Itre Edromë
27 The pi mama fë kö la hnei ö hna troa kuca elany,
Ke thatre kö eö la ka troa traqa.*
2 Tha qanyine kö la që i ö troa selë eö, ngo qanyine la që i ketre;*
Tha ukeineqë i ö kö, ngo ukeineqë i itre xan.*
3 Ka hace la etë, nge the qaja pala ha la ngöni,
Ngo hace catre kö la troa xomihnine la hmo.
4 Ka iaxösisi la elëhni, nge ceitune hi la wesitr memine la di ka apatren asë,
Ngo drei la ka atreine cil kowe la zalu?
5 Ka loi ju kö la troa qaja mekötin, hune la troa juetrën la ihnim.
6 Ka loi ju kö la itre trengewekë ka akötr qaathene la sinee ka mele nyipici,
Hune la itre hatrene ihnim ne la ithupëjia.*
7 Ame la atr ka mej, ke xele* kö angeic la miel ka neni,
Ngo ame kowe la atr ka mecijiin, ke goi hnyapa fe la ewekë ka haitr.
8 Tune la waco ka sesë ananyine* la trengene i angeic
Celë hi pengöne la atr ka tro ananyine la hnalapa i angeic.
9 Kola amadrinëne la hni hnei oel me ka pui loi;
Ketre tune fe la imelekeu hna nyiqaane hnene la hna hamë eamo ka nyipici.
10 The nuetrije kö la sinee i ö memine la sinee ne la keme i ö,
Nge the lö kö kowe la hnalapa ne la trejin me eö ngöne la eö a jol;
Loi ju kö la atre lapa easenyi ö, hune la trejin ka lapa gaa nany.
11 Neköng, huliwa inamacane pi, nge amadrinëne jë la hning,
Matre tro ni a atreine sa kowe la atre cile koi ni.
12 Ame la atr ka hmek, angeic a öhne la jol me zae,
Ngo ame la atr ka majemin kapa asë la hna qaja, ke angeice kö a tro me xeni pun.
13 Maine hnene la ketre atr hna sisiny troa të la gufa ne la trenyiwa, ke xome jë la iheetre i angeic;
Maine angeic a kuca lai kowe la föe trenyiwa,* xome pi la hatrene ti gufa thei angeic.
14 Maine tro la ketre atr a sue e hmahmakany, matre amanathithine la trejin me angeic,
Ke tro la atre cili a goeëne lai, kösë kola ieji.
15 Ame la föe ka iwesitrë lapaa,* ke ceitu me hune uma ka xölaxöla lapaa e ijine mani.
16 Ame la atr ka atreine xom aconyi eahlo, ke ka atreine xom acon la eny
Me ea la oel ngöne la ime maca i angeic.
17 Tune la kola xöle la fao hnei fao,
Celë hi pengöne la atr ka xatuane la sinee i angeic troa maca trootro.*
18 Ame la atre nyidrawane la iwacua, ke tro hë angeic a xeni wen,
Nge ame la atr ka kuca hnyawane la maseta i angeic, ke tro ha atrunyi angeic.
19 Tune la kola mama la iahnu ngöne la tim,
Ketre tun, kola mama la hni ne la atr thene la hni i ketre.
20 Tha ka hane kö mej la Hua memine la hnë iapatreny,*
Ketre tune fe la luemeke ne la atr.
21 Troa ahmune la sileva me gool ngöne la eë matre huletrij la itre engazon,
Ketre tun, kola mama la elolone la ketre atr qa ngöne la hna qaja aloinyi angeic.*
22 Ngacama tro eö a tranetran la hmo
Tune la eö a tranetran la itre wene feja,
Ngo tro pala hi angeice lai a huliwa menu.
23 Loi e tro eö a atrepengöne hnyawa la itre öni i ö.
Thupëne hnyawa* ju la itre mamoe i ö,
24 Ke tha ka cile huti kö la trengamo,
Ketre tun, tha hna ihamënekeune kö la korona kowe la nöjei xötre atr.
25 Kola fitre la ihaö, nge kola fetra la haö ka hnyipixe,
Nge kola hleme la itre hnitr ne la itre wetr.
26 Hetre nyine tro eö a heetrën, jëne la itre neköi mamoe trahmany,
Nge hetre nyine tro eö a itö hlapa, jëne la itre nani trahmany.
27 Nge tro ha ijij la meleke i nani nyine ithua i ö,
Me fami i ö, me itre hlue i ö jajiny.