Salamo
א [Aleph]
119 Madrine la itre ka mele nyipici,
Me trongëne la wathebo i Iehova.
2 Madrine la itre ka trongëne la itre hna amexej hnei nyidrë,
Lo itre ka thele nyidrë hnene la hni ka pexej.
3 Tha angatre kö a trongëne la ewekë ka tha meköti kö;
Angatre pe a trongëne la itre jë i nyidrë.
4 Hnei nyipëti hna iup
Troa trongëne hnyawa la itre hna amekötin hnei nyipë.
5 Ekölöhini maine atreine ju ni cile catr*
Troa trongëne la itre hna amekötin hnei nyipë!
6 Tha tro hë ni a hmahma
Troa inine la itre wathebo i nyipë.
7 Tro hë ni a nyihlue i nyipë hnene la hni ka meköt
Ngöne la eni a inine la itre jë i nyipë ka meköt.
8 Tro hë ni a trongëne la itre hnei nyipëti hna ahnith.
Matre the nuetriji ni kö.
ב [Beth]
9 Tune kaa la aqane tro la thupëtresij a awiën la itre jë i angeic?
Ene la troa hmek thenge la trengewekë i nyipë.
10 Hnene la hning ka pexej hna thele nyipë.
Matre the nue ni kö troa jea qa ngöne la itre wathebo i nyipë.
11 Eni a thupën e kuhu hning la trengewekë i nyipë
Matre tha tro kö ni a ngazo koi nyipë.
12 Iehova fe, epi troa atrunyi nyipë;
Ini ni jë la itre wathebo i nyipë.
13 Hnene la ukeineqëng
Tro ni a qaja trongëne la itre hna amekötin hnei nyipë.
14 Madrine catre ni la itre hnei nyipëti hna amexej
Hune la itre xaa ewekë ka sisitria.
15 Eni a ajan troa lapa mekune* la itre wathebo i nyipë
Me goeëne hutin la itre jë i nyipë.
16 Ka tru koi ni la itre hnei nyipëti hna ahnith.
Tha tro kö ni a thëthëhmine la trengewekë i nyipë.
ג [Gimel]
17 Kuca jë la loi kowe la hlue i nyipë,
Matre tro ni a mel me trongëne la trengewekë i nyipë.
18 Fe pi la luemekeng matre öhne hnyawa jë ni
La itre ewekë ka lolo ne la wathebo i nyipë.
19 Trenyiwa ni ngöne la nöj.
The juetrëne kö koi ni la itre wathebo i nyipë.
20 Tru catre la ajang
Kowe la itre hnei nyipëti hna amekötin.
21 Nyipëti a hajine la itre ka pi tru,
Lo itre hna ahnëjinën ka jea qa ngöne la itre wathebo i nyipë.
22 Ananyine* pi qaatheng la ihnyimasai me ixele ma iwai,
Ke eni a trongëne la itre hnei nyipëti hna amexej.
23 Maine tro ju hë a casi la itre nekö i joxu troa qeje ni,
Ngo tro kö la hlue i nyipëti a lapa mekune* la itre hnei nyipë hna cinyanyin.
24 Ka tru koi ni la itre hna amexej hnei nyipë;
Itre eje lai a eamo ni.
ד [Daleth]
25 Eni a meköl ngöne la xaxau.
Thupëne ju la meleng thenge la hnei nyipëti hna qaja.
26 Hnenge hna qejepengöne la itre huliwang, nge hnei nyipëti hna sa;
Ini ni jë la itre hnei nyipëti hna amekötin.
27 Xatua ni jë troa trotrohnine* la itre wathebo i nyipë,
Matre tro ni a lapa mekune* la itre huliwa nyine haine i nyipë.
28 Thatreine hë ni meköl hnei hleuhleu.
Aegöcatrenyi ni jë thenge la hnei nyipëti hna qaja.
29 Ananyine pi qaatheng la gojenyi ne la thoi,
Nyipi ni jë ngöne la nyipëti a hamë ni la wathebo i nyipë.
30 Ase hë ni iëne la gojenyi ne la nyipici.
Öhne hi ni laka, meköti la itre hna amekötin hnei nyipë.
31 Ka tru koi ni la itre hna amexej hnei nyipë.
Iehova fe, the nue ni kö troa hmahma.
