Salamo
Thatraqane la atre jumi traem; ngöne Ieduthun.* Salamo i Dravita.
39 Öning: “Tro ni a thupëne la aqane ujëng
Matre tha tro kö ni a tria hnene la thinemeng.
Tro ni a amë la nyine ahumun ngöne la qëng
E ce eni pala kö memine la itre atr ka ngazo.”
2 Hnenge hna hum me pë mej;
Tha hnenge kö hna qaja la loi,
Ke akötre catre ni.
3 Kola idreuth e kuhu hning.
Ame lo eni a mekun,* ke kolo pala hi a mel* la eë.
Ame hna ewekë la thinemeng, nge öning:
4 “Iehova fe, amamane jë la pune koi ni,
Memine la etrune la itre draing,
Matre atre jë ni laka, hopatre hi la meleng.*
5 Ke eje hi, xalaithe hi* la itre draing hnei nyipë;
Kösë pëkö la eqeane la meleng qëmeke i nyipë.
Ke eje hi, maine ka catre ju hë la ketre atr, ngo kösë eny la mele i angeic. (Sela)
6 Eje hi laka, ame la itre atr, ceitu i angatr me ketre iahnu.
Angatr a tro menu e koië me kuë.*
Angatr a xawane la itre trengamo ngo thatre pe angatr ka hape, drei la ka troa kapa elany.
7 Iehova fe, nemene hmaca kö la hnenge hna troa lapa treqen?
Nyipëti hmekuje hi la hnenge hna mejiune kow.
8 Amele ni jë qa ngöne la itre triang.
The nue kö la hmo troa hnyimasai ni.
9 Hnenge hna lapa thaup;
Thatreine kö ni fe la qëng,
Ke nyipëti la ka axulune la itre ewekë cili.
10 Xometrije pi la akötr hnei nyipëti hna axulune koi ni.
Kucakuca ha ni, ke kola lepi ni hnene la ime i nyipë.
11 Nyipëti a hajine la atr nyine nyithupene la ngazo i angeic;
Tune la neköi öni, nyipëti a xuje la itre ewekë hnei angeic hna wangatrun.
Eje hi, kösë enyi la mele ne la atr. (Sela)
12 Iehova fe, drenge ju la thithing,
Nge hnangenyëne ju la eni a sipo ixatua.
The wangacone kö la itre treijeng.
Ke trenyiwa ni koi nyipë,
Ketre atr ka feke trootro, tune lo itre qaaqaang.
13 The goeën amenyi ni hmaca kö matre tro ni a hetre trengecatr
Qëmekene tro ni a tro me patr.”