Isaia
44 “Ame enehila, drenge ju, Iakobo hlueng,
Me Isaraela fe, lo hnenge hna iën.
2 Hane hi la hna qaja hnei Iehova,
Lo Atre Xupi ö me Atre Acili ö,
Me Atre Xatua eö qaane lo kola hnaho* eö:
‘The xou kö, Iakobo hlueng,
Iesuruna,* lo hnenge hna iën.
3 Ke tro ni a nenge la tim hune la dro ka aja tim*
Me itre hneopegejë ka neni ngöne la ihnadro gaa qaqacil.
Tro ni a nunuëne la uang kowe la matra i ö
Memine la manathithing kowe la itre matra i ö.
4 Nge tro angatr a cia kösë angatr e nyipine la itre haö,
Me tune la itre sinöe ka cia ezine la hneopegejë.
5 Tro la ketre a qaja ka hape: “Edrö i Iehova ni.”
Tro la ketre a xome la ëje i Iakobo,
Tro la ketre a cinyianyin hune la iwanakoime i angeic ka hape: “Edrö i Iehova.”
Tro hë angeic a xome la ëje i Isaraela.’
6 Hane hi la hna qaja hnei Iehova,
Lo Joxu, Atre Itö Mele i Isaraela, ene Iehova joxu ne la itre trongene isi e hnengödrai:
‘Eni la hnapane me hnapin.
Pëkö xaa Haze, ngo eni hmekuje hi.
7 Drei la ka tung?
Loi e tro angeic* a pane sue, me amaman, me anyipicin koi ni!
Loi e tro angeic a qaja amamane la itre ewekë ka troa xulu,
Me itre ewekë ka troa traqa e thupen
Tune lo hnenge hna kuca qaane lo eni a eköthe la nöje ka hekö.
8 The xou kö,
Nge the cile hnö kö.
Hapeu, tha hnenge kö hna pane thuemacanyi epun isa ala cas? Me amaman koi epun?
Epuni la itre temöeng.
Hetre ketre Akötresieti kö?
Waea, pëkö xaa Git; nge pëkö ca hnenge hna atre.’”
9 Ka pë pengöne la itre ka tratrau idrola,
Nge ame la itre ewekë hnei angatr hna tratraun, tha nyipiewekë kö.
Angatre* la itre temoë ka tha öhne kö, nge pëkö ca hna atre,
Celë hi matre ame la itre ka xup itre ej, tro ha ahmahmanyi angatr.
10 Mekuna i drei la troa xupi haze me ahmun la fao
Nyine kuca la idrola* ka pë alien?
11 Goeën! Tro ha hmahma la itre sine huliwa i angeic!
Ame la itre ka huliwan ej, ke itre atre hi.
Loi e tro angatr a ce traqa me isa xomi göhnen.
Tro hë angatr asë a xou, me hmahma.
12 Ame la atre dreu fao, angeic a huliwane la fao.
Ngöne la itre wanalep memine la jia ne huliwa i angeic,
Angeic a lepelep hnei hama me huliwan ej, memine la ime ka catr.
Traqa ju hi la pi xen, ene pe, pë ju hi trengecatre i angeic;
Tha iji timi pena kö angeic, ene pe, kucakuca ju hi angeic.
13 Ame la atre tratrau sinöe, angeic a ea la eno ne tulu, me desën la idrola hnei wene cok ka madra.
Angeic a tratraun ej hnei fao, me sija hnei kopa ne siji raon.
Angeic a tratraun ej matre troa ceitu me ketre atr,
Ene la ketre atr ka mingöming,
Matre troa amë hnine la uma.*
14 Ame la ketre atr, hnëqa i angeic troa sa sinöe arasi.
Angeic a iëne la ketre pengöne sinöe, tune la alona,
Nge angeic a nue la sinöe troa cia hnyawa ngöne la hnaxulu.
Angeic a traa orene* matre tro la mani a acian ej.
15 Thupene lai, hna meci la sinöe nyine athi eë.
Ketre atr a xome la ketre hnep, troa hleng;
Angeic a amelei eë matre sa falawa.
