Deuteronomi
32 “Hnengödrai fe, drenge ju, ke tro ni a ewekë,
Nge epi tro la ihnadro a drenge la itre trengewekë ne la qëng.
2 Tro la ining a trotro tune la mani;
Tro la itre trengewekëng a ut tune la wene lepany,
Tune la hnemuhnem hune la haö
Me tune la kola hlupi la mani hune la hnitr.
3 Ke tro ni a atrune la ëje i Iehova.
Qaja amamane jë la esisitriane la Akötresi së!
4 Nyidrëti la Git, nge ka pexeje la itre huliwa i nyidrë,
Ke ka meköti asë la itre aqane ujë i nyidrë.
Akötresie ka nyipici nyidrë, nge ka thatreine kuca la ka tha meköti kö;
Ka nyipici nyidrë me meköt.
5 Angatre pe la ka kuca la ngazo.
Tha itre nekö i nyidrëti kö angatr, ke hetre engazo i angatr.
Ketre xötr angatr ka qali thiina me ka sis!
6 Hapeu, aqane tro kö eö lai a ujë koi Iehova,
Nöje ka hmo me ka pë inamacan?
Hapeu, tha nyidrëti kö lo Keme i ö ka hnaho eö,
Me xupi ö, me acatrenyi ö?
7 Mekune jë lo itre drai hnapan;
Wangatrune ju la itre macatre ne la itre xötr ekö.
Hnyinge jë kowe la keme i ö, nge tro nyidrëti a sa koi ö;
Me kowe la itre qatr, nge tro angatr a thuemacanyi ö.
8 Ame lo Ka Draië Catr a thawa la edrö ne la itre nöj,
Lo nyidrëti a isa ijene la itre nekö i Adramu,*
Hnei nyidrëti hna ami ifegone la itre nöj
Thenge la etrune la itre nekö i Isaraela.
9 Ke edrö i Iehova la nöje i nyidrë;
Iakobo la edrö i nyidrë.
10 Hnei nyidrëti hna öhnyi angeic ngöne la nöje gaa pë atr
Me ngöne la hnapapa hna lapan hnei itre öni wael ka ho.
Hnei nyidrëti hna ekögölithi* angeic, me kuca hnyawa angeic,
Me thupë angeic, tune la wene dremun alameke i nyidrë.
11 Tune la aeto ka inine la itre nekön troa sesë,
Ka sesë hui nyudren,
Ka seluthe la lue iapen hui nyudren,
Nge ka ati nyudren hune la lue iapen ej,
12 Iehova hmekuje hi la ka eatrongë angeic;*
Pëkö ketre haze ka hane ce tro me angeic.
13 Hnei nyidrëti hna tro sai angeic ngöne la itre gaa draië ne la ihnadro,
Matre hnei angeic hna xeni la itre wen ne la itre hlapa.
Hnei nyidrëti hna thue ime i angeice miel qa ngöne la git
Me oel qa ngöne la git ka ixöj,
14 Me batra ne la itre öni ka tru, me melek ne la itre öni ka co,
Me itre mamoe ka nyipi lolo,*
Me itre mamoe trahmany qa Basana, me itre nani trahmany,
Memine la itre qitr ka sisitria;
Nge hnei ö hna ije la waina hna kuca hnei zane rezë.
15 Ngo ame hë la kola kökötr hnei Iesuruna,* hnei angeic hna kötr me tha idrei.
Kökötre hë eö, cipa ha eö, nge isaisa ha la ngöne i ö.
Matre hnei angeic pë hë hna nuetriji Akötresie, lo ka xupi angeic,
Hnei angeic hna methinëne lo Git ka amele angeic.
16 Hnei angatr hna jel la trengehni i nyidrë hnene la itre haze trenyiwa;
Hnei angatr hna aelëhni nyidrë hnene la itre ewekë ka sis.
