Esodro
34 Thupene lai, öni Iehova koi Mose ka hape: “Sa pi la lue sine etë, tune lo lue sine etë hnapan. Nge tro ni a cinyanyin hune la lue sine etë celë, lo hna cinyianyin ngöne lo lue sine etë hnapan, lo hnei eö hna thë. 2 Ame e hmakany, hnëkë jë eö, ke e hmakany, tro eö a elë kowe la wetre Sinai me cile qëmekeng, e cili hune la wetr. 3 Ngo pëkö ka troa ce elë me eö, nge pëkö atr hna troa öhn ngöne la ketre götrane la wetr. Nge qëmekene lai wetr, tha tro kö la itre öni a xeni trootro.”
4 Ame hnei Mose hna sa la lue sine etë, tune lo lue sine etë hnapan, me canga ilë e sine hmakany, me elë kowe la wetre Sinai, tune lo hna amekötin hnei Iehova. Nge Mose a xometrongëne jë la lue sine etë. 5 Nge Iehova a uti pi ngöne la iaw, me ce cil me angeic, me qaja la ëje i Iehova. 6 Iehova a tro qëmeke i angeic me qaja amamane ka hape: “Iehova, Iehova Akötresie ka utipin nge ka itrotrohni, nge ka hmitre troa elëhni, nge ka tru trenge ihnimi nyipici,* me nyipici.* 7 Nyidrëti a amamane la ihnimi nyipici i nyidrë kowe la itre thauzan,* me nue la itre ngazo, me itre tria me itre ngazo ka tru. Ngo tro kö nyidrëti a të kowe la itre ka kuca la ngazo, me të la ngazo ne la itre kem hune la itre nekön, me itre api hmunë, me hune la hnaakönine xötr atr, memine la hna 4 ne xötr.”
8 Ame hnei Mose hna thili ju e kuhu hnadro me sa iwatingöneca. 9 Thupene lai öni angeic: “Iehova fe, maine nyipici laka, nyipëti a kepe ni, Iehova, eni a sipo nyipë troa tro nyipi hun, ngacama nöje ka catre që* hun. Nge epi nue pi la itre tria hun, me itre ngazo hun. Nge epi tro huni a itre ewekë i nyipë.” 10 Matre öni nyidrë ka hape: “Eni a isisinyikeu qëmekene la nöje i eö laka, tro ni a kuca la itre huliwa nyine hain hna tha kuca pala kö* e cailo fen, me ngöne la nöjei nöj. Nge ame la nöjei nöj hnei epuni hna lapan, tro angatr a öhne la itre huliwa i Iehova, ke nyine hain* la hnenge hna kuca koi epun.
11 “Drenge hnyawa ju la hnenge hna amekötine koi eö enehila. Tro ni a helën qëmeke i eö la angetre Amora, me Kanana, me Heth, me Perizi, me Hivi, me Iebusi. 12 Thupëne kö, ke isisinyikeu jë eö memine la itre nöj hnei eö hna troa tro kow, wanga tra thethi eö jë. 13 Ngo qa i epuni troa thëtrije la itre ita ne huuj i angatr, me thëtrije la itre itra etë ka hmitrötr i angatr, me satrije la itre sine feni ka hmitrötr* i angatr. 14 The tro kö eö a thil qëmekene la ketre haze, ke ame Iehova, nyidrëti a ajane tro* hmekuje hi* a hnimi nyidrë, ke eje hi, Akötresieti a ajane tro hmekuje hi* a hnimi nyidrë. 15 Wange kö, ke isisinyikeu jë eö me itre atrene la nöj, ke ame la angatr a kuca la itre huliwa ka sis* me itre haze i angatr, me huuj kowe la itre haze i angatr, tro lai a hetre ka hë eö, nge tro hë eö lai a xeni la huuje i angeic. 16 Nge tro hë eö a xome la itre nekö i angatre jajiny, kowe la itre nekö i eö trahmany. Nge tro la itre nekö i angatre jajiny a kuca la itre huliwa ka sis me itre haze i angatr, me hule la itre nekö i eö trahmany troa kuca la itre huliwa ka sis me itre haze i angatr.
17 “The tro kö eö a dreu fao nyine kuci haze.
