Esodro
24 Nge öni nyidrë koi Mose: “Elë jë koi Iehova, eö me Arona me Nadaba me Abiu, me 70 lao qatr ne Isaraela, nge tro epuni a thil qa gaa nany. 2 Mose hi la ka troa easenyi Iehova, ngo tha itre xane fe kö. Nge tha tro kö la nöj a ce elë me angeic.”
3 Nge hnei Mose hna tro troa qaja kowe la nöj, la nöjei ewekë hna qaja hnei Iehova, me nöjei hna amekötin. Matre hnene la nöj hna ce sa ka hape: “Ame asë hi la hna qaja hnei Iehova, tro huni a kuca.” 4 Ame hnei Mose hna cinyihane la nöjei trengewekë i Iehova, nge hnei angeic hna canga ilë, me acil fene la wetr la ketre ita ne huuj, me 12 lao itra etë ka nyihatrene la 12 lao tribu ne Isaraela. 5 Thupene lai, hnei angeic hna upe la itre thupëtresij ne Isaraela, troa tro fë la itre huuj ne dreuth asë, me huujëne la itre kau nyine huuj ne tingeting koi Iehova. 6 Ame hnei Mose hna xome la sine la madra, me amë ngöne kap. Nge angeic a xome pi la ketre sine la madra, me thathane ngöne la ita ne huuj. 7 Nge hnei angeic hna xome la itusi ne isisinyikeu, me e kowe la nöj. Matre öni angatr: “Ame asë hi la hna qaja hnei Iehova, tro huni a kuca. Nge tro huni a idrei.” 8 Ame hnei Mose hna xome la madra, me thathane kowe la nöj me hape: “Celë hi madra ne isisinyikeu hnei Iehova hna kuca me epun, thenge lo itre trengewekë hnei epuni hna dreng.”
9 Hnei Mose me Arona, me Nadaba me Abiu, me 70 lao qatr ne Isaraela hna ce elë. 10 Ame hnei angatr hna öhne la Akötresi Isaraela. Nge ame fene la lue ca i nyidrë, kösë hna haö etën safairo, nge ej a wië tune la hnengödrai. 11 Ngo pëkö ewekë ka ngazo hnei nyidrëti hna kuca kowe la itre atre ka tru ne Isaraela. Nge hnei angatr hna meköle goeën la nyipi Akötresie, me xeni me ij.
12 Iehova a qaja ju koi Mose ka hape: “Elë jë koi ni hune la wetr, nge lapa ju e cili. Tro ni a hamë eö la itre wathebo hna cinyihan hune la itre sine etë, nge tro hë ni a cinyihan hun itre ej la itre wathebo, me itre hna amekötin nyine inine la nöj.” 13 Ame hnei Mose hna tro, me Iosua sine huliwa i angeic. Nge Mose a elë jë kowe la wetr ne la nyipi Akötresie. 14 Nge öni angeice kowe la itre qatr ka hape: “Treqe nyio ju e celë, uti hë la tro hmaca nyio a bëeke koi epun. Lapa ju pë hë epuni e ce me Arona me Huro, nge e traqa jë la ketre jol, wai nyidroti ju.” 15 Ame hnei Mose hna elëne la wetr, nge kola hakuth la wetr hnene la iaw.
16 Hnene la lolo i Iehova hna lapane la wetre Sinai, nge hnene la iaw hna lapan ej koi 6 lao drai. Matre ngöne la hna 7 ne drai, hnei nyidrëti hna hë Mose qa ngöne la iaw. 17 Nge ame kowe la angetre Isaraela ka goeëne lai, kösë ame la lolo i Iehova, ke ceitu memine la ketre eë ka catrehnine hune la wetr. 18 Nge hnei Mose hna lö hnine la iaw, me elëne la wetr. Nge angeic a pane lapa ju e cili koi 40 lao drai, me 40 lao jidr.