Salamo
Qaathei Dravita.
103 Pi tro ni a atrunyi Iehova;
Epi tro la itre ewekë ka eje theng a atrune la ëje i nyidrë ka hmitrötr.
2 Pi tro ni a atrunyi Iehova;
Thatreine kö ni thëthëhmine la nöjei ewekë hnei nyidrëti hna kuca koi ni.
3 Nyidrëti a nue la nöjei ngazo i ö
Me ameune la nöjei akötre i ö asë;
4 Nyidrëti a itöne la mele i ö qa ngöne la hnaop*
Me thaipi eö hnene la ihnimi nyipici i nyidrë me utipine i nyidrë.
5 Nyidrëti a ameji ö o drai asë hnene la itre ewekë ka lolo,
Matre ahnyipixen la itre drai ne thupëtresiji ö, tune la aeto.*
6 Iehova a ujë cememine la meköt me thiina ka meköt
Kowe la nöjei atr hna qanangazon.
7 Hnei nyidrë hna amamane la itre jë i nyidrë koi Mose,
Me itre huliwa i nyidrë kowe la itre nekö i Isaraela.
8 Ka utipin me itrotrohni Iehova,
Ka hmitre troa elëhni, nge ka tru trenge ihnimi nyipici.*
9 Tha ka e lapaane kö nyidrë la itre ngazo së,
Nge tha ka lapa fë trengehni kö uti hë epine palua.
10 Tha nyidrëti kö a ameköti së thenge la itre ngazo së,
Nge tha nyidrëti kö a të koi së thenge la itre tria së.
11 Ke ame la etrune la ihnimi nyipici i nyidrë kowe la itre ka xoue nyidrë,
Ceitu memine la enanyine la hnengödrai me fen.
12 Tune la enanyine la hna fetra me hna lö la jö,
Ketre tune fe, nyidrëti a ananyine qaathe së la itre tria së.
13 Tune la kem a nue la ngazo ne la itre nekö i nyidrë,
Iehova a nue la ngazo ne la itre ka xoue nyidrë.
14 Ke atre hnyawa hi nyidrë la aqane xupi së,
Nge atrehmekune hi nyidrë laka, so ne dro së.
15 Ceitune hi la itre drai ne la atr memine la itre drai ne la haö;
Angeic a eng tune la iengen ne hnitr.
16 Ngo hnahna pi hi la eny, ame hna patre pi,
Kösë tha hna enge ju kö.*
17 Ngo ame la ihnimi nyipici i Iehova, ke ka epine palua*
Kowe la itre ka xoue nyidrë,
Nge ame la meköt i nyidrë, ke tro fe a hane kepe thangan hnene la itre api angatr,
18 Ene la itre ka metrötrëne la isisinyikeu i nyidrë
Me itre ka thel troa drengethenge la itre hnei nyidrëti hna amekötin.
19 Hnei Iehova hna acile hutine la therone i nyidrë e hnengödrai;
Nge nyidrëti la ka mus hune la nöjei ewekë asë.
20 Atrunyi Iehova jë nyipunie, itre angela ka tru trengecatr,
Ka drenge la nine i nyidrë,* me trongëne la trengewekë i nyidrë.
21 Atrunyi Iehova jë nyipunie, itre trongene isi i nyidrë,
Itre hlue i nyidrë, itretre kuca la aja i nyidrë.
22 Atrunyi Iehova jë nyipunie, itre hna xupe hnei nyidrë,
Ngöne la nöjei götran hnei nyidrë hna musi kow.*
Epi tro ni a atrunyi Iehova.