18 “Qa i eö troa feetëne la itre Falawa Ka Pë Levenen, nge tro eö a xeni la falawa ka pë levenen, tune lo hnenge hna amekötine koi eö. Tro eö a kuca lai koi 7 lao drai, hmekune la drai hna sa ngöne la treu Abiba, ke hnei eö hna tro qa Aigupito ngöne la treu Abiba.*
19 “Thatraqai ni la itre pane* nekönatr asë, me itre pane neköi öni trahmanyi asë, nge tune fe la itre öni eö trahmany hna pane hnahon, qaane la itre kau uti hë la itre mamoe. 20 Tro eö a nyihnane la pane neköne la boliko hnei ca mamoe, nge e tha kuca kö eö, tro hë eö a hutra xecie la nyinawa ne la boliko. Qa i eö troa itöne hmaca la itre pane nekö i eö trahmany. Pëkö ka troa traqa koi ni nge pëkö hna xom.
21 “Tro eö a huliwa koi 6 lao drai, ngo ngöne la hna 7 ne drai, tro eö a mano. Nge ame fe ngöne la ijine uja dro me menu, tro pala hi eö a mano* ngöne la hna 7 ne drai.
22 “Tro eö a xome la itre qitr hna pane menuën, nyine feetëne la Feet Ne La Itre Wiik. Nge e pune macatre, tro eö a feetëne la Feet Ne Menuë Hlapa.*
23 “Tro la nöjei trahmany a akönia mama ngöne la macatre kowe la nyipi Joxu, ene Iehova Akötresi Isaraela. 24 Ke tro ni a helëne la itre nöje qëmeke i eö, nge tro ni a atrune la zi eö, nge pëkö ka troa piine la zi eö, ngöne la köni ijine tro eö a elë koi Iehova Akötresi eö ngöne la macatre.
25 “The tro kö eö a ithuenyiköne la madra nyine huuje koi ni, me ketre ewekë hna nyi levenen. Nge tha tro kö a amë la huuj ne la Paseka, uti hë e hmakany.
26 “Tro eö a traqa fë kowe la uma i Iehova Akötresi eö, la itre pane wen ka sisitria ne la zi eö.
“The tro kö eö a atrone la neköi nani ngöne la zane thi ne la thine i nyën.”
27 Nge öni Iehova hmaca koi Mose ka hape: “Qa i eö troa cinyihane la itre trengewekë celë, ke jëne la itre trengewekë celë, eni a isisinyikeu me eö me Isaraela.” 28 Nge angeic a lapa ju e cili me Iehova koi 40 lao drai me 40 lao jidr. Tha hnei angeice kö hna xeni falawa me iji tim. Hnei angeice hna cinyihan hune la lue sine etë, lo itre trengewekë ne la isisinyikeu, ene lo 10 lao Wathebo.*
29 Thupene lai, Mose a uti pi qa hune la wetre Sinai, nge angeic a xometrongëne la lue sin etë ne Anyipicin. Nge ame la angeic a uti qa hune la wetr, thatre kö Mose laka, ka melemele la iqëmeke i angeic, ke hnei angeic hna ithanata me Akötresie. 30 Matre ame hë la Arona me angetre Isaraela asë a öhnyi Mose, öhne ju hi angatr laka, ka melemele la iqëmeke i angeic, matre xou i angatre ju hi troa easenyi angeic.
31 Ngo Mose a hë angatre jë, matre hnei Arona me itre he ne nöj hna tro koi Mose, nge hnei angeic hna ithanata me angatr. 32 Thupene lai, hnene la angetre Isaraela asë hna easenyi angeic. Nge angeic a qaja ju koi angatre la nöjei wathebo hnei Iehova hna ahnithe koi angeic, hune la wetre Sinai. 33 Thupene la hnei Mose hna ithanata me angatr, hnei angeic hna juetrën la iqëmeke i angeic hnene la ketre sine imaano. 34 Ngo ame la Mose a lö koi Iehova troa ithanata me nyidrë, angeic a hule pi lai sine imaano, uti hë la angeic a tro hmaca. Thupene lai, angeic a tro jë koi angetre Isaraela, me qaja koi angatre la itre hna amekötin hna kapa hnei angeic. 35 Nge öhne hi angetre Isaraela laka, ka melemele la iqëmeke i Mose. Thupene lai, hnei Mose hna juetrëne hmaca la ialameke i angeic, uti hë la ijine angeic a lö hmaca troa ithanata me Akötresie.*