Numera
12 Ngo hnei Miriama me Arona hna nyiqaane qeje Mose pine la föe ne Aithiope, lo hnei angeic hna faipoipo memin, ke hnei angeic hna xomi föe e Aithiope. 2 Öni nyidro jë hi: “Nyipici kö ka hape, hnei Iehova hi hna ithanata jëne Mose? Tha hnei nyidrëti fe kö hna hane ithanata jëne nyiso?” Nge drenge hi Iehova. 3 Ame pe, ka ipië catre kö Mose hune la nöjei atr* asë e celë fen.
4 Ame hnei Iehova hna qaja koi Mose, me Arona, me Miriama ka hape: “Lö pi epun ala kön kowe la itat ne icasikeu.” Ame hnei angatr hna ce lö pi. 5 Matre hnei Iehova hna ut hnine la iaw ka cile meköt, me cil ngöne la hnë lö ne la itat, me hë Arona me Miriama. Ame hnei nyidroti hna easeny. 6 Öni nyidrëti jë hi: “Pane drenge ju la trengewekëng. Maine hetre perofeta i Iehova nyipi epun, tro ni a mama koi angeic jëne la hna meköle goeën, nge tro ni a ithanata koi angeic jëne la pu. 7 Ngo tha celë kö pengö i Mose hlueng! Hna ahnith asë la nöjeng koi angeic.* 8 Eni a ithanata meköt koi angeic, ngo tha jëne xötra kö; nge öhne hi angeic la Iehova a mama koi angeic. Nga hnauëne laka, tha xou i epone kö troa qeje Mose hlueng?”
9 Ame hna elë la trengehni i Iehova koi nyidro, matre nyidrëti a trotriji nyidroti pi. 10 Ame hë la kola patr la iaw qa hune la itat, kolo fe hi a lepi Miriama hnei lepera ka wië tune la kiona! Nge ame la Arona a thaujë koi angeic, ke öhne ju hi Arona laka, lepera ha angeic. 11 Canga öni Arona jë hi koi Mose: “Ekölöhini joxung! Epi the të kö koi nyio la ngazo celë! Hnei nyio hna ujë ceitu me hmo. 12 Epi the nue angeice kö tune lai, tune la nekönatr ka mec la kola hnahon laka, ase hë xen la ngönetrei i nyën!” 13 Ame hnei Mose hna sue draië koi Iehova me hape: “Akötresieti fe, eni a sipo nyipë, amele angeice jë! Epi amele angeice jë!”
14 Matre sa jë hi Iehova koi Mose ka hape: “Maine tro la keme i angeic a hnyijuëne la iqëmeke i angeic, tha tro jë kö angeice lai a hmahma koi 7 lao drai? Loi e troa pane ami angeice cas tröne la lapa koi 7 lao drai. Thupene lai, ijiji angeice hmaca troa bëek.” 15 Ame hna ami Miriama cas tröne la lapa koi 7 lao drai, nge hnene la nöj hna lapa e cili, uti hmaca la angeic a bëek. 16 Thupene lai, hnene la nöj hna tro qa Hazeroth, me lapa ngöne la hnapapa ne Parana.