Isaia
41 “Epuni fe itre hnapet, drei ni ju nge lapa thaupu* ju;
Epi tro la itre nöj a xomi trengecatre hmaca.
Epi tro angatr a easeny matre troa ewekë.
Icacaxenyi jë së kowe la iameköti.
2 Drei la ka hën la ketre atr qa ngöne la hna fetra hnei jö?*
Drei la ka hë angeic thenge la meköt matre nyihlue* i nyidrë,
Me nue koi nyidrë la itre nöj matre troa xom acone la itre joxu?
Drei la ka amudromudronyi angatr qëmekene la taua i nyidrë,
Me isa ije angatr
Tune la jez hna ufe enyin qëmekene la pehna i nyidrë?
3 Angeic a weji angatr, nge pëkö ka atrein acilë angeic
Ngöne la itre gojeny hnei angeic hna hnyipi trongën.
4 Drei la ka kuca lai me eatrëne lai,
Me hëne la nöjei xötr qa ngöne la qaan?
Eni Iehova, nge eni hi La Ka Traqa Pa;
Nge tha saze kö ni memine la itre ka traqa pi.”
5 Hnene la itre hnapet hna öhne lai me xou atraqatr.
Hna hmengöhmengöne la itre cane la fene hnengödrai.
Angatr asë a ce traqa me icasikeu.
6 Angatr a itö ixatua
Me qaja kowe la trejin me angatr ka hape: “Catre pi.”
7 Kola thuecatrene la atre dreu fao hnene la atre tratraun;
Kola thuecatrene la atre lepelepe fao
Hnene la atre tranetran hnei hama.
Öni angeic: “Ka catre hnyawa la fao hna sude.”
Thupene lai, kola lepe faone la idrola matre tha tro kö ej a enienij.
8 “Ngo ame eö Isaraela fe, eö la hlueng,
Iakobo fe, eö lo hnenge hna iën,
Lo matra* i Aberahama sineeng,
9 Eö lo hnenge hna xome qa ngöne la itre cane la fene hnengödrai,
Me hëne qa ngöne la itre nöje gaa nany.
Öninge lo koi ö ka hape: ‘Eö la hlueng;
Lo hnenge hna iën; tha hnenge kö hna nuetriji ö.
10 The xou kö, ke ce eni me eö.
The hnehengazo kö, ke eni la Akötresi ö.
Tro ni a aegöcatrenyi ö. Eje hi, tro ni a xatua eö,
Eje hi, tro ni a sajuë eö hnene la ime macang ka meköt,’
11 Goeën! Tro ha hmahma me thaipiën la itre ka elëhni koi ö.
Tro ha patr la itre ka cile koi ö.
12 Tro hë eö a thel la itre atr ka icilekeu me eö, ngo tha tro kö eö a öhnyi angatr;
Tro la itre ka pi isi me eö a tune la ka pë pengön me pë alien.
13 Ke eni Iehova Akötresi ö, la ka ea la ime maca i ö,
Eni la atre qaja koi ö ka hape: ‘The xou kö. Tro ni a xatua eö.’
14 The xou kö Iakobo neköi wanak,*
Me epuni fe itre trahmanyi ne Isaraela! Tro ni a xatua eö,” öni Iehova Atre Itö Mele* i ö, lo Atre Ka Hmitrötr e Isaraela.
15 “Goeën! Hnenge hna ujë eö nyine ikatr ne lepelepe qitr,
Ketre jia ne huliwa ka hnyipixe nge ka hetre nyö ka idrei ngöne la lue götran.
Tro eö a tro waja me wajaficane la itre wetr
Nge tro eö a kuca matre tro la itre sasala a tune la kupeine qitr.
16 Tro eö a jumejumi angatr,
Nge tro la enyi a ufetriji angatr;
Tro la wene a isa ije angatr.
Tro eö a madrin qaathei Iehova,
Nge tro ha atrunyi ö hnene la Atre Ka Hmitrötr e Isaraela.”
17 “Kola thele tim hnene la itre ka pë ewekë me itre ka akötr, ngo pëkö tim.
Qaqacile hë la itre thineme i angatr hnei pi ij.
Tro ni Iehova a sa koi angatr.
Tha tro kö ni, Akötresi Isaraela, a nuetriji angatr.
18 Tro ni a anenine la itre hneopegejë ngöne la itre sasala gaa pë sinöe
Nge tro ha fetra la itre tim ngöne la itre gaa papa.
Tro ni a kuca matre tro la hnapapa a nyi tim hna haöth hnei rozo
Nge tro la ihnadro ka qaqacil a qeqe ne tim.
19 Ame ngöne la hnapapa, tro ni a traane la itre sinöe arasi,
Me sitim, me adasi, me göti.
Ame ngöne la gaa papa,
Tro ni a traane la ketre pengöne göti, me tidera, me tasura,
20 Matre tro la nöjei atr asë a goeën me atre
Me wangatrehmekun me trotrohnin laka
Iehova la ka kuca lai hnene la ime i nyidrë,
Nge hna xupe lai hnene la Atre Ka Hmitrötr e Isaraela.”
21 “Amamane pi la ka traqa koi epun,” öni Iehova.
“Qaja jë la kepin matre epuni a ujë tun,” önine la Joxu i Iakobo.
22 “Amamane pi nge qaja jë koi hun la ewekë ka troa traqa.
Qejepengöne jë koi huni la itre ewekë hnapan,
Matre tro huni a mekun* me atre la pun.
Maine pena, thuemacanyi huni jë la itre ewekë ka troa xulu.
23 Qaja amamane jë koi hun la itre ewekë ka troa traqa elany,
Matre tro huni a atre laka, itre haze epun.
Öi, kuca jë la ketre ewekë ka loi maine ka ngazo,
Matre tro huni a goeën me hain.
24 Goeën! Pëkö pengöi epun,
Nge pëkö hnei epuni hna atreine kuca.
Ame asë hi la itre ka hni koi epun, ke itre hna sisin.
25 Ase hë ni axulune la ketre atr qa kolopi, nge calemi hë angeic,
Ka traqa angeic qa ngöne la hna fetra hnei jö* nge tro angeic a atrune* la ëjeng.
Tro angeic a tro waja la itre joxu* kösë dro ka fedr,
Tune la aqane tro waja la dro ka fedr hnene la atre xupi inege.*
26 Drei la ka amamane lai qa ngöne lo qaan matre tro huni a atre,
Me qa ngöne la itre drai hnapan matre tro huni a qaja ka hape: ‘Nyipici nyidrë’?
Pëkö ca atr ka qaja!
Pëkö ca ka ithuemacany!
Pëkö ka drei epuni e qaja la ketre ewekë!”
27 Eni la ka pane qaja koi Ziona ka hape: “Goeën! Angatr hë la!”
Nge tro ni a up a tro Ierusalema la ketre atr ka tro fë maca ka lolo.
28 Goeëne ju pë hë ni, ngo pëkö atr hnenge hna öhn;
Pëkö cas e angatr ka atreine troa hamë eamo.
Nge hnenge pala hi hna upi angatr troa sa.
29 Goeën! Ceitu i angatr me pëkö.*
Ka pë alien la itre huliwa i angatr.
Ceitu la itre idrola* fao i angatr me eny, nge ka pë alien.