Itre Treije i Ieremia
א [Aleph]
3 Eni la atr ka öhne la akötr pine la jia ne elëhni i nyidrë.
2 Hnei nyidrëti hna helë ni me tro sai ni ngöne la gaa jidr, ngo tha ngöne kö la gaa lai.
3 Eje hi, ngöne la drai ka pexej, nyidrëti pala hi a xejë la ime i nyidrë troa lepi ni.
ב [Beth]
4 Hnei nyidrëti hna kuca matre fitre pi la ijöneng me ikupeineng;
Hnei nyidrëti hna hutra la itre juneng.
5 Hnei nyidrëti hna cile xötreithi ni; hnei nyidrëti hna kanothi ni hnei poizin me akötr.
6 Hnei nyidrëti hna musinë ni troa lapan la itre gaa mit, tune lo itre ka meci hë ekö.
ג [Gimel]
7 Hnei nyidrëti hna xupi hag xötreithi ni, matre tha tro kö ni a kötr;
Hnei nyidrëti hna ceinë ni hnei ceine kopa ka hace.
8 Nge ame la eni a awe me thele ixatua, xele kö nyidrë ma drenge* la thithing.
9 Hnei nyidrëti hna xom la itre etë hna thupathupa nyine ekögölithe la itre jëng;
Hnei nyidrëti hna kuca matre ilitre pi la itre gojenying.
ד [Daleth]
10 Nyidrëti a zae treqe ni tune la bea, me zae tune la liona.
11 Hnei nyidrëti hna ajeanyi ni qa ngöne la itre gojeny, me hej angazo ni;*
Hnei nyidrëti hna kuca matre lapa casi pi ni.
12 Hnei nyidrëti hna hule* la tane pehna i nyidrë, me atë koi ni.
ה [He]
13 Hnei nyidrëti hna jaqa la wenethulumating hnene la itre ane pehna* hna xom qa ngöne la trengen.
14 Itre nöj asë a thaipië ni. Ngöne la drai ka pexej, angatr pala hi a hnyimasai ni ngöne la itre nyima.
15 Hnei nyidrëti hna atiqanyi ni hnei ewekë ka haitr, me thue imenge la feja ka haitre pun.
ו [Waw]
16 Nyidrëti a axeciëne la itre inyöng hnei wene etë;
Hnei nyidrëti hna huj alö ni ngöne la hnatresij.
17 Nyipëti a cipane la tingeting koi ni. Thëthëhmine hë ni la ewekë ka loi.
18 Celë hi matre öning: “Patre hë la elolong, nge tha mejiune hmaca kö ni koi Iehova.”
ז [Zayin]
19 The thëthëhmine kö laka, eni a hleuhleu me pë uma. Mekune kö la feja ka haitre pun memine la poizin.
20 Eje hi, tro hmaca nyipëti a mekune lai me thil troa goeë ni ni.
21 Eni hmaca a mekune lai; haawe, tro hë ni a lapa treqen.
ח [Heth]
22 Hnene la ihnimi nyipici i Iehova matre tha patre kö së,
Ke ka pë pune la itre huliwa ne utipine i nyidrë.
23 E nöjei hmakany, kolo pala hi a mama la itre xaa aqane utipine i nyipë. Ka pë ifegon la aqane mele nyipici i nyipë.
24 Öning: “Iehova la edröng, celë hi matre tro ni a treqe nyidrëti hnyawa.”
ט [Teth]
25 Ka lolo Iehova kowe la ka mejiun koi nyidrë, kowe la atr ka catre thele nyidrë.
26 Loi e troa lapa thaup me lapa treqen la iamele qaathei Iehova.
27 Loi e tro la atr a cil kowe la itre jol* e nekö trahmany petre kö angeic.
י [Yod]
28 Loi e tro angeic a lapa cas, me lapa thaup la Akötresie a axulun* la itre jol koi angeic.
29 Loi e tro angeic a thil me saan la që i angeic e kuhu hnadro. Maine jë hetre mejiune pala kö.
30 Loi e tro angeic a line la itrasitre i angeic kowe la ka xe angeic. Loi e tro angeic a nue troa qaqa angeic.
כ [Kaph]
31 Ke tha tro jë kö Iehova a nuetriji së epine palua.
32 Ngacama hnei nyidrëti ju hë hna akötrë së, ngo tro fe nyidrëti a utipi së, pine la etrune la ihnimi nyipici i nyidrë.
33 Ke patre kö e kuhu hni i nyidrë la aja troa akötrëne maine ahleuhleune la itre nekö i atr.
ל [Lamed]
34 Hapeu, hetre atre kö ka tro waja la itre hna akalabusin e cailo fen?
35 Hetre atre kö ka cipane la meköt kowe la ketre atr, qëmeken la Ka Draië Catr?
36 Hetre atre kö ka akötrëne la ketre atr ngöne la kola kootrë angeic?
Xele catre Iehova ma wang la itre ewekë cili.
