Esodro

32 Ngöne la ijine cili, öhne hë la nöje laka, kola hmitr hnei Mose troa uti qa hune la wetr, matre angatr a tro ju koi Arona me hape: “Kuca jë la ketre haze matre tro ej a tro qëmeke hun, ke thatre kö huni la ka traqa koi Mose, lo atre thepe huni qa Aigupito.” 2 Matre öni Arona koi angatr ka hape: “Xome jë la itre iane hnangenyë gool ne la itre föi epun, me itre nekö i epun trahmanyi me jajiny, nge traqa fë pi koi ni.” 3 Ame hnene la nöj hna nyiqaane hule la itre iane hnangenyë i angatr, me traqa fë koi Arona. 4 Arona a xome ju la goole cili, me tratraun hnei sine fao ka ixöj, me kuci* neköi kau, nge öni angatre jë hi: “Isaraela fe, hane hi la haze i eö, lo atre thepe eö qa Aigupito.”

5 Ame hë la Arona a öhne lai, hnei angeic hna xup la ketre ita ne huuj qëmekene lai neköi kau gool, nge angeic a suene jë ka hape: “Ame elany, hetre feet koi Iehova.” 6 Ame la drai thupen, hnei angatr hna canga ilë e sine hmakany, me huujëne la itre huuj ne dreuth asë, me traqa fë la itre huuj ne tingeting. Thupene lai, hnene la nöj hna ilapany troa ce xeni me ij, nge angatr a mejë jë troa madrin.

7 Matre öni Iehova koi Mose ka hape: “Tro jë, uti pi, ke ame la nöje i eö, lo hnei eö hna tro xom qa Aigupito, angatr a kuca la ngazo. 8 Canga saqe hi angatre jea qa ngöne la gojeny hnenge hna upi angatr troa xötrën. Hnei angatr hna kuci* neköi kau gool, nge angatr a thili kow me tro fë huuje kow, me hape: “Isaraela fe, hane hi la haze i eö, lo atre thepe eö qa Aigupito.” 9 Öni Iehova hmaca jë hi koi Mose ka hape: “Öhne hë ni laka, ka catre he* la nöje ce. 10 Haawe enehila, nue pi, matre tro ni a apatrenyi angatr hnene la trenge elëhning, nge tro ni a kuca matre tro eö a nöje ka tru.”

11 Ame hnei Mose hna treije fë* koi Iehova Akötresi angeic ka hape: “Iehova fe, hnauëne laka, tro nyipëti a nue la trenge elëhni i nyipë kowe la nöj, nge hnei nyipëti pe hna thepe angatr qa Aigupito hnene la mene ka tru i nyipë, memine la ime ka catre i nyipë? 12 Hnauëne laka, tro la angetre Aigupito a qaja ka hape, hnei nyidrëti hna thepe angatr matre lepi angatr, me humuthi angatr ngöne la itre wetr, me apatrenyi angatr qa ngöne la ihnadro? Nuetrije pi la trenge elëhni i nyipë, nge the kuca kö* la hnei nyipëti hna mekun troa lepe la nöje i nyipë. 13 Meku Aberahama kö me Isaaka, me Isaraela, itre hlue i nyipë, lo hnei nyipëti hna isisinyikeu memin ngöne la ëje i nyipë, me hape: ‘Tro ni a atiqane la itre matra* i epun, tune la itre wëtresij e hnengödrai, nge tro ni a hamëne la itre nöje ce kowe la itre matra i epun, lo nöj hnenge hna qaja, matre troa zi i angatr la itre nöje cili uti hë epin palua.’