32 Tro ni a nyinyape thele la gojenyi ne la itre hna amekötin hnei nyipë
Ke nyipëti a nyi göhnen ej ngöne la hning.*
ה [He]
33 Iehova fe, ini ni jë la gojenyi ne la itre hnei nyipëti hna cinyanyin,
Matre tro pala hi ni a trongën uti hë la pun.
34 Hamë ni pi la inamacan,
Matre tro ni a metrötrëne la wathebo i nyipë
Me trongëne hnene la hning ka pexej.
35 Eatrongë ni jë ngöne la gojenyi ne la itre wathebo i nyipë,
Ke itre ej a amadrinë ni.
36 Ahmalane jë la hning kowe la itre hnei nyipëti hna amexej,
Ngo tha göi thupene kö.
37 Ajeane pi la luemekeng qa ngöne la ewekë ka pë alien;
Thupëne ju la meleng ngöne la jë i nyipë.
39 Ananyine pi qaatheng la hmahma, lo hnenge hna xouen,
Ke ka lolo la itre iameköti nyipë.
40 Goeëne la treng ajang kowe la itre wathebo i nyipë.
Thupëne ju la meleng ngöne la meköt i nyipë.
ו [Waw]
41 Iehova fe, epi tro ni a melëne la ihnimi nyipici i nyipë,
Memine la iamele* i nyipë thenge la hnei nyipëti hna thingehnaean;*
42 Tro hë ni a sa kowe la ka qaqa ni,
Ke eni a mejiun kowe la hnei nyipëti hna qaja.
43 The xome kö qa ngöne la qëng la trenge nyipici,
Ke eni a mejiun* kowe la iameköti i nyipë.
44 Eni pala hi a ajan troa drengethenge la wathebo i nyipë,
Uti hë epin, epine palua.
45 Tro ni a tro ngöne la götrane gaa lolo,*
Ke eni a thele la itre wathebo i nyipë.
46 Tro ni a qaja la itre hnei nyipëti hna amexej qëmekene la itre joxu,
Nge tha tro kö ni a hmahma.
47 Ka tru koi ni la itre hnei nyipëti hna amekötin,
Eje hi, eni a hnimi itre ej.
48 Tro ni a xejë la lue imeng kowe la itre wathebo i nyipë hnenge hna hnim,
Nge tro ni a lapa mekune* la itre hnei nyipëti hna cinyanyin.
ז [Zayin]
50 Celë hi ka aupunyi ni ngöne la eni a akötr,
Ke trengewekë i nyipëti a thupëne la meleng.
51 Kola hnyimasai ni hnene la itre ka pi tru,
Ngo tha eni kö a jea qa ngöne la wathebo i nyipë.
52 Iehova fe, eni a mekune lo itre iameköti i nyipëti ekö,
Nge celë hi ka aegöcatrenyi ni.
53 Hna traqa koi ni la elëhni atraqatr pine la itre atr ka ngazo,
Lo itre ka nuetrije la wathebo i nyipë.
54 Ame la itre hnei nyipëti hna cinyanyin, ke kösë itre nyima koi ni
Ngöne la nöjei götran hnenge hna lapa ngön.*
55 Iehova fe, eni a mekune la ëje i nyipëti e jidr,
Matre tro ni a drengethenge la wathebo i nyipë.
56 Celë hi hnenge hna majemin
Pine laka eni a drengethenge la itre wathebo i nyipë.
ח [Heth]
57 Iehova la edröng;
Ase hë ni sisiny troa trongëne la itre hnei nyipëti hna qaja.
58 Eni a xëwe* koi nyipë hnene la hning ka pexej;
Kepe ni ju hnei nyipë thenge la hnei nyipëti hna thingehnaean.*
59 Hnenge hna waipengöne la aqane ujëng,
Matre abëekëne la lue cang kowe la itre hnei nyipëti hna amexej.
60 Eni a nyimenyim nge tha hmitre kö ni
Troa drengethenge la itre wathebo i nyipë.
61 Kola kanothi ni hnene la itre eno ne la itre atr ka ngazo,
Ngo tha thëthëhmine kö ni la wathebo i nyipë.
