Iobu
14 “Ame la atr hna hnahon hnei föe,
Ke xalaithe hi la itre drai i angeic, nge atraqatr la itre itupath* i angeic.
2 Angeic a fetra tune la engen, ame hna fitre* pi;
Nge angeic a kötr tune la ketre iahnu me patr.
3 Eje hi, hnei nyipëti hna goeë tiline la atr,
Me xomi angeic* troa isenyine me nyipë.
4 Ngo drei la ka atreine hnahon la ka pui loi qa ngöne la ka pui ngazo?
Pëkö ca atr!
5 Maine hna sa la itre drai angeic,
Haawe, thei nyipëti hi la etrune la itre treu i angeic;
Eje hi, hnei nyipëti hna acili ifego i angeic, nge thatreine kö angeic sasaith ej.
6 Haawe, the goeë angeic hmaca kö matre pane mano pi angeic,
Uti hë la angeic a afenesin la drai, tune la ketre ka huliwa.
7 Ke hetre mejiune fe kowe la sinöe.
Maine tro lai a sa, ke tro hmaca kö ej a xöl,
Nge tro la itre zin ej a kökötre draië.
8 Ngo maine ka he ekö hë la itre iwaan ej e kuhu hnadro
Nge meci hë la tidrön ej ngöne la dro,
9 Tro hmaca kö ej a xöl e hetre tim;
Nge troa cia la itre picin ej tune la sinöe hna hnyipi traan.
10 Ngo maine tro la atr a mec, angeice hi a meköl, nge pëkö hnei angeic hna atreine kuca;
Nge maine tha mano hë angeic, angeice ekaa?
11 Kola patre la tim qa kuhu hnagejë,
Nge kola uti me qaqacile la hneopegejë.
12 Ketre tune fe la atr, angeic a meköl nge tha tro hmaca kö angeic a mejë.
E cile huti pala kö la hnengödrai, tha tro kö angeic a hlë,
Nge tha tro kö a ahlë angeic qa hna meköl.
13 Ekölöhini, maine hnei nyipëti ju hna juetrë ni ngöne la Hua,*
Me azaenyi ni uti hë la troa patre la elëhni nyipë,
Ekölöhini, maine hnei nyipëti ju hna sa drai matre meku ni!
14 Nge maine meci hë la atr, hapeu, tro kö angeic a mele hmaca?
Ngöne la itre drai ne thahluë ni
Tro ni a treqene la ijine iahlë.
15 Tro nyipëti a hë, nge tro ni a sa koi nyipë.
Ke tru la aja* i nyipëti troa öhne hmaca la huliwa ne la lue ime i nyipë.
16 Ngo enehila, nyipëti pala kö a e la itre hnenge hna feke ca;
Nyipëti hi a alamekëne la itre triang.
17 Hna amë la ngazong ngöne la ketre watreng hna oth,
Nge hnei nyipëti hna pelethe hnyawane la itre triang tune la kola afedren.
18 Tune la ketre wetr ka kei me patr
Me tune la ketre git hna fej qa ngöne la göhnen,
19 Me tune la kola xuje hnei tim la itre etë
Me tune la kola sine la dro hnei gejë,
Celë hi aqane apatrene nyipëti la mejiunene la atr.
20 Tha mano kö nyipëti thaipië angeic uti hë la angeic a patre palua;
Nge nyipëti a saze la qëmeke i angeic me upi angeice hmaca.
21 Hna atrune la itre nekö i angeic, ngo thatre pe angeic;
Hna aconyi angatr, ngo tha wangatrehmekune fe angeic.
22 Angeic a drenge la akötr, ke hetre ngönetrei i angeic;
Nge angeic a treije latresi ngöne la ijine mele pala kö angeic.”