Numera

11 Ame hnene la nöj hna nyiqaane eetr* koi Iehova. Drenge jë hi Iehova, nge elëhni jë hi nyidrëti koi angatr. Nge xulu pi hi la eë i Iehova a dreuthi angatr, me dreuthe la itre ka cile xötreithe la lapa. 2 Nge hnene la nöj hna treije koi Mose, ame hnei angeic hna xëwe koi Iehova, nge pi ju hi la eë. 3 Qa ngöne lai, hna hëne la götrane cili Tabera,* ke hnene la eë i Iehova hna dreuthi angatr.

4 Ame hnene la ka ala nyim* nyipi angatr hna piin menun la itre xen. Nge hnene fe la angetre Isaraela hna treij, me qaja ka hape: “Drei la ka troa thue öni hun? 5 Ekölö hi ni lo itre ie hne së hna öni gufa e Aigupito, nge the qaja kö la itre kokoob, me itre wanathim, me itre salatr, me itre onyon, me itre wene lai. 6 Ngo ame enehila, ke easë a troa mec, nge casi pala hi la hne së hna öhn, a mana.”

7 (Ame la mana, ke ka tune la itine persil, nge kösë sia ne sinöe ka wië. 8 Ame hna isa ije la nöj troa hleme la mana, nge angatr a amudromudron ej ngöne la lue etë nyine amudron, maine tranetran ej hnine la etë nyine tranetran, me atron ej hnine la itre öl, maine kuci itre falawa ka raone pena memin. Nge ej a ceitu me gato ka si oel, nge hna nyi sukan. 9 Nge e jidr, ngöne la kola uti la wene lepanyi hune la lapa, ke kola mala fe la mana.)

10 Ame hnei Mose hna drenge la kola itreijenyi la itre lapa, ene la itre trahmanyi ngöne la hnë lö ne la itre itate i angatr. Nge elëhni catre Iehova me Mose koi angatr. 11 Matre öni Mose koi Iehova ka hape: “Hnauëne laka, nyipëti a akötrëne la hlue i nyipë? Hnauëne laka, tha kepe ni kö hnei nyipë, matre nyipëti pena a ahacenyi ni hnene la nöje ce? 12 Hapeu, eni kö la ka xupe la nöje ce? Eni kö la ka hnahone la nöj matre upi ni jë hnei nyipëti ka hape: ‘Xepi nyëne jë kowe la imano i ö tune la hlu* a xepe la medreng,’ me tro fë kowe la nöj hnei nyipëti hna sisinyi kowe la itre xötrapane i angatr? 13 Nge tro ni a öhn ekaa la mitr thatraqane la nöje ce? Ke tha mano kö angatr treije koi ni me hape: ‘Thue öni hun!’ 14 Thatreine kö ni troa thue casine la nöje ce; hace catre pala ha koi ni. 15 Ngo maine celë hi la aja i nyipëti koi ni, nga humuthi ni pi hö. Ngo maine nyipëti a kepe ni, nga the amamane kö koi ni la itre xaa akötr.”

16 Matre öni Iehova jë hi koi Mose: “Icasinekeune jë la 70 lao trahmanyi qa ngöne la itre qatre ne Isaraela, lo hnei ö hna xome ceitu* me itre qatr me itre ka thupëne la nöj; tro sai angatre jë kowe la itat ne icasikeu, nge acili angatre ju e cili me eö. 17 Nge tro ni a uti me ithanata me eö; nge tro ni a xome qaathei ö la ketre sine la uati hmitrötr, me atë hui angatr. Nge tro angatr a xatua eö troa thu la ehnefe celë, matre tha tro kö eö a thue casine la nöj. 18 Nge tro eö a qaja kowe la nöj ka hape: ‘Ahmitrötrë epuni jë koi elany, ke tro hë epuni a öni mitr, ke hnei epuni hna treije koi Iehova me qaja ka hape: “Drei la ka troa thue mitre hun? Nge loi kö lo mele i eahun e Aigupito.” Eje hi, tro kö Iehova a hamë mitre i epun, nge tro hë epuni a öni. 19 Nge tha tro kö epuni a öni mitr koi ca drai, maine lue drai, maine 5 lao drai, maine 10 lao drai, maine 20 lao drai, 20 ngo ngöne la ca treu ka pexej, uti hë la tro ej a xulu pi qa ngöne la itre hnafiji epun, nge tro epuni a sisin ej, pine epuni methinë Iehova lo atre lapa nyipi epun, me treije koi nyidrë me hape: “Hnauëne laka, tro pi së qa Aigupito?”’”