62 E hnenyipajidr, eni a mejë troa olene
La itre iameköti i nyipë ka meköt.
63 Eni la sinee ne la itre ka xoue nyipë
Me itre ka trongëne la itre wathebo i nyipë.
64 Iehova fe, tiqa ha la ihnadro hnene la ihnimi nyipici i nyipë;
Ini ni jë la itre hnei nyipëti hna cinyanyin.
ט [Teth]
65 Iehova fe, hnei nyipëti hna kuca la loi kowe la hlue i nyipë,
Thenge la hnei nyipëti hna thingehnaean.*
66 Ini ni jë la aqane troa waiewekë me inamacan,
Ke eni a mejiun kowe la itre wathebo i nyipë.
67 Qëmekene troa akötrë ni, hnenge hna tro menu,*
Ngo enehila, eni a drengethenge la trengewekë i nyipë.
68 Akötresieti ka lolo nyipë, nge tune fe la itre huliwa i nyipë.
Ini ni jë la itre hnei nyipëti hna cinyanyin.
69 Itre ka pi tru a silitrengathoi ni,
Ngo eni a xötrethenge la itre wathebo i nyipë cememine la hni ka pexej.
70 Ka xeti* la hni i angatr,
Ngo ame koi ni, ka tru la wathebo i nyipë.
71 Hetre eloine koi ni la hna akötrë ni,
Matre atre hë ni la itre hnei nyipëti hna cinyanyin.
72 Ame la wathebo hnei nyipëti hna qaja, ke nyine loi koi ni,
Nge sisitria kö hune la itre milio lao pies gool me sileva.
י [Yod]
73 Hna xupi ni me hnëkë ni hnene la lue ime i nyipë.
Hamë ni jë la inamacan,
Matre tro ni a atre la itre wathebo i nyipë.
74 Kola madrine la itre ka xoue nyipë la angatr a öhnyi ni,
Ke mejiuneng* la trengewekë i nyipë.
75 Iehova fe, atre hi ni laka, meköti la itre iameköti i nyipë
Nge hatrene nyipici i nyipë, la nyipëti a akötrë ni.
76 Epi troa axaponyi ni hnene la ihnimi nyipici i nyipë,
Thenge la hnei nyipëti hna thingehnaean* kowe la hlue i nyipë.
77 Utipi ni jë matre tro pala kö ni a mel,
Ke ka tru koi ni la wathebo i nyipë.
78 Epi tro la itre ka pi tru a heetrëne la hmahma,
Ke angatr a akötrë ni ngo pëkö kepin.*
Ngo ame eni, tro kö ni a lapa mekune* la itre wathebo i nyipë.
79 Epi tro la itre ka xoue nyipë a bëeke koi ni,
Lo itre ka atre la hnei nyipëti hna amexej.
80 Epi tro la hning a trongëne la itre hnei nyipëti hna cinyanyin cememine la nyipici,
Matre tha tro kö ni a hmahma.
כ [Kaph]
81 Eni a lapa treqene la iamele i nyipë,
Ke mejiuneng la trengewekë* i nyipë.
82 Luemekeng a lapa treqene la trengewekë i nyipë
Nge öning: “Eu la tro nyipëti a aupunyi ni?”
83 Eni a tune la trengene tim hna aqaqacilën hnene la so ne eë,
Ngo tha thëthëhmine kö ni la itre hnei nyipëti hna cinyanyin.
84 Ije drai ne tro la hlue i nyipëti a itreqe?
Eu la tro nyipëti a amekötine la itre ka axösisi ni?
85 Itre ka pi tru a sine la itre hnaop koi ni,
Ene lo itre ka ena la wathebo i nyipë.
86 Nyine mejiune kow la itre hnei nyipëti hna amekötin.
Kola axösisi ni nge pëkö kepin; haawe, amele ni jë!
87 Xönë hi troa apatrenyi ni qa ngöne la fen,
Ngo tha hnenge kö hna nuetrije la itre wathebo i nyipë.
88 Thupëne ju la meleng thenge la ihnimi nyipici i nyipë,
Matre tro ni a trongëne la itre hnei nyipëti hna amexej.
ל [Lamed]
89 Iehova fe, ka epine palua
La trengewekë i nyipëti e koho hnengödrai.
