Hosea
14 “Isaraela fe, bëeke hmaca jë koi Iehova Akötresi ö,
Ke hnei ö hna kei pine la ngazo i ö.
2 Bëeke jë koi Iehova me hape:
‘Epi nue pi la ngazo hun me kapa la itre huliwa hun ka lolo,
Nge tro huni a tro fë koi nyipë la itre huuj nyine iatruny qa ngöne la ukeineqë hun,* kösë itre neköi kau.
3 Tha tro kö Asuria a amele së.
Tha tro kö sa tithe la itre hos,
Nge tha tro hmaca kö sa qaja kowe la itre hne së hna xupe ka hape, “Akötresi huni fe!”
Ke nyipëti hi la ka utipin la nekön hna mecitrij hnei kem.’
4 Tro ni a aloinyi angatr, ke hnei angatr hna tha mele nyipici.
Tro ni a hnimi angatre qa kuhu hning,*
Ke tha elëhni hë ni koi angatr.
5 Tro hë ni a tune la wene lepany koi Isaraela;
Tro hë angeic a eng tune la ketre lili
Nge tro ha xuxu la itre iwaane i angeic tune la itre sinöe ne Lebanona.
6 Tro ha xöle trootro la itre zine i angeic,
Tro hë angeic a mingöming tune la ioliv,*
Nge tro hë angeic a punepun tune la sinöe ne Lebanona.
7 Tro hmaca ha angatr a lapa fene la gaa xapo i nyidrë.
Tro angatr a traa qitr* me eng tune la vin.
Tro nyidrëti a hlemu* tune la waina ne Lebanona.
8 Tro hë Eferaima a qaja ka hape: ‘Tro hmaca ni a uëne la itre idrola?’
Nge tro hë ni a sa koi angeic me thupë angeic.
Tro hë ni a tune la ketre göti ka catr.
Eni la ka troa hamë wene sinöe i angatr.”
9 Drei la ka inamacan? Epi tro angeic a trotrohnine la itre ewekë cili.
Drei la ka hetre wangatrehmekun? Epi tro angeic a atre itre ej.
Ke ka meköti la itre gojeny i Iehova,
Tro la itre ka meköt a trongëne itre ej;
Ngo tro la itre ka ngazo a kei e cili.