Hnaaluene Tus i Samuela
1 Hane hi la ka traqa thupene la hna mec hnei Saulo. Bëeke hë Dravita qa hna ngaa* angetre Amaleka. Matre lue drai hë ne angeic e Zikelag. 2 Ngöne la hnaakönine drai, traqa pi hi la ketre atr qa ngöne la lapa ne soc i Saulo, me iheetr ka zezeny, me ialamek ka si dro. Angeic a sa iwatingöneca pi me thil qëmeke i Dravita.
3 Dravita a hnyinge jë koi angeic ka hape: “Qa i eö kaa?” Öni angeic: “Eni a kötre qa ngöne la lapa i angetre Isaraela.” 4 Öni Dravita jë hi: “Nemene la ka traqa? Pane qaja jë koi ni.” Matre öni angeic: “Hnei itre soc hna kötrene la itre ithupëjia, nge ala nyimu la hna humuth, nge meci fe hë Saulo, me Ionathana nekö i nyidrë.” 5 Ame hnei Dravita hna hnyinge kowe la ka tro fë maca me hape: “Hnei eö hna atre tune kaa ka hape, meci hë Saulo me Ionathana?” 6 Öni angeice jë hi: “Hnenge hna tro hune la Wetre Gileboa, nge öhne ju hi ni la Saulo a hujane la jo i nyidrë. Nge itre ka ti ikatr, me ka ti hos a easenyi catre koi nyidrë. 7 Matre ame hë la nyidrëti a öhnyi ni, nyidrëti a hë ni jë, nge öning: ‘Öö joxu, eni hë lai!’ 8 Nge nyidrëti a hnyinge jë ka hape: ‘Drei eö?’ Nge öning: ‘Atre Amaleka ni.’ 9 Thupene lai, öni nyidrëti koi ni: ‘Alemi jë nge humuthi ni pi, ke mele pala kö ni, ngo thatreine hë ni xomihnine la akötr.’ 10 Matre nyidrëti a kei pi, ke eatre hë nyidrë. Ngo atre hi ni laka, tha ka tro kö nyidrëti a mel, matre eni pë hë a thili ju, me humuthi nyidrë. Nge eni a xome pi la korona hnei nyidrëti hna petrën, memine la otrene ime i nyidrë, me traqa fë koi nyipë joxung.”
11 Ame hnei Dravita hna kuie zezene la itre iheetre i angeic, nge hnene la itre atr ka ce me angeic hna hane tun. 12 Angatr a treije jë me latresi, me tha xen uti hë hej, ke ase hë humuthi Saulo me Ionathana nekö i nyidrë, me itre atrene la nöje i Iehova, angetre Isaraela, hna humuthe hnei taua.
13 Dravita a hnyingëne jë kowe la atre tro fë maca ka hape: “Atre kaa eö?” Sa jë hi angeic ka hape: “Nekö i trenyiwa ni qa Amaleka.” 14 Öni Dravita jë hi: “Hnauëne laka, tha xou i eö kö troa humuthe la atre hna iën hnei Iehova?” 15 Dravita a hëne jë la ketre soce i angeic me hape: “Trohemi, nge humuthi angeice pi.” Nge hnene lai soc hna humuthi angeic. 16 Öni Dravita kowe lai atr: “Zö i eö kö la meci eö, ke hnei eö hna sipu qajaqaja la ngazo i eö, ke öni eö, ‘Hnenge hna humuthe la hna iën hnei Iehova.’”
17 Dravita a sile jë la nyima ne kele wezipo celë koi Saulo, me Ionathana nekö i nyidrë. 18 Nge Dravita a amekötine jë kowe la nöje Iudra troa e gufane la nyima celë. Nge ame la tane la nyima, ke “Tane Pehna,” nge ej ngöne la tus i Iasar:
19 “Patre hë la emingömingö i eö Isaraela, meci hë hune la itre wetr.
Kei hë itre ka catr!
20 The qaja pi kö e Gatha;
The qaja kö ngöne la itre gojeny e Asekelona,
Wanga madrine jë la itre jajiny ne Filisiti,
Wanga sesë jë hnei madrin la itre jajinyi* cili.
21 Itre wetr ne Gileboa fe,
Epi tha uti koi epuni la wene lepany me mani,
Nge epi troa pë wene la itre hlapa i epun nyine huuje koi Akötresie,
Ke hna adrone hui epuni la petr ne la itre atre ka catr,
Pë hmaca kö troa oelëne la petre i Saulo.
22 Tha cile kö la tane pehna i Ionathana,
Qëmekene la madra ne la itre ka mec, me giris ne la itre atre ka catr,
Nge ka hune pala hi la taua i Saulo.
23 Saulo me Ionathana, lue hna hnim me wangatrun lo mele pala kö nyidro,
Tha hna aisa nyidroti kö ngöne la mec.
Nyimenyime kö nyidro hune la itre aeto,
Nge catre kö hune la itre liona.
24 Itre jajiny ne Isaraela fe, treije pi Saulo jë,
Atre heetrë epun hnei iheetr ka madra palulu, me thaipi epun,
Nyidrëti lo ka thaipine la itre iheetr i epun hnei gool.
25 Kei hë la itre ka catr ngöne la isi!
Meci hë Ionathana hune la itre wetr!
26 Tru la latresinge koi eö Ionathana trejin me eni;
Tru la ihniminge koi eö.
Ka sisitria kö la ihnimi eö hune la ihnimi föe.
27 Kei hë la itre ka catr
Xeci hë la itre jiane isi!”