90 Ka mama la nyipici i nyipë ngöne la nöjei xötre atr.
Hnei nyipëti hna acile hutine la ihnadro, matre tha tro kö ej a enienij.
91 Jëne la itre iameköti i nyipë, itre ej* a cile hut uti hë enehila,
Ke itre hlue i nyipëti asë itre ej.
92 Maine tha hnenge ju hna nyipine la wathebo i nyipë,
Tro hë ni a mec ngöne la akötreng.
93 Tha tro kö ni a thëthëhmine la itre wathebo i nyipë,
Ke jëne itre ej, hnei nyipëti hna thupëne la meleng.
94 Ewekë i nyipëti hë ni; amele ni jë,
Ke eni a thele la itre wathebo i nyipë.
95 Itre atr ka ngazo a thele troa humuthi ni,
Ngo eni a wangatrune la itre hnei nyipëti hna amexej.
96 Hnenge hna öhne laka, hna nyi ifegone hi la troa pexej,
Ngo pëkö ifego* ne la wathebo i nyipë.
מ [Mem]
97 Hnime catre ni la wathebo i nyipë!
O drai, eni a lapa mekun* ej.
98 Inamacane kö ni hune la itre ithupëjiang hnene la wathebo i nyipë,
Ke eje theng uti hë epine palua.
99 Atreine ju kö ni waiewekë hune la itre ka ini ni,
Ke eni a lapa mekune* la itre hnei nyipëti hna amexej.
100 Inamacane kö la aqane ujëng hune la itre qatr,
Ke eni a drengethenge la itre wathebo i nyipë.
101 Tha pi tro kö ni a trongëne la gojenyi ka ngazo,
Ke eni a ajane troa drengethenge la trengewekë i nyipë.
102 Tha jea kö ni qa ngöne la itre iameköti i nyipë,
Ke nyipëti la atre ini ni.
103 Epi troa menyik la itre trengewekë i nyipë ngöne la qëng,
Hune la miel ngöne la ukeineqëng!
104 Jëne la itre wathebo i nyipë, eni a ujë cememine la inamacan.
Celë hi kepin matre eni a sisine la itre jë ne la thoi.
נ [Nun]
105 Ketre laam kowe la lue cang la trengewekë i nyipë,
Nge ej a thinane la gojenying.
106 Hnenge hna sisiny, nge tro kö ni a eatrën,
Ene la troa drengethenge la itre iameköti i nyipëti ka meköt.
107 Atraqatre la akötreng.
Iehova fe, thupëne ju la meleng thenge lo hnei nyipëti hna thingehnaean.*
108 Iehova fe, kapa madrine ju la itre huuj ne iatruny hnenge hna hamëne xanën,*
Nge ini ni jë la itre iameköti i nyipë.
109 E nöjei drai, eni a qëmek kowe la mec,
Ngo tha thëthëhmine kö ni la wathebo i nyipë.
110 Hna tra thethi ni hnene la itre atr ka ngazo,
Ngo tha hnenge kö hna jea qa ngöne la itre wathebo i nyipë.
111 Hnenge pala hi hna xome la itre hna amexej hnei nyipë nyine edröng,
Ke itre ej a amadrinëne la hning.
112 Ase hë ni axeciën troa drengethenge* la itre hnei nyipëti hna cinyanyin
E nöjei ijin, nge uti hë la pun.
ס [Samekh]
113 Methinge la itre ka luelu,*
Ngo hnime catre ni la wathebo i nyipë.
114 Nyipëti la hnapong me petreng,
Ke mejiuneng* la trengewekë i nyipë.
115 The easenyi ni kö hnei epun, itre atr ka ngazo,
Matre tro ni a drengethenge la itre wathebo ne la Akötresing.
116 Sajuë ni jë tune lo hnei nyipëti hna thingehnaean,*
Matre tro pala kö ni a mel;
The nue kö troa nyihnane la mejiuneng hnei hmahma.
117 Sajuë ni jë matre mele pi ni;
Tro hë ni a lapa mekune la itre hnei nyipëti hna cinyanyin.
118 Nyipëti a thipetrije la itre ka jea qa ngöne la itre hna cinyanyin hnei nyipë,
Ke itre atr ka thoi me iaö angatr.
