Esodro

11 Ame hnei Iehova hna qaja koi Mose ka hape: “Tro hmaca ni a lepi Farao me Aigupito nge thupene lai, tro hë angeic a nue epun. Nge ame hë la angeic a nue epun, tro angeic a helë epun. 2 Enehila, qaja ju kowe la nöj ka hape, ‘Tro la nöjei trahmanyi me föe a sipo ewekë sileva me gool, kowe la itre ka lapa easenyi angatr.’” 3 Nge hnei Iehova hna aciane la ihnimi angetre Aigupito kowe la nöj. Ketre, hlemu loi hë Mose e Aigupito, koi itre hlue i Farao me angetre Aigupito.

4 Nge öni Mose ka hape: “Hane hi la hna qaja hnei Iehova, ‘E hnenyipajidr, tro ni a trongëne la nöje Aigupito, 5 nge tro la nöjei pane nekön ne Aigupito a mec, qaane la pane nekö i Farao ka lapane la theron, uti hë la pane nekön ne la hlue föe ka emothe la nyine amudromudro qitr, me nöjei pane neköne la itre öni. 6 E Aigupito asë, tro hi a dreng la kola sue ne akötr, ketre mejen hna tha dreng, nge tha tro hmaca kö a hane dreng. 7 Nge goi tha tro fe a ho* la ketre kuli koi angetre Isaraela, me itre si angatr. Matre atre jë epun ka hape, atreine hi Iehova kuca matre tro kö a isapengöne la angetre Aigupito me angetre Isaraela.’ 8 Tro la nöjei hlue i eö a tro koi ni, me thili qëmekeng, nge tro angatr a hape koi ni, ‘Tro jë, nyipë me nöje ka xötrethenge nyipë.’ Nge tro ni a hane tro.” Thupene lai, Mose a tro pi qaathei Farao fë elëhni.

9 Ame hnei Iehova hna qaja koi Mose ka hape: “Tha tro kö Farao a drei epon, matre nyimutre catre jë la itre iamamanyikeung e Aigupito.” 10 Nge hnei Mose me Arona hna kuca la nöjei iamamanyikeu cili qëmeke i Farao. Ngo hnei Iehova pala hi hna nue troa xeti la hni Farao, matre xele pala hi Farao troa nue la angetre Isaraela troa tro qa ngöne la nöje Aigupito.