Salamo

65 Akötresieti fe, tro ha atrunyi nyipë hune la wetre Ziona;

Tro huni a eatrëne la itre hne huni hna sisinyi koi nyipë.

 3 Kucakuca ha ni hnene la itre ngazong,

Ngo nyipëti pe a thëthëhmin* la itre hnenge hna sasaith.

 4 Madrine la atre hnei nyipëti hna iën me hën

Matre troa mele ngöne la itre ikur ne la uma i nyipë.

Tro huni a mej hnene la itre lolo* ne la uma i nyipë,

Ene la uma ne hmi i nyipë.

 5 Akötresieti fe, atre amele hun, tro nyipëti a sa koi hun,

Jëne la itre huliwa nyine hain ka meköt;

Nyipëti la Mejiunene la itre cane la fene hnengödrai

Memine la itre atr ka lapa gaa nany, ngöne la ketre pala ne la hnagejë.

 6 Hnei nyipëti* hna acile hutine la itre wetr hnene la mene i nyipë;

Hnei nyipëti* hna heetrëne la men.

 7 Hnei nyipëti* hna aupune la itre gejë atraqatr,

Me itre mejene la itre hoke ne gejë, me uliline la itre nöj.

 8 Tro la itre ka lapane la itre götrane gaa nany a sesëkötr pine la itre hatrene i nyipë;

Tro nyipëti a kuca matre sue madrine jë la itre nöj, qa ngöne la itre götrane hna fetra hnei jö uti hë la hna lö hnei jö.

 9 Nyipëti a nyidrawane la ihnadro me kuca matre tro ej a ham me lolo,

Hnei Akötresieti hna amanathithine* la ihnadro.

Hnei nyipëti hna nyialiene la itre hneopegejë hnei tim;

Nyipëti a hamëne la itre itine feja thatraqane la itre atr,

Ke celë hi aqane hnëkëne nyipëti la ihnadro.

10 Nyipëti a fii la dro hna tha, me amekötin* ej;

Nyipëti a amenyiken hnene la mani, me amanathithine la itre feja ka cia.

11 Hnei nyipëti hna nyixane la itre manathith ne la macatre celë, kösë hnei nyipëti hna ati korona hun ej;

Tiqa ha hnei lolo* ngöne la itre gojenyi hnei nyipëti hna trongën.

12 Ame ngöne la itre hlapa ka hnitr ne la hnapapa,* kola cia hlöeë la itre haö,

Nge kola heetrëne la itre sasala hnene la madrin.

13 Kola haöthe la itre hlapa hnene la hnënge mamoe,

Nge itre qitr a lapane la itre hnathup.