14 Haawe, tha hnei Iehova ju kö hna axulune la ngazo kowe la nöje i nyidrë, lo hnei nyidrëti hna mekune troa lep.*

15 Nge Mose a bëeke hmaca jë, angeic a uti pi qa hune la wetr, me xome trongëne la lue sine etë ne Anyipicin, hna cinyihan ngöne la lue götrane la lue sine etë, hna cinyihan ngöne la ketre götran me ketre götran. 16 Hna kuca hnei Akötresie la lue sine etë, nge hnei nyidrëti hna cinyanyine la itre trengewekë i nyidrë hune la lue sine etë. 17 Ame la Iosua a drenge la mejene la nöj, me aqane sue i angatr, angeic a qaja koi Mose ka hape: “Hetre mejene isi ngöne la lapa.” 18 Ngo öni Mose ka hape:

19 Ame hë la Mose a easenyine la lapa, me öhne la neköi kau me itre fia, elë jë hi la trengehni angeic. Mose a hna pi la lue sine etë fene la wetr, ame hna kaqa pi. 20 Ame hnei angeic hna xome la neköi kau hnei angatre hna kuca, me dreuthe trij, me amudromudron. Nge angeic a kuiëne pi la xaxau hune la tim, me ithue imene la angetre Isaraela. 21 Nge öni Mose koi Arona ka hape: “Nemene la hna kuca koi eö hnene la nöj, matre uku angatre jë eö troa kuca la ngazo ka tru celë?” 22 Ngo öni Arona: “The elëhni kö joxung, atre hi nyipë laka, ame la nöje celë, ke pi tro pala hi angatr a kuca la ngazo. 23 Öni angatre koi ni: ‘Kuca jë la ketre haze matre tro ej a tro qëmeke hun, ke thatre kö huni la ewekë ka traqa koi Mose, lo atre thepe hun qa Aigupito. 24 Matre öninge koi angatr, ‘Tro la nöjei atr ka trene ewekë gool, a hul me traqa fë koi ni.’ Ame hnenge hna kuiën asë ngöne la eë, nge nyi neköi kau goole pi hi.”

25 Öhne hi Mose laka, menumenu hë la nöj, ke hnei Arona hna nue angatre troa huliwa menu, matre angatr a kuca la itre nyine hmahman qëmekene la itre ithupëjia me angatr. 26 Ame hnei Mose hna cile ngöne la hnë lö ne la lapa me hape: “Drei la ka ce me Iehova? Trohemi koi ni.” Nge hnene la angetre Levi asë hna tro koi angeic. 27 Öni angeice koi angatr: “Hane hi la hna qaja hnei Iehova Akötresi Isaraela, ‘Isa xomi tauane jë me trongën* asë la nöj, nge humuthe jë la trejin me epun, memine la atre lapa easenyi epun, me sinee i epun.’” 28 Nge hnene la angetre Levi hna kuca asë la hna qaja hnei Mose, matre traqa koi 3 000 lao trahmanyi hna humuthe la drai cili. 29 Nge öni Mose koi angatr: “Ketre cile* pi epuni koi Iehova la drai ce, ke hnei epuni hna isa cil kowe la sipu nekö i epun trahmany, me sipu trejin me epun. Ame enehila, tro nyidrëti a amanathithi epun.”

30 Ngöne la drai thupen, öni Mose kowe la nöj: “Tru catre la ngazo i epun, nge ame enehila, tro na elë koi Iehova, matre wange jë ka hape, ijije kö troa thëthëhmine la ngazo i epun.” 31 Matre Mose a bëeke jë koi Iehova me hape: “Atraqatre la ngazo hna kuca hnene la nöj! Hnei angatre hna kuca la ketre haze gool koi angatr. 32 Ngo enehila, maine aja i nyipë, epi nue pi la ngazo i angatr. Ngo e tha eje kö, eni a sipo nyipë, köletrije pi la ëjeng qa ngöne la itus hnei nyipëti hna cinyihan. 33 Ngo öni Iehova koi Mose ka hape: “Tro hmekuje hi ni a apatrene la ëjene la atre kuca la ngazo qa ngöne la itusing. 34 Ngo enehila, tro jë, ce tro jë memine la nöj kowe la götran lo hnenge hna qaja koi eö. Nge drei ni, tro la angelang a tro pa qëmeke i eö, nge e traqa ha la drai ne tro ni a amekötin, tro hë ni a nyithupene koi angatr la ngazo hnei angatre hna kuca. 35 Thupene lai, hnei Iehova hna lepe la nöj pine angatre kuci neköi kau, lo hna kuca hnei Arona.