Ieremia

27 Ame la kola nyiqaane musi hnei Iehoiakima* nekö i Iosea, joxu ne Iudra, hnei Iehova hna ithanata koi Ieremia, me hape: 2 “Hane hi la hnei Iehova hna qaja koi ni: ‘Kuca jë la itre otretre me itre nyine isilekeun, nge atë ju hune la nyinawa i ö. 3 Thupene lai, iupi fë pi kowe la itre joxu ne Edroma, me Moaba, me Amona, me Turo, me Zidona. Iupi fë pi jëne lo itre ka traqa fë maca koi Zedekia joxu e Ierusalema. 4 Sipo angatre jë troa tro fë la maca celë kowe la itre joxu i angatr:

“‘“Hane hi la hna qaja hnei Iehova joxu ne la itre trongene isi e hnengödrai, Akötresi Isaraela. Hane hi la hnei epuni hna troa qaja kowe la itre joxu i epun: 5 ‘Eni la ka xupe la ihnadro, me itre atr, me itre öni wael e celë fen, hnene la meneng atraqatr me imeng ka catr;* nge hnenge hna hamën kowe la hnenge hna ajan.* 6 Enehila, ase hë ni hamën la itre nöje cili koi Nebukaneza hlueng, lo joxu ne Babulona. Nge goi hamëne fe ni la itre öni wael matre troa nyi hlue i angeic. 7 Tro la itre nöj asë a nyihlue i angeic, me nekö i angeic, me api i angeic, uti hë la troa musinëne la nöje i angeic hnei ketre. Nge tro pë hë angeic a nyihluene la itre nöj ka nyimutre, me itre joxu ka tru.’

8 “‘“‘Ngo maine tro la ketre nöj maine ketre baselaia a xele ma nyihlue i Nebukaneza joxu ne Babulona, eje hi, maine xele kö angatr ma atë la nyine isilekeun hune la nyinawa i angatr, tro hë ni a ameköti angatr hnene la isi,* me jiin, me itre meci ka ixötrekeu,*’ öni Iehova, ‘uti hë la tro ni a humuthi angatr jëne la iwanakoime i Nebukaneza.’

9 “‘“‘Celë hi matre, the drenge kö la itre perofeta i epun, me itre trene haze, me itre ka pu, me itre trene iöni, me itre ka kuci haze, la angatr a qaja ka hape, tha tro kö epuni a nyihluene la joxu ne Babulona. 10 Ke itre trengathoi la hnei angatre hna perofetan. Nge maine tro epuni a drei angatr, tro ha xom ananyi epun qa ngöne la nöje i epun, nge tro ni a aisaije epun, me apatrenyi epun.

11 “‘“‘Ngo ame kö la nöj ka kapa la nyine isilekeun ne la joxu ne Babulona me nyihlue i angeic, tro hë ni a aijijë angeic troa lapa* ngöne la nöje i angeic, me eëny, me mel e cili,’ öni Iehova.”’”

12 Celë fe hi la hnenge hna qaja koi Zedekia joxu ne Iudra, öning: “Atë jë hune la nyinawa i epun la nyine isilekeun ne la joxu ne Babulona, nge nyihlue i angeice jë memine la nöje i angeic, nge tro hë epuni a mel. 13 Hnauëne pena ha la tro eö me nöje i ö a mec, pine la isi,* me jiin, me meci ka ixötrekeu? Eje hi, tune lo hna qaja hnei Iehova, celë hi ka troa traqa kowe la nöj ka tha hane kö nyihluene la joxu ne Babulona. 14 Haawe, the drenge kö la itre perofeta ka qaja ka hape, tha tro kö epuni a nyihluene la joxu ne Babulona, ke itre trengathoi lai.

15 “‘Ke tha eni kö la ka upi angatr,’ öni Iehova, ‘itre trengathoi la hnei angatr hna perofetan ngöne la ëjeng. Nge maine tro epuni a drei angatr, tro hë ni a aisaije epun, me apatrenyi epun me itre ka perofetane lai.’”

16 Nge öning kowe la itre atre huuj me kowe la ka ala nyim: “Hane hi la hna qaja hnei Iehova: ‘The drenge kö la kola qaja hnene la itre perofeta i epun ka hape: “Tha hmitre kö matre bëeke fë pi qa Babulona la itre jia ne huliwa ne la uma ne hmi i Iehova!” ke itre trengathoi lai. 17 The drei angatre kö. Nyihluene jë pe la joxu ne Babulona, matre mele pi epun. Ke tro pena a apatrene fë nemen la traone celë? 18 Ngo maine nyipici laka, itre nyipi perofeta angatr, nge maca i Iehova la hnei angatr hna tro fë, nga loi e tro angatr a xëwe koi Iehova joxu ne la itre trongene isi e hnengödrai, matre tha tro kö a xom a tro Babulona la itre jia ne huliwa hna amë hnine la uma i Iehova, me ngöne la uma ne la joxu ne Iudra, me e Ierusalema.’

19 “Ke hane hi la hna qaja hnei Iehova joxu ne la itre trongene isi e hnengödrai göne la itre ipoto, me itrapene si atraqatr,* me itre ikatr, me itre jia ne huliwa hna nue pe ngöne la traone cili. 20 Itre ewekë lai hna nue pe hnei Nebukaneza joxu ne Babulona, lo nyidrëti a xomi Iekonia nekö i Iehoiakima, joxu ne Iudra a tro Babulona, memine lo itre he ne nöj ne Iudra me Ierusalema. 21 Eje hi, hane hi la hna qaja hnei Iehova joxu ne la itre trongene isi e hnengödrai, Akötresi Isaraela, göne la itre jia ne huliwa hna amë hnine la uma i Iehova, me ngöne la uma ne la joxu ne Iudra, me e Ierusalema: 22 ‘“Tro ha xome la itre ewekë cili a tro Babulona, nge tro itre ej a lapa e cili uti hë la tro ni a mekune hmaca,” öni Iehova. “Nge e cili, tro hë ni a bëeke fë me amë hmaca itre ej e celë.”’”