Ieremia

32 Ame ngöne la hna 10 ne macatre ne mus i Zedekia joxu ne Iudra, ngöne la kola 18 lao macatre ne mus i Nebukaneza,* hnei Iehova hna ithanata koi Ieremia. 2 Ngöne la ijine cili, hna cile xötreithi Ierusalema hnene la trongene isi ne la joxu ne Babulona. Nge hna umë Ieremia ngöne la kur ne la Itre Ka Thup, e hnine la uma ne la joxu ne Iudra. 3 Eje hi, hnei Zedekia joxu ne Iudra hna akalabusi angeic me hape: “Hnauëne la eö a perofetane la itre ewekë cili? Öni ö: ‘Hane hi la hna qaja hnei Iehova: “Tro ni a nue la traone celë kowe la joxu ne Babulona, nge tro nyidrëti a thapa, 4 nge thatreine kö Zedekia joxu ne Iudra troa kötrene la angetre Kaledaia, ke tro ha nu angeic kowe la joxu ne Babulona. Tro angeic a ithanata qëmekë me nyidrë, me öhnyi nyidrë hnene la luemeke i angeic.”’ 5 ‘Tro nyidrëti a xomi Zedekia a tro Babulona, nge tro Zedekia a lapa e cili uti hë la tro ni a ameköti angeic,’ öni Iehova. ‘Ngacama tro epuni a isi memine la angetre Kaledaia, ngo tha tro jë kö epuni a ngaa angatr.’”

6 Ngöne la ijine cili, öni Ieremia: “Hnei Iehova hna ithanata koi ni. Öni nyidrë: 7 ‘Tro Hanamela nekö i Saluma, trejin memine la keme i ö, a traqa troa wai ö me hape: “Itöne pi la hlapang e Anathoth, ke eö hi la ka pane ijij troa itöne hmaca.”’”

8 Tune la hna qaja hnei Iehova, hnei Hanamela nekön la trejin me kaka, hna traqa troa wai ni ngöne la kur ne la Itre Ka Thup, me hape: “Eni a sipo, itöne jë la hlapang e Anathoth ngöne la götran e Beniamina, ke eö hi la ka ijij troa xom me itöne hmaca. Itöne jë.” Trotrohnine ju hi ni e cili laka, aja i Iehova hi lai.

9 Ame hnenge hna itöne la hlapa i Hanamela nekö ne la trejin me kaka, e Anathoth. Hnenge hna tuluthe la nyine tro ni a hamë angeic: 7 lao sekele* me 10 lao pies sileva. 10 Thupene lai, hnenge hna cinyanyin hune la ketre pepa la hlapa hna itön me pelehatren. Hnenge fe hna hëne la itre temoë, me tuluthe la manie nyine tro ni a hamën. 11 Hnenge hna xom la pepa ne itö (lo hna pelehatren tune la hna amekötin hnene la wathebo me itre mus, memine fe lo hna tha pelehatren) 12 me hamën koi Baruka nekö i Neria, lo nekö i Maseia, qëmekei Hanamela nekön la trejin me kaka, me qëmeken lo itre temoë ka cinyanyin la pepa ne itö, me qëmekene la angetre Iudra ka lapa ngöne la kur ne la Itre Ka Thup.

13 Thupene lai, hnenge hna upi Baruka qëmekei angatr ka hape: 14 “Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Xome jë la itre pepa celë, lo pepa ne itö hna pelehatren memine lo hna tha pelehatren, nge amë hnyawane ju ngöne la ketre trengen hna xupe hnei dro, matre tha tro kö itre ej a canga hnyeqetr.’ 15 Ke hane hi la hna qaja hnei Iehova joxu ne la itre trongene isi e hnengödrai, Akötresi Isaraela: ‘Tro hmaca a itö uma, me hlapa, me vin ngöne la nöje ce.’”

16 Thupene la hna hamën la pepa ne itö koi Baruka nekö i Neria, hnenge hna thith koi Iehova me hape: 17 “Iehova fe Joxu Ka Sisitria! Nyipëti hi la ka xup la hnengödrai memine la ihnadro hnene la trengecatre i nyipë, me ime ka catre* i nyipë. Pëkö hnei nyipë hna thatreine kuca, 18 nyipë lo Atre amamane la ihnimi nyipici kowe la ka ala nyim, ngo ka nue pe la itre nekön troa xeni pune* la ngazo ne la itre keme i angatr ekö. Nyipëti la nyipi Akötresie, lo Ka Draië me Ka Catr, lo hna hën ka hape, Iehova joxu ne la itre trongene isi e hnengödrai. 19 Nyine hain* la itre mekuna i nyipë, nge ka mene la itre huliwa i nyipë, nyipë lo atre goeën asë la hna kuca hnene la itre atr, matre nyithupene koi angatr thenge la isa aqane ujë me itre huliwa i angatr. 20 Hnei nyipëti hna kuca la itre hatren me itre iamamanyikeu e Aigupito, nge tha hna thëthëhmine kö uti hë enehila. Celë hi matre, ka hlemu nyipëti e Isaraela me thene la itre atr, tun enehila. 21 Eje hi, hnei nyipëti hna amelene la nöje Isaraela qa Aigupito jëne la itre hatren, me itre iamamanyikeu, me ecatrene* la iwanakoime i nyipë, me emenen la ime i nyipë, me jëne la itre huliwa hna xouen.