119 Nyipëti a xometrije la itre atr ka ngazo qa celë fen tune la itre sikori.*
Celë hi matre, ka tru koi ni la itre hnei nyipëti hna amexej.
120 Eni a hmengöhmengön hnene la xou hnei nyipëti hna axulun;
Eni a lapa xouene la itre iameköti i nyipë.
ע [Ayin]
121 Hnenge hna kuca la meköt me thiina ka meköt.
The nue ni kö kowe la itre ka akötrë ni!
122 Isine jë troa amadrinëne la hlue i nyipë;
Epi tha tro kö la itre ka pi tru a axösisi ni.
123 Genyi hë la luemekeng hna treqene la iamele i nyipë
Memine la hna thingehnaean* hnei nyipë ka meköt.
124 Amamane jë la ihnimi nyipici i nyipë kowe la hlue i nyipë,
Nge ini ni jë la itre hnei nyipëti hna cinyanyin.
125 Eni la hlue i nyipë, hamë ni pi la inamacan,
Matre tro ni a trotrohnin la itre hnei nyipëti hna amexej.
126 Traqa ha la ijin tro Iehova a mama,
Ke hnei angatr hna ena la wathebo i nyipë.
127 Celë hi matre, hnime catre kö ni la itre wathebo i nyipë
Hune la gool memine la nyipi* gool.
128 Ame koi ni, ke ka meköti asë hi la itre wathebo* i nyipë;
Mething la itre jë ne la thoi.
פ [Pe]
129 Mingöming la itre hnei nyipëti hna amexej.
Celë hi matre eni a trongën itre ej.
130 Kola thina ni hnene la itre ini qa ngöne la trengewekë i nyipë,
Ej a ainamacanëne la itre ka thatrein.*
131 Eni a angangane catrëne la qëng me simano,*
Ke eni a pi ije la itre wathebo i nyipë.
132 Xei jë koi ni, nge kepe ni ju hnei nyipë,
Thenge la hnei nyipëti hna amekötin thatraqane la itre ka hnime la ëje i nyipë.
133 Jëne la trengewekë i nyipë, acatrene ju la itre hnenge hna feke ca;
Epi tha tro kö la ketre ewekë ka ngazo a musinë ni.
134 Amele* ni jë qa ngöne la itre ka iaxösisi,
Nge tro hë ni a trongëne la itre wathebo i nyipë.
135 Ahudrumene* jë la qëmeke i nyipë hune la hlue i nyipë,
Nge ini ni jë la itre hna cinyanyin hnei nyipë.
136 Kola xölaxöla la itre trenge timidrang qa ngöne la luemekeng
Ke tha hne huni kö hna drengethenge la wathebo i nyipë.
צ [Tsade]
137 Iehova fe, ka meköti nyipë,
Nge tha ka sasaithi tulu kö la aqane iameköti i nyipë.
138 Ka meköti la itre hnei nyipëti hna amekötin
Nge ijije hi troa lapaune kow.
139 Kola mel e kuhu hning la aja ka catr,
Ke thëthëhmine hë la itre trengewekë i nyipë hnene la itre ka cile koi ni.
140 Ka wië la trengewekë i nyipë,
Nge hna hnim hnene la hlue i nyipë.
141 Ka pë pengöne ni nge hna methinë ni;
Ngo ame pe, tha hnenge kö hna thëthëhmine la itre wathebo i nyipë.
142 Ka epine palua la meköt i nyipë,
Nge ka nyipici la wathebo i nyipë.
143 Ngacama kola tithi ni hnene la itre akötr me itre jol,
Ngo ka tru koi ni la itre wathebo i nyipë.
144 Ka epine palua la emekötine la itre hnei nyipëti hna amexej.
Hamë ni pi la inamacan matre mele kö ni.
ק [Qoph]
145 Eni a hë hnene la hni ka pexej. Iehova fe, sa jë koi ni.
Eni a ajan troa trongëne la itre hnei nyipëti hna cinyanyin.
146 Eni a sipo ixatua koi nyipë; amele ni jë!
Tro hë ni a drengethenge la itre hnei nyipëti hna amexej.
147 Eni a hlë e hmahmakanyi sine jidr, matre treij me xëwe koi nyipë,
Ke mejiuneng* la itre trengewekë i nyipë.
