Esodro
18 Ame hnei Iethero, atre huuj ne Midiana, nge hmihmi* Mose, hna drenge la hnei Akötresie hna kuca koi Mose, me Isaraela nöje i nyidrë, la aqane thepe Isaraela hnei Iehova qa Aigupito. 2 Hnei Iethero, hmihmi Mose, hna kepe Zipora föi Mose, lo kola upi Zipora koi nyidrë, 3 me lue nekö i angeice trahmany. Geresoma* la ketre, ke öni Mose ka hape, “trenyiwa ni ngöne la nöje trenyiwa.” 4 Nge Eliezera* la ketre, ke öni Mose ka hape, “Akötresi kaka la ixatua koi ni, nyidrë la atre thepe ni qa ngöne la taua i Farao.”
5 Ame hnei Iethero, hmihmi Mose, hna tro koi Mose ngöne la hnapapa, hmekune la wetr ne la nyipi Akötresie, lo hnei angeic hna acili itat. Ce Iethero me föi Mose, me lue nekö i angeic. 6 Nge hnei nyidrëti hna iupe troa qaja koi Mose ka hape: “Eni Iethero hmihmi eö, eni a traqa koi eö memine la föi eö, me lue nekö i angeic.” 7 Nge hnei Mose hna canga tro kowe la hmihmi angeic, me thil qëmeke i nyidrë, me dremi nyidrë. Ase jë hi nyidro hnyingënekeun la isa pengöi nyidro, nyidroti a ce lö jë hnine la itat.
8 Nge hnei Mose hna qejepengöne kowe la hmihmi angeic la nöjei ewekë hnei Iehova hna kuca koi Farao, me kowe la nöje Aigupito, pi angetre Isaraela. Nge hnei angeic hna qaja asë la nöjei jol hnei angatr hna ixelë memin, me aqane amele angatr hnei Iehova. 9 Nge tru la madrine i Iethero troa drenge la nöjei lolo hnei Iehova hna kuca koi Isaraela, ene la hna thepe angatr qa Aigupito.* 10 Thupene lai, öni Iethero: “Atrunyi Iehova jë, atre amele epun qa Aigupito, me qaathei Farao, nge atre nuamelene la nöj qaathene la mus i Aigupito. 11 Enehila, atre hë ni laka, draië kö Iehova hune la nöjei haze asë, ke kola mama hnene la hnei nyidrëti hna kuca kowe la itre ka pi tru kowe la nöje i nyidrë.” 12 Ame hnei Iethero, hmihmi Mose, hna traqa fë la ca huuj ne dreuth asë, me itre huuj koi Akötresie. Nge hnei Arona me itre qatr ne Isaraela, hna traqa troa ce xen memine la hmihmi Mose, qëmekene la nyipi Akötresie.
13 Ngöne la drai thupen, tune la hna majemin, hnei Mose hna lapa troa amekötine la itre jole ne la nöj. Nge hnene la nöj hna cile qëmeke i Mose, qaan e hmakany uti hë e hej. 14 Matre ame hë la hmihmi Mose a öhne la itre huliwa i angeic kowe la nöj, öni nyidrë: “Hnauëne la eö a huliwa tun? Hnauëne la eö a huliwa cas nge kola cile qëmeke i eö la nöj, qaan e hmakany uti hë hej?” 15 Nge öni Mose kowe la hmihmi angeic ka hape: “Ke tha mano kö la nöj traqa koi ni troa hnyinge koi Akötresie. 16 Maine kola mama la ketre jol, kola traqa fë koi ni, nge qange troa amekötine la itre atr, me qaja la hna amekötin hnene la nyipi Akötresie, me itre wathebo i nyidrë.”
17 Nge önine la hmihmi Mose ka hape: “Tha aqane huliwa kö lai. 18 Tro eö lai a hmanono, eö memine la nöje ka ce me eö. Ke hace catre la huliwa cili koi eö, nge thatreine kö eö troa xome casin. 19 Matre dreng, ame enehila, hetre mekune nyine tro ni a qaja koi eö, nge tro Akötresie a ce me eö. Ame eö, tro eö a qeneqaja ne la nöj qëmekene la nyipi Akötresie, nge tro fë jë la itre jol kowe la nyipi Akötresie. 20 Nge qejepengöne jë koi angatre la itre mekun hna axeciën, me itre wathebo, nge amamane jë la gojeny nyine tro angatr a xötrën, me itre hnëqa nyine tro angatr a cilën. 21 Ngo iëne jë nyipine la nöj la itre trahmanyi ka atrein, itre hna mejiune kow, nge ka tha hni koi mani. Nge acili angatre jë troa tane la ala 1 000,* me tane la ala 100, me tane la ala 50, me tane la ala 10. 22 Tro angatr a iameköti e traqa jë* la ketre jol. Tro angatr a tro fë koi eö la nöjei jole ka hace, nge qa i angatre pë hë la itre jol ka co. Ngo nue angatre pi troa xatua eö, matre hmaloi jë koi eö. 23 Maine tro eö a kuca tun, nge Akötresie la ka upi eö, tro hë eö lai a cile catr, nge tro la nöjei atr a madrine la angatr a isa bëeke koi hnalapan.”
24 Ame hnei Mose hna canga drenge la hna qaja hnene la hmihmi angeic, nge angeic a kuca asë jë la hna qaja hnei nyidrë. 25 Hnei Mose hna iëne la itre trahmanyi ka atrein ngöne la nöje Isaraela asë, me acili angatre nyine tane la nöj. Tane la ala 1 000, tane la ala 100, tane la ala 50, nge tane la ala 10. 26 Nge angatr a iameköti e kola traqa la ketre jol, nge e jol ka hace, angatr a tro fë koi Mose, ngo qa i angatr la itre jol ka co. 27 Thupene lai, hnei Mose hna iahni memine la hmihmi angeic, nge nyidrëti a bëeke jë kowe la nöje i nyidrë.