17 Hnei angatr hna huuj kowe la itre dremoni, ngo tha koi Akötresieti kö,
Kowe la itre haze hnei angatr hna thatre,
Itre ka nyipi traqa,
Lo itre haze hna thatre hnene lo itre qaaqaa i angatr.
18 Thëthëhmine hë eö lo Git ka xupi ö,
Tha mekune hë eö lo Akötresie ka hnaho eö.
19 Ame hë la Iehova a öhne lai, hnei nyidrëti hna nuetrije la itre nekö i nyidrë trahmanyi me jajiny
Ke hnei angatr hna jel la trengehni i nyidrë.
20 Matre öni nyidrë: ‘Tha tro hmaca kö ni a nyipi angatr;
Tro ni a öhn e cili la ka troa traqa koi angatr.
Ke angatre la xötr ka sis,
Itre nekön ka tha mele nyipici.
21 Hnei angatr hna jel la trengehning* hnene la itre haze ka pë hnënyöngön;
Hnei angatr hna aelëne la hning hnene la itre idrola ka pë menen.
Haawe, tro hë ni a amejëne la zalu thei angatr hnene la nöj ka ketre pengön;
Tro ni a aelëhni angatr hnene la ketre nöj ka hmo.
22 Ke hnene la elëhning hna amelene la ketre eë
Ka troa mel uti hë la itre gaa jui ne la Hua,
Ka troa dreuthe la ihnadro me itre wenen ej
Nge ka troa manithe la itre trepene la itre wetr.
23 Tro ni a nyixan la itre akötre i angatr;
Tro ni a huj asë la itre ane pehnang koi angatr.
24 Tro hë angatr a kucakuca hnei mecijiin
Nge tro ha lepi angatr hnei fiva, me apatrenyi angatr.
Tro ni a upe koi angatr la itre inyö ne la itre öni wael ka ihej
Memine la poizin ne la itre un ka wewë.
25 E kuhu trön, tro la taua a apatrene la itre nekö i angatr;
E koho hnin, troa meci hnei xou
La nekö trahmany me nekö jajiny,
Memine la medreng, memine la qatr ka qia.
26 Maine ju, tro ni a hape: “Tro ni a isaije angatr;
Tro ni a kuca matre tha tro hmaca kö a meku angatr hnene la nöjei atr,”
27 Ngo xounge fe la hna troa qaja hnene la ithupëjia,
Wanga tro jë angatr a mekun menun koilo.
Maine jë, tro angatr a hape: “Hune ju kö la trengecatre së;
Ngo tha qaathei Iehova kö.”
28 Ke angatre la nöj ka pë wangatrehmekun,*
Nge pëkö inamacan thei angatr.
29 Ekölöhini, maine ka inamacane ju angatr! Tro angatr a lapa mekune lai.
Tro angatr a pane mekun la pune koi angatr.
30 Ke hapeu, tro la ala cas a weje tune kaa la ala 1 000?
Nge tro la ala lu a huzune tune kaa la ala 10 000,
E tha hna nuaxöji angatre kö hnene la Giti angatr,
Nge e tha hna nuetriji angatre kö hnei Iehova?
31 Ke tha ceitu kö la giti angatr memine la Giti së,
Nge goi wangatrehmekun fe lai hnene la itre ithupëjia me easë.
32 Ke hnei angatr hna xome la itre vine i angatr qa Sodroma
Me qa ngöne la itre hlapa ne Gomora.
Ka poizin la itre wene rezë i angatr,
Nge ka haitr la itre fini rezë i angatr.
33 Kösë poizin ne un la waina i angatr,
Ka catrehnin tune la poizin ne la asip.*
34 Hapeu, tha hna amë acone kö la ewekë cili ezing,
Me kiin ngöne la hnë ami ewekëng?
35 Qanyinge kö troa të me nyithupen,
Ngöne la ijin hna sa, tro ha ucici la lue ca i angatr,
Ke easenyi hë la drai ne apatrenyi angatr,
Saqe hë la pune koi angatr.’