21 Öni Mose jë hi ka hape: “Traqa koi 600 000 lao trahmany* ngöne la nöjeng nge öni nyipëti ka hape: ‘Tro ni a thue öni angatr koi ca treu’! 22 Nge tro kö a ijij e troa humuth asë la itre öni ka tru me ka co? Nge tro kö a ijij e troa ea la nöjei ie e kuhu hnagejë?”

23 Öni Iehova jë hi koi Mose ka hape: “Hapeu, tha ijiji Iehova kö troa kuca la itre ewekë cili? Tro eö a wange enehila ka hape, tro kö a eatre la hnenge hna qaja maine waea.”

24 Ame hnei Mose hna lö pi, me qaja kowe la nöj la itre trengewekë i Iehova. Nge hnei angeic hna icasinekeune la 70 lao trahmany nyipine la itre qatr ne la nöj, me acili angatr xötreithe lai itat. 25 Ame hna uti pi hnei Iehova hnine la iaw, me ithanata koi angeic, me xome la ketre sine la uati hmitrötr qaathei angeic, me atë hune la 70 lao qatr. Nge ame la kola të la uati hmitrötr hui angatr, hnei angatr hna ujë tune la itre perofeta,* ngo ngöne hi la ijine cili.

26 Ngo luetre pe kö thene lo ala 70 lao trahmanyi ka lapa ngöne la lapa. Eledada la ëjene la ketre, nge Medada la ketre. Tha hnei nyidroti kö hna tro kowe la itat, ngo hna sija fe la ëje i nyidro. Hnene la uati hmitrötr hna të hui nyidro, nge hnei nyidroti hna ujë tune la itre perofeta ngöne la lapa. 27 Ame hna nyinyape la ketre trahmany koi Mose me qaja ka hape: “Eledada me Medada a nyi perofeta ngöne la lapa!” 28 Öni Iosua nekö i Nuna, hlue i Mose qaane lo angeic a thupëtresij, ka hape: “Joxu, the nue nyidroti kö troa ujë tun!” 29 Ngo öni Mose koi angeic ka hape: “Eö a zalu pi ni? Eni a ajan tro la nöje i Iehova asë a nyi perofeta, nge tro Iehova a atë la uati hmitrötre i nyidrë hui angatr!” 30 Thupene lai, hnei Mose hna bëeke kowe la lapa memine la itre qatr ne Isaraela.

31 Ame hna aca tro hnahna la enyi qaathei Iehova, me traqa fë la itre neköi waco qa kuhu hnagejë, me amalan itre ej xötreithe la lapa. Nge ca drai ne tro qa ngöne la ketre götran, nge ca drai ne tro qa ngöne la ketre, xötreithe la lapa. Nge itre ej a isa mala tranyi ketre me ketre, matre traqa koi lue kubit* la edraiën qa kuhu hnadro. 32 Ame la drai ka pexeje cili, me jidri ka pexej, me lai ka pexej, ka hlë pala hi la nöj troa hleme la itre neköi waco. Hna sasaithe pala hi la 10 omera* la hna hlem hnei isa ala cas. Nge hnei angatr hna amë wengën thatraqai angatr xötreithe la lapa. 33 Ngo kolo pala kö a lapa la sine mitr nyipine la itre inyö i angatr, nge tha ase pala kö hutr, traqa pi hi la elëhni Iehova kowe la nöj. Iehova a lepe pi la nöj, nge ka tiqa catr hnei ka mec.

34 Ame hna hëne la götrane cili, Kiberoth-Atava,* ke hna kelem e cili la itre ka meciun. 35 Ame hna mejë la nöj qa Kiberoth-Atava a tro Hazeroth, me lapa e cili.