149 Thenge la ihnimi nyipici i nyipë, drenge ju la nine ithanatang.
Iehova fe, thupëne ju la meleng thenge la meköt i nyipë.
150 Kola easeny hnene la itre ka kuca la itre huliwa nyine hmahman;*
Nanyi catr angatr qa ngöne la wathebo i nyipë.
151 Iehova fe, ka easenyi catre nyipë koi ni,
Nge ka nyipici la nöjei wathebo i nyipë.
152 Atre hë ni lai ekö laka, hnei nyipëti hna acil la itre hna amexej,
Matre troa cile hut epine palua.
ר [Resh]
153 Goeëne ju la akötreng, nge amele ni jë,
Ke tha thëthëhmine kö ni la wathebo i nyipë.
154 Isigöli ni jë, nge amele ni jë;
Thupëne ju la meleng thenge la hnei nyipëti hna thingehnaean.*
155 Ka nanyi la iamele kowe la itre atr ka ngazo,
Ke tha hnei angatre kö hna thel la itre hnei nyipëti hna cinyanyin.
156 Iehova fe, ka tru la utipine i nyipë.
Thupëne ju la meleng thenge la meköt i nyipë.
157 Ala nyimu catr la itre ka akötrë ni, me itre ithupëjia me eni;
Ngo tha hnenge kö hna jea qa ngöne la itre hnei nyipëti hna amexej.
158 Eni a sisine la itre ka mele thoi,
Ke xele kö angatr ma trongëne la trengewekë i nyipë.
159 Goeëne la aqane hnime ni la itre wathebo i nyipë!
Iehova fe, thupëne ju la meleng thenge la ihnimi nyipici i nyipë.
160 Ame asë hi la aliene la trengewekë i nyipë, ke ka nyipici,
Nge ka epine palua la itre iameköti i nyipë ka meköt.
ש [Sin] maine [Shin]
161 Kola akötrë ni hnene la itre he ne nöj nge pë pe nyipi kepin,
Ngo hning a metrötrëne la itre trengewekë i nyipë.
162 Eni a madrine fë la trengewekë i nyipë
Tune la ketre atr ka öhne la trengamo ka tru.
163 Methinge la thoi nge eni a sisin ej
Ngo hnime catre ni la wathebo i nyipë.
164 E nöjei drai, eni a a 7 lao atrunyi nyipë
Pine la itre hna amekötin hnei nyipë ka meköt.
165 Thatraqane la itre ka hnime la wathebo i nyipë la tingeting atraqatr;
Pëkö ka atreine troa akeinyi angatr.*
166 Iehova fe, eni a mejiun kowe la itre huliwa ne iamele i nyipë,
Nge eni a trongëne la itre hna amekötin hnei nyipë.
167 Eni a trongëne la itre hnei nyipëti hna amexej,
Nge tru catre la ihniming koi itre ej.
168 Eni a drengethenge la itre wathebo i nyipë me itre hna amexej hnei nyipë,
Ke atre hi nyipëti la nöjei huliwang.
ת [Taw]
169 Iehova fe, epi traqa thei nyipë la xëweng.
Jëne la trengewekë i nyipë, ini ni jë troa trotrohnin.
170 Loi e traqa thei nyipë la sipong.
Amele ni jë tune lo hnei nyipëti hna thingehnaean.*
171 Epi tro pala hi la ukeineqëng a atrunyi nyipë,
Ke nyipëti a ini ni la itre hna cinyanyin hnei nyipë.
172 Epi tro la thinemeng a nyimane la trengewekë i nyipë,
Ke meköti la nöjei wathebo i nyipë.
173 Loi e tro la ime i nyipëti a canga xatua ni,
Ke hnenge hna iën troa drengethenge la itre wathebo i nyipë.
174 Iehova fe, tru catre la ajang kowe la iamele i nyipë,
Nge ka tru koi ni la wathebo i nyipë.
175 Epi tro ni a mel matre atrunyi nyipë;
Epi tro la itre iameköti i nyipë a amele ni.
176 Eni pë hë a tro menu tune la ketre mamoe ka patr. Thele jë la hlue i nyipë,
Ke tha thëthëhmine kö ni la itre wathebo i nyipë.