22 “Thupene lai, hnei nyipëti hna hamë angatr la nöje gaa neni gala hnei melek me miel, lo nöj hnei nyipëti hna thingehnaean kowe la itre qaaqaa i angatr. 23 Ame hnei angatre hna lö me lapane la nöj. Ngo tha hnei angatre kö hna drei nyipë, me trongëne la wathebo i nyipë. Tha drengethenge kö angatr la hnei nyipëti hna amekötin. Celë hi matre, hnei nyipëti hna axulune koi angatr la akötre ce. 24 Goeën! Hna traqa la itre trahmany troa acil la itre ija, matre thapa la traon. Pine la isi,* me jiin, me itre meci ka ixötrekeu, eje hi, tro hë la angetre Kaledaia a thapa la traon. Tune la hnei nyipëti hna öhn enehila, eatr asë hë la hnei nyipëti hna qaja. 25 Ame pe, Iehova Joxu Ka Sisitria, öni nyipëti lo koi ni: ‘Itöne pi la hlapa hnei manie, nge hëne jë la itre temoë.’ Ngo tro pe kö a nue la traon kowe la angetre Kaledaia.”

26 Ame hnei Iehova hna ithanata koi Ieremia, me hape: 27 “Eni hi la, Iehova Akötresi ne la nöjei atr* asë. Hetre ewekë kö hnenge hna thatreine kuca? 28 Matre hane hi la hna qaja hnei Iehova: ‘Tro ni a nue la traone ce kowe la angetre Kaledaia me koi Nebukaneza* joxu ne Babulona, nge tro angeic a thapa la nöj. 29 Eje hi, tro la angetre Kaledaia ka lep la traon, a lö me dreuthetrij ej. Tro angatr a dreuthetrije la traon memine la itre hune uma hnë tro fë huuj koi Baala, me nenge la waina nyine fii huuj kowe la itre xaa haze matre akötrë ni.’

30 “‘Ke qaane lo angatr a co, hnene pala hi la angetre Isaraela me Iudra hna kuca la ngazo qëmekeng. Tha mano kö la angetre Isaraela akötrë ni hnene la itre huliwa i angatr,’ öni Iehova. 31 ‘Ke qaane lo kola acil la traone ce uti hë enehila, hnene eje pala hi hna amejëne la trengehning me wesitreng. Matre loi e troa apatren ej qëmekeng 32 pine la ngazo hna kuca hnene la angetre Isaraela me Iudra, troa akötrë ni: angatr, me itre joxu i angatr, me itre nekö i joxu, me itre atre huuj, me itre perofeta, me itre trahmanyi ne Iudra, me itre atrene Ierusalema. 33 Hnei angatr pala hi hna hutrö koi ni ngo tha goeë ni pe.* Anyimua ini angatre hë ni,* ngo xele kö angatre ma dreng me xomi ini qa ngöne la ihaji. 34 Nge hnei angatr hna amë la itre idrola i angatr hna sisin ngöne la uma ka xome la ëjeng, matre apuingazon. 35 Ketre, hnei angatr hna xupe la itre hnë hmi gaa hmitrötr koi Baala ngöne la Hnathupe Ne La Nekö i Hinom,* matre dreuthe* la itre nekö i angatr trahmanyi me jajiny koi Moleka.* Ngo tha hnenge kö hna upi angatre troa kuca la ewekë ka sisi cili, nge goi tha mekune* fe ni lai. Celë hi aqane akeinyi Iudra hnei angatr.’

36 “Öni epun, troa nue la traone celë kowe la joxu ne Babulona, jëne la isi,* me jiin, me itre mec ka ixötrekeu. Matre hane hi la hna qaja hnei Iehova, Akötresi Isaraela: 37 ‘Tro ni a acasi angatre hmaca, me abëekë angatr qa ngöne la nöjei nöj hnenge hna aisaije angatre kow, ngöne la elëhning, me trengehning, me wesitreng. Eje hi, tro ni a abëekë angatr kowe la, me alapa angatr ngöne la tingeting. 38 Tro angatr a nöjeng, nge tro ni a Akötresi angatr. 39 Tro ni a acasine la itre hni i angatr me itre jë i angatr, matre tro pala hi angatr a xoue ni, ke nyine loi koi angatr me itre nekö i angatr e thupen. 40 Nge jëne la isisinyikeu ka epine palua hnenge hna troa kuca me angatr, eni a saen tro pala hi a kuca la loi koi angatr. Tro ni a amë e kuhu hni i angatr la xoue ni, matre tha tro kö angatr a ananyi ni. 41 Tru la madrineng troa kuca la loi koi angatr, nge tro ni a traa angatr ngöne la nöje ce, cememine la hning me meleng ka pexej.’”

42 “Hane hi la hna qaja hnei Iehova: ‘Tune lo eni a axulune la akötr ka tru celë kowe la nöje ce, ketre tun, tro ni a axulune koi angatr la nöjei ewekë ka loi hnenge hna thingehnaean. 43 Nge tro hmaca ha a itö hlapa ngöne la nöje ce, lo öni epun: “Ketre hnapapa ka pë atren me öni wael; hna nue pë hë koi angetre Kaledaia.”’

44 “‘Hane hi la ka troa traqa ngöne la nöje i Beniamina, me itre götran xötreith e Ierusalema, me itre traon e Iudra, me itre traon hune la itre wetr, me ngöne la hnathup, me itre traon e kolojë: tro ha itö hlapa hnei mani, nge tro ha cinyanyin me pelehatren la itre pepa ne itö, me hëne la itre temoë, ke tro ni a abëekën lo itre hna kötre fë,’ öni Iehova.”