Pane Tus Samuela
26 E thupen, hnene la angetre Zif hna tro koi Saulo e Gibea me hape: “Dravita a zae ngöne la sasala ne Hakila, lo ka qëmeke koi Iesimon.”* 2 Matre Saulo a mejë jë memine la 3 000 lao trahmanyi hna iën e Isaraela, troa thele Dravita ngöne la hnapapa e Zif. 3 Saulo a acile jë la hnë lapa ne la itre soc i angatr hune la sasala ne Hakila, lo ka qëmeke koi Iesimon, ezine la gojeny. Nge Dravita a lapa ngöne la hnapapa. Drenge ju hi Dravita laka, Saulo a thele angeic ngöne la hnapapa. 4 Nge Dravita a upe pi la itre esipio troa wange ka hape, Saulo kö la. 5 Nge e thupen, Dravita a tro ju kowe la hnë lapa ne la itre soc i Saulo. Nge traqa ju hi angeic a öhne la hna meköl hnei Saulo, me Abinera, nekö i Neri, lo tane soce i Saulo. Nge Saulo a meköl nyipine la hnë lapa ne la itre soc, nge itre soc a meköle xötreith. 6 Ame hnei Dravita hna hnyingëne koi Ahimelek qa Heth, me Abisai, nekö i Zeruia lo trejin me Ioaba ka hape: “Drei la ka troa ce tro me eni kowe la hnë lapa ne la itre soc i Saulo?” Sa jë hi Abisai ka hape: “Tro ni a ce tro me eö.” 7 Nge Dravita a lö ju me Abisai kowe la hnë lapa ne la itre soc, nge jidri hë. Traqa ju hi nyidroti a öhnyi Saulo e meköl, nge hna saane la jo i nyidrë ezine la he i nyidrë. Nge Abinera me itre soc a meköl xötreithi Saulo.
8 Öni Abisai jë hi koi Dravita: “Enehila, Akötresie a nue la ithupëjia me eö, matre nue ni pi troa aca saane la jo ngöne la he i nyidrë. Aca tro hi ni a saan, nge ase hë.” 9 Ngo sa jë hi Dravita ka hape: “Drei la ka ijije troa lep la hna iën hnei Iehova me lapa pë engazon?” 10 Nge öni Dravita hmaca: “Eni a qaja hnyawa qëmeke i Iehova, Akötresie ka mel, qanyi Iehova kö lepe la joxu, maine tro pena nyidrë a meci xan, maine tro pena a humuthi nyidrë ngöne la hna isi. 11 Ngo loi ni, thatreine kö ni mekun troa xejë la imeng kowe la hna iën hnei Iehova, ke atraqatre la metrötreng koi Iehova. Ngo tro pe nyiso a xome la jo ezine la he i nyidrë, memine la trengene tim, nge jë fe, nyiso a tro.” 12 Haawe, Dravita a xome pi la jo me trengene tim ezine la he i Saulo, nge nyidroti a tro pi. Pëkö ka öhnyi nyidro, me wangatrehmekunyi nyidro, me hlë, ke hnei Iehova hna kuca matre tro angatr a hmuli zië. 13 Thupene lai, Dravita a tro sasaithe pi la hnathup, me elë hune la sasala, me ananyine la hnë lapa ne la itre soc i Saulo.
14 Nge Dravita a sue pi koi itre soc me Abinera, nekö i Neri. Öni angeic: “Abinera, drei ni hi hnei eö?” Sa jë hi Abinera ka hape: “A drei la ka hëne la joxu?” 15 Sue jë hi Dravita ka hape: “Trahmanyi eö, eje hi? Drei la ka tui eö e Isaraela? Nga hnauëne laka, tha thupëne kö eö la joxu i eö? Hnene la ketre soc hna lö hnine la hnë lapa ne la itre soc i epun troa humuthi nyidrë. 16 Triane hë eö la hnëqa i eö. Nge qëmeke i Iehova Akötresie ka mel, loi e tro eö a mec, ke tha thupëne kö eö la joxu i eö, lo hna iën hnei Iehova. Haawe enehila, goeëne ju xötreithi eö! Ekaa la jo me trengene tim ezine la he i nyidrë?”
17 Ame hnei Saulo hna wangatrehmekune la aqane ithanata i Dravita, matre öni Saulo: “Dravita neköng, aqane ewekë i ö la hnenge hna dreng?” Sa jë hi Dravita ka hape: “Eni hi joxung.” 18 Nge öni Dravita hmaca: “Hnauëne la joxu a wej agö ni? Hnenge hna u, nemene la engazong? 19 Joxung, pane drei ni ju. Maine Iehova la ka uku nyipë troa methinë ni, epi tro nyidrëti a kapa* la itre wene feja tro ni a huujën. Ngo e traqa ju ka hape, itre atr la ka uku nyipë troa methinë ni, loi e tro angatr a hnëjin qëmeke i Iehova, ke angatr a weji ni, matre tha tro hmaca kö ni a cas memine la nöje i Iehova. Kösë angatr a qaja koi ni ka hape, ‘Tro jë a nyihluene la itre xa haze!’ 20 Ngo ame ni, xele ni ma mec ananyi Iehova. Matre joxu ne Isaraela fe, hnauëne la nyipëti a upe la itre soc ka ala nyimu troa thele la neköi ötë, kösë nyipëti a weje la neköi waco e caha hune wetr?”
21 Öni Saulo jë hi: “Ka ngazo la hnenge hna kuca, bëeke jë Dravita neköng. Tha tro hmaca kö ni a ngazo koi eö, ke hnei eö hna hnime la meleng. Ngo eni la ka qenahmo, me kuca la ngazo ka tru.” 22 Sa jë hi Dravita ka hape: “Hane hi la jo i nyipë joxu. Upe pi la ketre thupëtresiji nyipë troa xom. 23 Atre hi ni laka, tro Iehova a nyithupen kowe la atre ka meköt, nge ka mele nyipici. Matre enehila, hnei Iehova hna nue nyipëti koi ni, ngo xele ni ma ngazo kowe la atre hna iën hnei Iehova. 24 Enehila, hnenge hna hnime la mele i nyipë, matre epi tro fe Iehova a hane hnime la meleng. Nge epi tro nyidrëti a thepe ni qa ngöne la nöjei ewekë hna mecin.” 25 Haawe, öni Saulo: “Manathithi hë eö Dravita neköng. Tro eö a kuca la itre ewekë ka tru, nge tro pala hi a tro loi la nöjei huliwa i eö.” Thupene lai, Dravita a tro hmaca pi, nge Saulo a bëeke jë kowe la hnalapa i nyidrë.