamanyikeu hna qaja hnene la itre keme hun, lo öni angatr ka hape: ‘Iehova la ka thepe hun qa Aigupito?’ Enehila, ase hë Iehova nuetriji hun kowe la ime ne la angetre Midiana.” 14 Ame hnei Iehova hna cile qëmekei angeic me hape: “Tro jë memine la trengecatre i ö, nge tro eö a amelene la angetre Isaraela qa ngöne la ime ne la angetre Midiana. Ke eje hi, eni la ka upi ö!” 15 Matre sa jë hi Gideona ka hape: “Menu hë ni Iehova. Ngo tro ni a amele Isaraela tune kaa? Goeën! Tha ka tru kö la faming* ngöne la tribu i Manase, nge ka coco catre ni ngöne la hnalapa i kaka.” 16 Ngo öni Iehova jë hi: “Tro kö ni a ce me eö. Eje hi, tro hë eö a ngaan la angetre Midiana, kösë ala casi hi angatr.”

17 Thupene lai, öni Gideona jë hi: “Maine nyipici laka, nyipëti a kepe ni, nga amamai ni pi la ketre hatren laka, nyipëti hi la ka ithanata me eni. 18 Eni a sipo nyipë, pane lapa ju e ce, uti hë la tro ni a bëek fë ahnahna koi nyipë.” Nge öni nyidrëti jë hi: “Tro ni a lapa e ce, uti hë la eö bëeke hmaca.” 19 Thupene lai, hnei Gideona hna lö kowe la hnalapa i angeic matre hnëkën la neköi nani, me ca efa* ne farin nyine sa falawa ka pë levenen. Ame hnei angeic hna elë la mitr kowe la ketre trengen, me nenge la zan ngöne la öl, me tro fë koi nyidrë fene la sinöe ka tru.

20 Nge önine jë hi la angela ne la nyipi Akötresie: “Atë jë la mitr memine la falawa hna tha levenën hune la etë atraqatr celë, nge fiie pi hnei zan.” Nge celë hi hna kuca hnei Gideona. 21 Matre hnene la angela i Iehova hna line la sine tö ngöne la ime i nyidrë, me ketr la mitr, memine la falawa hna tha levenën. Ame hna xulu pi la eë qa ngöne la etë, me dreuth la mitr, memine la falawa hna tha levenën. Thupene lai, patre pi hi la angela i Iehova qaathei Gideona. 22 E cili, trotrohnine ju hi Gideona laka, angela i Iehova hi lai.

Matre canga öni angeice ju hi: “Iehova fe Joxu Ka Sisitria, ekölöhini pë ni, ke hnenge hna iqëmekekeu memine la angela i Iehova!” 23 Ngo öni Iehova jë hi: “Lapa tingetinge ju. The xou kö, ke tha tro kö eö a mec.” 24 Ame hnei Gideona hna xup e cili, la ketre ita ne huuj koi Iehova, nge hna hëne pala hi enehila ka hape, Iehova-Salom.* Eje pala hi e Ofera thene la angetre Abiezera.

25 Ngöne la jidri cili, öni Iehova jë hi koi Gideona: “Xome jë la neköi kau ne la keme i ö, lo hnaaluene neköi kau ka 7 lao macatre. Thupene lai, thëtrije pi lo ita ne huuje i Baala hna kuca hnei keme i ö, memine la ipoto ka hmitrötr ka cil ezin. 26 Amë wengëne jë la itre etë, nge xupe jë la ita ne huuj koi Iehova Akötresi ö hune la gaa draië celë. Thupene lai, xome jë la hnaaluene neköi kau, nge huujëne jë nyine huuje ne dreuth asë hune la ipoto ka hmitrötr hnei ö hna sa.” 27 Ame hnei Gideona hna ce tro memine la 10 lao hlue i angeic, matre kuca la hnei Iehova hna upi angeic. Ngo pine laka, angeic a xouen la fami ne la keme i angeic memine la itre trahmany ne la traon, matre tha hnei angeice kö hna kuca e lai, ngo e jidri pe.

28 Ame la kola ilë la itre trahmanyi ne la traon, hnei angatr hna öhn laka, ase hë thëtrij la ita ne huuje i Baala, memine la ipoto ka hmitrötr, nge ase fe hë huujën la hnaaluene kau hune la ita ne huuj hna hnyipi xup. 29 Matre angatr a ihnyingënekeun ka hape: “Drei jë la ka kuca la?” Nge thupene la hnei angatr hna pane ithel, öni angatr jë hi: “Gideona nekö i Ioasa la atrekë huliwan.” 30 Matre hnene la itre trahmanyi ne la traon hna qaja koi Ioasa ka hape: “Awe jë la nekö i ö matre tro huni a humuth, ke hnei angeic hna thëtrij la ita ne huuje i Baala, memine la ipoto ka hmitrötr ka cil ezin.” 31 Matre sa jë hi Ioasa kowe la itre ka thele iwesitrë me nyidrë: “Hnëqa i epuni kö troa isigöli Baala? Epuni kö la ka troa amele angeic? Loi e troa humuth la hmakanyi celë la atr ka isigöli Baala. Ke maine nyipici laka, Baala la ketre haze, nge hna thëtrije la ita ne huuj i angeic, nga nue angeice pi kö troa ketre isigöli angeic!” 32 Matre ngöne la drai cili, hnei Ioasa hna ati ëjen la nekö i nyidrë, Ierubaala,* ke öni nyidrë: “Pine laka, hna thëtrije la ita ne huuje i Baala, nga nue angeice pi kö troa ketre isigöli angeic.”

33 Ame hna ce cas hnene la angetre Midiana, me Amaleka, me angetre Koië. Hnei angatr hna thupa la hneopegejë, me acil la itre itate i angatr ngöne la hnathup e Iezerela. 34 Matre hnene la ua i Iehova hna huliwa thei Gideona, nge hnei Gideona hna ufi trutru. Ame hna traqa la angetre Abiezera troa xatua angeic. 35 Thupene lai, hnei angeic hna iupi fë maca kowe la nöje Manase asë, matre hnene la itre atrene la tribu cili hna traqa troa xatua angeic. Nge hnei angeice mina fe hna iupi fë maca kowe la nöje Asera, me Zebulona, me Nafatali, matre hnei angatr hna traqa troa ixelë me angeic.

36 Nge öni Gideona jë hi kowe la nyipi Akötresie: “Maine aja i nyipëti hi troa amele Isaraela jëne ni, tune lo hnei nyipëti hna qaja, 37 nga eni hë la a amë la ipene mamoe ngöne la hna lepe qitr: maine tro hi a uti la xaxapo hune la ipene mamoe, nge ka weliwel pe kö la ihnadro, tro hë ni a atre laka, tro nyipëti a amele Isaraela jëne ni, tune lo hnei nyipëti hna qaja.” 38 Nge celë hi ka traqa. Ke ame la angeic a ilë e hmakany, me öje la pene mamoe, kola tiqa gala la kap ka tru hnei tim. 39 Ngo ame pe, öni Gideona hmaca jë hi kowe la nyipi Akötresie ka hape: “Epi tha tro kö nyipëti a elëhni, ngo hetre hnenge hmaca hna pi sipo nyipë. Eni hmaca a pi kuca la ketre ewekë memine la pene mamoe. Pane kuca jë matre tro pena a weliwel la ipene mamoe, nge troa uti la xaxapo hune la ihnadro.” 40 Celë hi la hnei Akötresieti hna kuca ngöne la jidri cili: hmuhmu asë hi la ihnadro, ngo weliwel pe kö la ipene mamoe.