36 Ke tro kö Iehova a amekötine la nöje i nyidrë,
Tro nyidrëti a utipine la itre hlue i nyidrë
E öhne hë nyidrëti laka, ae trootro hë la trengecatre i angatr,
Nge itre ka tha catre kö, me ka kucakuca pe hi la ka lapa.
37 Matre tro hë nyidrëti a hape: ‘Ekaa pë hë lo itre haze i angatr,
Lo git hnei angatr hna kötre zae kow,
38 Nge ka öni la girisine la itre huuje i angatr,*
Me ije la waina ne la itre huuje i angatr?
Loi e tro angatr a cil me xatua epun.
Loi e tro angatr a nyi hnë zae i epun.
39 Enehila, atre jë laka, eni hi nge pë ju hë,
Pëkö xaa haze, ngo eni hmekuje hi.
Eni la atre ihumuth, nge eni la atre iamele.
Eni la ka eatrën, nge eni la ka ameun,
Nge pëkö ka atreine thapa la ketre qa ngöne la imeng.
40 Ke eni a li ime draië kowe la hnengödrai,
Me sisinyi ka hape: “Maine nyipici laka, ka epine palua ni,”
41 Maine tro ni a xöle la tauang ka melemel
Me hnëkëne la imeng matre eatrëne la iameköti,
Tro hë ni a të kowe la itre ithupëjiang
Me nyithupen kowe la itre ka methinë ni.
42 Tro ni a tra imene la itre ane pehnang hnei madra,
Lo madra ne la itre hna humuth, me hna kötre fë,
Nge tro la tauang a öni hatrën,
La he ne la itre tan ne la ithupëjia.’
43 Nöjei nöje fe, ce madrine jë memine la nöje i nyidrë,
Ke tro nyidrëti a të la madra ne la itre hlue i nyidrë,
Tro nyidrëti a nyithupen kowe la itre ithupëjia me nyidrë
Me ahmitrötrën la zi ne la nöje i nyidrë.”
44 Ame hnei Mose hna ce tro me Osea* nekö i Nuna, troa e gufan la itre trengewekë ne la nyima celë kowe la nöj. 45 Matre ame hë la Mose a ase qaja asë la itre trengewekë celë kowe la angetre Isaraela, 46 öni angeice jë hi: “Wangatrune ju la nöjei trengewekë hnenge hna hamën nyine hmekë epun ngöne la drai celë, matre tro epuni a upe la itre nekö i epun troa trongëne la itre trengewekë ne la Wathebo celë. 47 Ke tha itre trengewekë kö lai ka pë alien. Emele i epuni hi lai, nge jëne la itre trengewekë cili, ijiji epun troa mel aqeany ngöne la nöj hnei epuni hna troa thapa, thupene la epuni a ase sasaithe la Ioridrano.”
48 Ngöne ju kö la drai cili, öni Iehova koi Mose: 49 “Elë jë kowe la wetre Nebo ngöne la itre wetr e Abarima, ngöne la nöje Moaba hmekune Ieriko, nge goeëne jë la nöje Kanana hnenge hna hamën kowe la angetre Isaraela. 50 Thupene lai, tro hë eö a mec hune la wetr hnei ö hna elën, nge tro ha acasi ö memine la nöje i ö,* tui Arona mama i ö ka mec hune la wetre Hora, nge hna acasin memine la nöje i angeic, 51 ke tha hnei epone kö hna mele nyipici koi ni qëmekene la angetre Isaraela, ngöne la itre tim ne Meriba e Kadesi, ngöne la hnapapa Zin: tha hnei epone kö hna ahmitrötrë ni qëmekene la nöje Isaraela. 52 Tro pe hi ö a goeëne la nöje qa gaa nany. Ngo tha tro kö eö a hane lö kowe la nöj hnenge hna hamën kowe la angetre Isaraela.”