Ieremia
16 Hnei Iehova hmaca hna ithanata koi ni, me hape: 2 “Tha tro kö eö a hane faipoipo, me hnaho nekö trahmany me jajinyi ngöne la götrane ce. 3 Ke hane hi la hnei Iehova hna qaja göne la itre nekö trahmany me nekö jajinyi hna hnahon e celë, me itre thine i angatr ka hnaho angatr, me itre keme i angatr ka hamë mel koi angatr ngöne la nöje ce: 4 ‘Tro angatr a mec hnene la itre mec hna mecin, ngo pëkö ka troa treije pi angatr me kelemi angatr. Tro angatr a tune la agetrin hune la hnadro. Tro hë angatr a meci hnei taua me jiin, nge tro ha öni angatr hnene la itre waco me itre öni wael.’
5 Hane hi la hna qaja hnei Iehova,
‘The lö hnine kö la uma ne ce xeni ne hnëmec,
The ce treije kö me itre ka meci sineen, nge the fetra kö koi angatr.’
‘Ke hnenge hna xometrij la tingeting qa ngöne la nöje ce,’ öni Iehova,
‘Memine la ihnimi nyipici me utipin.
6 Tro la ka hlemu memine la hna wangacon a mec ngöne la nöje ce.
Tha tro kö a kelemi angatr,
Pëkö ka troa treije pi angatr,
Nge pëkö ka troa sijasija la ngönetrei maine cin apan la he pi angatr.*
7 Pëkö ka troa tro fë xen kowe la itre ka meci sineen,
Matre aupune la akötre i angatr;
Pëkö ka troa hamën la ver ne iakeukawany
Kowe la itre hna mecitrij hnei kem maine thin.
8 Nge the lö hnine kö la uma ne ce xeni madri
Matre ca lapa me ce xeni me ij.’
9 “Ke hane hi la hna qaja hnei Iehova joxu ne la itre trongene isi e hnengödrai, lo Akötresi Isaraela: ‘Ngöne la götrane ce, tro epuni a öhne la eni a troa apatrene la madrin qëmekei epun. Nge tha tro hmaca kö sa dreng la nine ne la ka faipoipo me föi angeic.’
10 “Ame la eö a troa tro fë la trengewekë celë kowe la nöje ce, tro angatr a hnyingë eö ka hape: ‘Hnauëne laka, hnei Iehova hna perofetan la akötr ka tru celë koi hun? Nemene la tria me ngazo hne huni hna kuca koi Iehova Akötresi së?’ 11 Tro eö a sa koi angatr ka hape: ‘“Ke hnene la itre qaaqa i epun hna nuetriji ni,” öni Iehova, “nge hnei angatre pala hi hna drengethenge, me nyihluen, me thili kowe la itre xaa haze. Ngo hnei angatr hna nuetriji ni, nge tha hnei angatre kö hna trongëne la wathebong. 12 Nge tru catre kö la ngazo i epun hune la itre qaaqa i epun. Epuni asë a isa catre fë mekun me kei thenge la itre sipu aja ne la hni i epun ka ngazo, ngo tha drei ni pe. 13 Celë hi matre, tro ni a hnatriji epun tröne la nöje ce, me upi epun kowe la ketre nöj hnei epuni me itre qaaqa i epuni hna thatre. Nge ngöne la nöje cili, tro pë hë epuni a nyihluene la itre xaa haze e lai me jidr, ke tha tro kö ni a utipi epun.”’
14 “‘Ame pe,’ öni Iehova, ‘tro ha traqa la ijine tha tro hmaca kö angatr a hape: “Maine nyipici laka, ka mele Iehova, atre amelene la nöje Isaraela qa Aigupito!” 15 Ngo tro pe angatr a hape: “Maine nyipici laka, ka mele Iehova, atre abëekën la nöje Isaraela qa kolopi, me qa ngöne la itre xaa nöj hnei nyidrë hna aisaije angatre kow!” E cili, tro hë ni a bëeke sai angatr kowe la nöje i angatr, lo hnenge hna hamën kowe la itre qaaqa i angatr.’
16 ‘Tro ni a hën la itre ka nyi ii,
Matre troa ee angatr,’ öni Iehova.
‘Thupene lai, tro ni a hën la itre ka weje öni,
Matre troa weji angatr hune la nöjei wetr me nöjei sasala
Me ngöne la itre gaa kaqa ne git.
17 Ke luemekeng a goeën asë la hnei angatr hna kuca.*
Thatreine kö angatre kötren la luemekeng,
Nge goi mama cile fe la itre ngazo i angatr qëmekeng.
18 Tro ni a pane nyithupen apexejen koi angatr thenge la itre ngazo me itre tria i angatr,
Ke hnei angatr hna adron la nöjeng hnene la itre idrola i angatr ka sis nge ka tha mele kö*
Nge hnei angatr hna atiqane la zing* hnene la itre ewekë i angatr hna sisin.’”
19 Iehova fe, trengecatreng me hnë zaeng,
Götran hnë zaeng ngöne la ijine jol,
Qa ngöne la itre cane la fene hnengödrai, tro la itre nöj a traqa koi nyipë,
Me hape: “Ame lo hna kapa hnene la itre qaaqa hun, ke trengathoi,
Ewekë ka gufa, nge ka pë alien, me pë eloin.”
20 Hapeu, atreine kö la atr troa sipu xupi haze?
Tha itre haze kö lai!
21 “Celë hi matre, tro ni a amamai angatr,
Eje hi, tro ni a amamai angatr la trengecatreng me meneng,
Nge tro hë angatr a atre laka, Iehova la ëjeng.”