Pane Tus Samuela
24 Matre ame hë la Saulo a bëek qa hna isi me angetre Filisiti, hna canga thuemacanyi nyidrë ka hape, Dravita ngöne la hnapapa e Eni-Gedi.
2 Saulo a iëne jë la 3 000 lao trahmany thene la itre soc ne Isaraela. Nge angatr a tro ju troa thele Dravita me itre sinexöle i angeic, ngöne la itre git, lo hna lapa hnei itre nani wael. 3 Angatr a traqa pi kowe la itre hnë axö mamoe ezine gojeny, nge hna thing hnei traetë xötreith. E cili fe la ketre ngönemenyi, matre Saulo a lö ju troa pane tro agö.* Ngo Dravita me itre sine xöle i angeic a lapa e koië pun, hnine la itre hnaop ne la ngönemenyi. 4 Matre önine la itre atre i Dravita ka hape: “Enehila hi la drai ne Iehova a qaja koi eö ka hape, ‘Goeën! Eni a nue koi ö la ithupëjia me eö, nge kuca jë la mekuna i ö koi angeic.’” Ame hnei Dravita hna mejë jë, me thupa metrötrëne la pune la iheetre i Saulo ka qea nge ka pë imen. 5 Ngo thupene lai, ngazo pi hi la hni* Dravita, ke hnei angeic hna thupa la pune iheetre i Saulo. 6 Öni Dravita jë hi kowe la itre soce i angeic ka hape: “Pi Iehova, thatreine kö tro ni a kuca la ketre ewekë kowe la joxung, ke atre hna iën hnei Iehova. Tha tro pi kö ni a ngazo koi nyidrë, ke atre hna iën hnei Iehova.” 7 Qa ngöne lai, Dravita a sawa* ju la itre soce i angeic, matre tha tro kö angatr a kuca la ketre ewekë koi Saulo. Nge ame Saulo, nyidrëti a tro ju qa hnine la ngönemenyi, me bëeke hmaca.
8 Ame hna lö pi fe Dravita qa hnine lai ngönemenyi, nge angeic a hë Saulo jë me hape: “Joxu!” Nge ame la Saulo a xei hutrö, Dravita a sa iwatingöneca pi me thil. 9 Nge öni angeic koi Saulo ka hape: “Hnauëne la nyipëti a drenge la itre ka qaja menun ka hape, eni a thele troa ngazo koi nyipë? 10 Enehila, öhne hi nyipë laka, hnei Iehova hna nue nyipëti koi ni hnine la ngönemenyi, ngo ame la kola upi ni hnene la ketre atreng troa humuthi nyipë, hnimi nyipëti ju hi ni. Matre öning, ‘Thatreine kö ni troa kuca la ketre ewekë kowe la joxung, ke atre hna iën hnei Iehova.’ 11 Ngo kaka, goeën la iwanakoimeng, eni a ea la pune iheetre i nyipë. Ame lo eni a thupa, maine ju tro hë ni a humuthi nyipë. Ngo tha kuca kö ni. Öhne hi nyipë, tha eni kö a thele troa ngazo koi nyipë, maine icilekeu pena me nyipë. 12 Epi tro Iehova a ameköti nyiso. Qanyi Iehova kö të la aqane ngazo thiina i nyipëti koi ni, ngo ame ni, tha tro kö ni a hane ngazo koi nyipë. 13 Tune lo hna qaja hnene lo trengewekë hnapan: ‘Ngazo a xulu qaathene la itre atr ka ngazo thiina.’ Ngo ame ni, tha tro pi kö ni a hane ngazo koi nyipë. 14 Haawe, joxu ne Isaraela fe, hnauëne la nyipëti a hnëkë trongene isi? Hnauëne la nyipëti a thele ni? Cetunge hi memine la kuli ka meci hë, me neköi ötë! 15 Epi tro Iehova a atre iameköti, me ameköti nyiso. Tro nyidrëti a waipengöne la jol, me isigöli ni, me jelemeköti ni, me amele ni qaathei nyipë.”
16 Matre ame hë la Dravita a ase ithanata, öni Saulo: “Eö la ka ithanata Dravita neköng?” Thupene lai, Saulo a treije catre jë. 17 Nge öni Saulo koi Dravita: “Ka meköti kö eö hung, ke hnei eö hna loi thiina, ngo hnenge pe hna akötrë eö. 18 Nge enehila, mama kö la aqane lolo la thiina i eö koi ni. Tha hnei eö kö hna humuthi ni, ngacama Iehova la ka nue ni koi eö. 19 Ke maine tro ketre a iöhnyi memine la ithupëjia me angeic, tha tro kö angeic a nuamelen. Ngo pine la aqane ujë i eö koi ni, tro Iehova a amanathithi eö. 20 Atre hi ni laka, tro hë eö a joxu, nge fene la musi eö, tro pala kö a cile la baselaia ne Isaraela. 21 Haawe enehila, sisinyi jë koi ni ngöne la ëje i Iehova laka, tha tro kö eö a lep apatrene la itre matrang* e meci pi ni. Nge tha tro kö eö a köletrije la ëjeng qaathene la fami i kaka.” 22 Ame hnei Dravita hna sisinyi koi Saulo, nge Saulo a bëeke jë kowe la hnalapa i nyidrë. Nge Dravita me itre atre i angeic a lö hmaca jë kowe la hnë zae i angatr.