Esodro

38 Nge hnei angeic hna cane la ita ne huuj hnei sinöe akasia, thatraqane la itre huuj ne dreuth asë, casi hi la eqeane la 4 lao götran ej: 5 kubit* la eqean, nge 5 kubit la eisaisan, nge köni kubit la edraiën. 2 Nge ngöne la 4 lao kona, angeic a kuca jë la 4 lao jian, nge ame la itre jiane cili, hna kuca memine la ita ne huuj, matre casi hë. Nge angeic a pelethe jë hnei kopa. 3 Thupene lai, angeic a kuca ju la nöjei jia ne huliwa ka ce tro memine la ita ne huuj: itre baketr, me itre peel, me itre kap, me itre ifook, me itre trengene eë. Hnei angeic hna kuca asë hnei kopa. 4 Nge angeic a kuca ju fe la ikalailai hna pewale kopa thatraqane la ita ne huuj, me amë la hna pewal fene la xötr ezin, e nyipine la ita ne huuj. 5 Nge hnei angeic hna dreuth ahmun, me kuca la 4 lao otru ngöne la 4 lao kona, ezine la ikalailai kopa, matre alöne la itre tan. 6 Thupene lai, angeic a kuca ju la itre tan hnei sinöe akasia, me pelethe hnei kopa. 7 Nge angeic a alöne jë la itre tan hnine la itre otru ngöne la lue götrane la ita ne huuj, matre xututh ej. Ame la ita ne huuj hnei angeic hna kuca, tre kösë pua ka lai hnin hna can hnei inehe.

8 Nge angeic a kuca ju la trepene tim kopa me trepen ej kopa, me huliwane la itre ithulu* ne la itre föe hna amekötine troa huliwa ngöne la hnë lö ne la itat ne icasikeu.

9 Thupene lai, angeic a kuca ju la götran gaa pë ihakun. Nge ame kowe la götrane kolojë, angeic a kuca ju la itre nyipi imaano lino hna el, a traqa koi 100 kubit la eqean itre ej. 10 Hetrenyi e cili la 20 lao sine feni, me 20 lao trepene kopa hna kuj. Nge ame la itre nyine jel me itre otru ne la itre sine feni, ke hna kuca hnei sileva. 11 Hna kuca tune fe kowe la götrane kolopi, hetrenyi la 100 kubit ne nyipi imaano lino hna el. Nge ame la 20 lao sine feni, memine la 20 lao trepene hna kuj, hna kuca asë hnei kopa. Nge ame la itre nyine jel me itre otru ne la itre sine feni, ke hna kuca hnei sileva. 12 Nge ame kowe la götrane kuë, hetrenyi la 50 kubit ne nyipi imaano lino hna el, me 10 lao sine feni, me 10 lao trepene hna kuj. Nge ame la itre nyine jel me itre otru ne la itre sine feni, ke hna kuca hnei sileva. 13 Nge ame la eisaisane la götrane koië, lo hna fetra hnei jö, tre 50 kubit. 14 Ame ngöne la ketre götran, hetrenyi la 15 kubit ne imaano lino, me köni sine feni, me köni trepene hna kuj. 15 Nge ame kowe la ketre götrane hnë lö kowe la götrane gaa pë ihakun, hetrenyi la 15 kubit ne nyipi imaano lino hna el, me köni sine feni, me köni trepene hna kuj. 16 Nge ame la nöjei maano ka lapa xötreithe la götrane gaa pë ihakun, hna kuca asë hi hnei nyipi lino hna el. 17 Nge ame la itre trepene hna kuj ne la itre sine feni, ke hna kuca hnei kopa. Nge ame la itre nyine jel me itre otru ne la itre sine feni, hna kuca hnei sileva, nge ame la itre hen, hna pelethe hnei sileva. Nge hetre otru hna kuca hnei sileva, thatraqane la nöjei sine feni asë ne la götrane gaa pë ihakun.

18 Nge ame la imaano ne la hnë lö kowe la götrane gaa pë ihakun, hna sil hnei theny ka bulu, me drela ka madra, me theny ka madra palulu, me nyipi lino hna el. Traqa koi 20 kubit la eqean ej, nge 5 kubit la edraiën. Casi hi la edraiën ej memine la itre imaano ne la götrane gaa pë ihakun. 19 Nge ame la 4 lao sine feni me 4 lao trepene hna kuj, ke hna kuca hnei kopa. Nge ame la itre nyine jel me itre otru, hna kuca hnei sileva, nge ame la itre hen, hna pelethe hnei sileva. 20 Nge ame la nöjei nyine saan thatraqane la uma maano, memine la ihag ne la götrane gaa pë ihakun, hna kuca asë hnei kopa.

21 Hane hi la itre ewekë hna huliwan nyine acile la uma maano, ene lo uma maano ne Anyipicin, lo hnei Mose hna upi angetre Levi troa kuca, nge hna elemeken hnei Ithamara nekö i Arona atre huuj. 22 Nge hnei Bezaleli nekö i Uri, nekö i Huro ne la tribu ne Iudra, hna kuca asë la hnei Iehova hna amekötine koi Mose. 23 Ce angeice me Aholiaba, nekö i Ahisamak ne la tribu ne Dana, ketre atre ka atreine kuca la nöjei pengöne huliwa, nge ka sili imaano, me cai theny ka bulu, me drela ka madra, me theny ka madra palulu, me nyipi lino.

24 Ame la gool hna huliwan thatraqane la götrane gaa hmitrötr, tre ceitu hi memine la gool hna hamën nyine huuj ne jumejum: 29 lao talan,* nge 730 lao sekel, thenge la tulu* ne sekel ngöne la götrane gaa hmitrötr. 25 Nge ame la sileva hna traqa fë hnene la itre trahmany hna siji ëjen, tre traqa koi 100 lao talan,* nge 1 775 lao sekel, thenge la tulu ne sekel ngöne la götrane gaa hmitrötr. 26 Nge ame kowe la nöjei trahmanyi hna siji ëjen, ame la sine la ca sekel hna isa hamën, ej a ihmeku memine la sine la ca sekel, thenge la tulu ne sekel ngöne la götrane gaa hmitrötr. Nge ame la itre hna siji ëjen ka 20 lao macatren a tro draië, ala 603 550 angatr.

27 Hna xome la 100 lao talane sileva troa dreuth ahmun, me xupe la itre trepene hna kuj thatraqane la götrane gaa hmitrötr, me itre trepene hna kuj thatraqane la imaano ne thewe hnahag. Ame la 100 lao trepene hna kuj, tre traqa koi 100 lao talan, ca talan kowe la ca trepene hna kuj. 28 Nge angeic a xome ju la 1 775 lao sekel, göi troa kuca la itre nyine jel thatraqane la itre sine feni, me pelethe la itre hen, me isilekeune memine la itre nyine acatren.

29 Nge ame la kopa hna huujën,* tre traqa koi 70 lao talan, nge 2 400 lao sekel. 30 Nge angeic a kuca ju fe la itre trepene hna kuj ne la hnë lö kowe la itat ne icasikeu, memine la ita ne huuj kopa, memine la ikalailai kopa, me nöjei jia ne huliwa ka ce tro memine la ita ne huuj, 31 memine la itre trepene hna kuj ne la ihag ngöne la götrane gaa pë ihakun, memine la itre trepene hna kuj ne la hnë lö kowe la götrane gaa pë ihakun, memine la nöjei nyine saane thatraqane la uma maano, me itre nyine saane thatrqane la ihag ne la götrane gaa pë ihakun.