מ [Mem]
37 Drei la ka ijij troa qaja la ketre ewekë me eatrën, nge tha hna amekötine pe hnei Iehova?
38 Thatreine kö troa xulu qa ngöne la ukeineqë ne la Ka Draië Catr,
La itre trengewekë ka ngazo me ka lolo.
39 Tro kö la ketre atr* a eetr, pine angeice xeni pune la itre ngazo i angeic?
נ [Nun]
40 Thele jë nge waipengöne jë së la aqane ujë së, matre bëeke koi Iehova.
41 Ce xejë jë la lue ime së me itre hni së koi Akötresie e hnengödrai:
42 “Hne huni hna ngazo me tha idrei, nge tha hnei nyipëti kö hna nue la ngazo hun.
ס [Samekh]
43 Ngöne la elëhni i nyipë, hnei nyipëti hna thingi jë hun;
Me weji hun me humuthi hun, nge pëkö utipine i nyipë.
44 Jëne la ketre iaw, hnei nyipëti hna thingi jë hun, matre tha tro kö a traqa koi nyipë la itre thithi hun.
45 Nyipëti a kuca matre tro huni a tune la itre salite me itre ewekë nyine trij nyipine la itre nöj.”
פ [Pe]
46 Itre ithupëjia asë hi a xöjetriji hun.
47 Xou me ihnö, celë hi la ka traqa koi hun, kola iapatreny me akötr.
48 Kola neni la itre tim qa ngöne la luemekeng, ke kei hë la nekö jajinyi ne la nöjeng.
ע [Ayin]
49 Tha mano kö treije la luemekeng, nge pëkö pune la treijeng,
50 Uti hë la Iehova a goeën me öhne qa hnengödrai.
51 Kola akötrë ni hnene la luemekeng, la eni a öhne la ka traqa kowe la nöjei jajinyi ne la traoneng.
צ [Tsade]
52 Hnene la itre ithupëjia hna weji ni tune la ketre waco, ngo pë pe kepin.
53 Hnei angatr hna xome la meleng ngöne la hnaop. Hnei angatr pala hi hna tranyi ni hnei etë.
54 Hna elë la tim uti hë la kola heti ni, matre öning: “Ka luzi hë ni la!”
ק [Qoph]
55 Iehova fe, hnenge hna suene la ëje i nyipë qa kuhu hnaop gaa jui.
56 Pane drei ni ju! The thinge kö la lue hnangenyë i nyipë la eni a sipo ixatua, me thele iakeukawany.
57 Ngöne lo drai ne eni a hë nyipë, hnei nyipëti hna easenyi ni, me hape: “The xou kö.”
ר [Resh]
58 Iehova fe, hnei nyipëti hna cilëgöli ni me itöne la meleng.
59 Iehova fe, öhne hë nyipë la hna kuca koi ni. Epi tro nyipëti a jele meköti ni.
60 Öhn asë hi nyipë lo angatr a thele troa të koi ni, me itre nyinyithiina i angatr koi ni.
ש [Sin] maine [Shin]
61 Iehova fe, drenge hi nyipë lo angatr a qaqa ni, me itre nyinyithiina i angatr koi ni,
62 Lo hna qaja hnene la që ne la itre ithupëjia, lo hnei angatr hna iulilin göi ni ngöne la drai ka pexej.
63 Goeë angatr! Ngacama ka lapa ju hë angatr maine cil, ngo angatre pala hi a hnyimasai ni ngöne la itre nyima i angatr!
ת [Taw]
64 Iehova fe, tro kö nyipëti a të koi angatr thenge la itre huliwa i angatr.
65 Tro kö nyipëti a axetine la itre hni i angatr; celë hi aqane tro nyipëti a eji angatr.
66 Iehova fe, ngöne la elëhni i nyipë, tro nyipëti a weje huzu angatr me apatrenyi angatr fene la hnengödrai i nyipë.