Isaia
56 Hane hi la hna qaja hnei Iehova:
“Isigöline jë la meköt, nge kuca jë la ka meköt,
Ke easenyi hë tro ni a traqa fë la iamele*
Nge tro ha mama la meköting.
2 Manathithi la atre kuca lai
Memine la nekö i atr ka isin troa eatrëne lai,
Memine la atre nyipine la sabath me metrötrëne la drai cili
Memine la atre xomehnöth la nöjei huliwa ka ngazo.
3 Tha tro kö la trenyiwa ka tro koi Iehova a qaja ka hape:
‘Atre hi ni laka, tro Iehova a helë ni qa ngöne la nöje i nyidrë.’
Nge tha tro kö la eunuka a qaja ka hape: ‘Goeën, eni la ketre sinöe ka qaqacil.’”
4 Ke hane hi la hna qaja hnei Iehova: “Ame la itre eunuka ka metrötrëne la itre sabathing, me iëne troa kuca la ajang, nge ka lapa catr ngöne la isisinyikeung:
5 “Tro ni a hnëkëne la ketre göhnë koi angatr ngöne la umang, nge tro pala hi ni a mekune la itre ëje i angatr,
Ketre ewekë ka sisitria kö hune la itre nekönatr trahmanyi me jajiny.
Tro ni a hamë angatr la ketre ëje ka epine palua,
Ketre ëje ka tha tro kö a patr.
6 Ame la itre trenyiwa ka traqa troa nyihlue i Iehova,
Me hnime la ëje i Iehova
Me nyihlue i nyidrë,
Me itre ka metrötrëne la sabath, nge tha ka angazone kö
Nge ka lapa catr ngöne la isisinyikeung,
7 Tro ni a xomi angatr kowe la wetreng ka hmitrötr
Nge tro ni a atiqanyi angatr hnei madrin hnine la uma ne thithing.
Tro ni a kapa la itre huuj ne dreuth asë i angatr, memine la itre huuje i angatr ngöne la ita ne huujeng.
Ke tro ha hëne la umang, uma ne thith thatraqane la nöjei nöj asë.”
8 Hane hi la hna qaja hnei Iehova, Joxu Ka Sisitria, atre icasikeune la itre hna isa ijene qa Isaraela:
“Ame la itre hna icasikeune hë, tro hmaca kö ni a theng la itre xan koi angatr.”
9 Trohemi ma xen, epuni asë itre öni wael ngöne la itre hlapa,
Me epuni asë itre öni wael ne hnitr.
10 Itre timeke la itretre thup; pëkö hnei angatr hna öhn.
Ceitu i angatr asë me itre kuli ka hum, nge ka thatreine ho.
Angatr a simano me saaju; angatr a pi meköl.
11 Ceitu i angatr me itre kuli ka pi öni;
Tha ka hane kö angatre mej.
Angatr la itretre thupë mamoe ka pë trotrohnin.
Angatr a xötrën la isa gojenyi angatr;
Angatr asë a isa qenatrekënö me thele mani me hape:
12 “Trohemi! Tro ni a tro troa xomi waina,
Nge tro sa ce iji kahaitr uti hë la tro sa hmo.
Nge ame elany, tro ha tun enehila, nge ka loi hmaca ju kö la!”