Ngo angeice fe a xupe la ketre haze matre thili kow.
Angeic a kuca la ketre idrola memine la sinöe, me thili kow.
16 Angeic a dreuthe la sin ngöne la eë;
Me atrone la mitre i angeic, me xeni mej.
Angeic a hleng me hape:
“Haawe, keukawa ha ni la eni a goeëne la eë.”
17 Ngo ame la sinöe ka lapa pe, angeic a tratraun nyine idrola.
Matre thili kow ej me nyihluen ej.
Me thithi kow ej me hape:
“Amele ni jë, ke nyipëti la hazeng.”
18 Pëkö hnei angatr hna atre, nge pëkö ca hnei angatr hna trotrohnin,
Ke ka fedre la luemeke i angatr, matre thatreine kö goe,
Nge pëkö wangatrehmekun ngöne la hni i angatr.
19 Pëkö ala cas ka pane mekun
Pëkö ca ka hetre atrehmekun me inamacan matre qaja ka hape:
“Ase hë ni dreuthe la ketre sine la sinöe,
Nge hune la itre wanalep, hnenge hna sa falawa me atrone la mitr nyine xen.
Nga hnauëne pena la tro ni a xom la munëne sinöe matre xupe la ewekë hna sisin?
Tro ni a nyihluene tune kaa la ketre hnepe sinöe?”*
20 Angeice lai a xeni la hnatresij.
Hna amenu angeic hnene la hni i angeic.
Thatreine kö angeic troa sipu amele angeice kö me hape:
“Tha ketre ewekë ka pë aliene kö la hnenge hna ea ngöne la ime macang?”
21 “Iakobo fe, Isaraela fe, mekune kö la itre ewekë cili,
Ke eö la hlueng.
Hnenge hna xupi eö, nge eö la hlueng.
Isaraela fe, tha tro kö ni a thëthëhmi ö.
22 Tro ni a apatrene la itre tria i ö, tune la kola thung hnene la iaw
Me itre ngazo i ö hnene la iaw atraqatr.
Bëeke jë koi ni, ke tro hmaca ni a itö eö.
23 Hnengödrai fe, sue madrine jë,
Ke hnei Iehova hna enijën!
Itre trepene la ihnadro fe, sue madrine jë!
Itre wetre fe, madrine jë,
Memine la itre hnitr, me nöjei sinöe asë!
Ke ase hë Iehova itö Iakobo hmaca,
Nge nyidrëti a amamane la elolo i nyidrë hui Isaraela.”
24 Hane hi la hna qaja hnei Iehova, Atre Itö Mele i ö,
Lo Atre xupi eö e kuhu hni ne la thine i ö:
“Iehova ni, Atre kuca asë.
Hnenge hna seluthe casine la hnengödrai,
Me saathe la ihnadro.
Drei la ka ce me eni?
25 Eni la Atre atriane la itre hatren ne la itre perofeta* thoi,
Nge eni la Atre ahmone la itre ka qajaqaja la drai elany;
Me ajeane la itre ka inamacan
Me amenune la atrehmekune i angatr;
26 Lo Atre eatrëne la trengewekë ne la hlue i nyidrë
Me aejën asë la itre hnepe hnaewekë hna perofetan hnene la itre ka tro fë maca i nyidrë;
Lo Atre qeje Ierusalema ka hape: ‘Tro ha lapan ej,’
Me itre traon ne Iudra ka hape: ‘Tro ha xupi itre ej hmaca,
Nge tro ni a acile hmaca la itre uma hna thë’;
27 Lo Atre qaja kowe la itre gaa jui: ‘Qaqacile pi,
Nge tro ni a aqaqacilëne la itre hneopegejë i epun’;
28 Lo Atre qaja göi Koreso: ‘Angeic la atre thupë mamoeng,
Tro angeic a eatrën asë la ajang’;
Lo Atre qaja göi Ierusalema ka hape: ‘Tro hmaca a xup ej’
Me kowe la uma ne hmi ka hape: ‘Tro hmaca a ami trepene i ö.’”