Ieremia
40 Hnei Iehova hna ithanata koi Ieremia, thupene la Nebuzaradana, tane la itre ka thupë joxu, a nue angeic troa tro qa Rama. Hnei Nebuzaradana lo hna oth me xomi Ieremia kowe la traone ce, matre ce Ieremia memine lo itre hna kötre fë qa Ierusalema me Iudra a tro Babulona. 2 Ame hnei nyidrëti hna xom aconyi Ieremia me hape: “Ase hë Iehova Akötresi ö qaja la akötr ka troa traqa e ce, 3 nge tune lo hnei Iehova hna qaja, hnei nyidrëti hna eatrën, ke hnei epuni hna ngazo koi Iehova, me tha drei nyidrë. Celë hi matre hna traqa lai koi epun. 4 Enehila, eni ha senge la lue iwanakoime i ö hna oth. Maine aja i ö, tro nyiso a ce tro a tro Babulona, nge tro ni a thupë eö. Ngo maine xele kö eö ma ce tro me eni a tro Babulona, nga lapa ju pë hë. Goeëne jë la nöj! Iëne jë la götran hnei ö hna troa lapan.”
5 Pine laka Ieremia a luelu, matre öni Nebuzaradana jë hi: “Bëeke jë koi Gedalia nekö i Ahikama, nge api i Safana, lo hnei joxu ne Babulona hna acil hune la itre traon e Iudra, nge ce lapa ju me angeic nyipine la nöj; maine tro jë pena kowe la hnei ö hna ajan.”
Ame hnene la tane la itre ka thupë joxu hna thue kemej i angeic me ahnahna, me nue angeic. 6 Matre hnei Ieremia hna tro koi Gedalia nekö i Ahikama e Mizepa, me ce lapa me angeic nyipine la itre atr hna nue pe ngöne la nöj.
7 E thupen, hnene asë hi la itre tane isi me itre soc ngöne la hlapa, hna dreng ka hape, hnene la joxu ne Babulona hna acili Gedalia nekö i Ahikama hune la nöj, me ahnithe koi angeic la itre ka pë ewekë hna tha kötre fë a tro Babulona, itre trahmany me föe, me itre nekönatr. 8 Matre hnei angatr hna tro troa wai Gedalia e Mizepa, ene Isamaela nekö i Nethania, me Iohanana me Ionathana, lue nekö i Karea, me Seraia nekö i Tanumeth, me itre nekö i Efai qa Netofa, me Iezania neköne la atre Maaka, angatr me itre soce i angatr. 9 Ame hnei Gedalia, nekö i Ahikama lo nekö i Safana, hna sisiny koi angatr me itre soce i angatr ka hape: “The xou kö troa huliwa kowe la angetre Kaledaia. Lapane jë la nöj, nge huliwa jë kowe la joxu ne Babulona, nge tro ha tro loi la mele i epun. 10 Nge ame eni, tro pë hë ni a lapa e Mizepa matre nyi qeneqaja* i epun kowe la angetre Kaledaia ka troa traqa koi së. Ngo tro pë hë epun a kuci waina me oel, me huje la itre wene sinöe ngöne la ijine hedredrei, me amë acon ngöne la itre trengene i epun. Tro pë hë epuni a lapane la itre traon hnei epuni hna mekun troa xom.”
11 Nge drenge hë la angetre Iudra asë e Moaba, me Amona, me Edroma me ngöne la nöjei nöj asë laka, hnene la joxu ne Babulona hna nue pe la itre xaa atr e Iudra, me acili Gedalia nekö i Ahikama, lo nekö i Safana hui angatr. 12 Matre hnene pë hë la angetre Iudra hna isa bëeke hmaca qa ngöne la nöje hna aisaije angatre kow. Nge traqa pi hi angatr e Iudra thei Gedalia e Mizepa, troa kuci waina me huj atrune la itre wene sinöe.
13 Ngo hnei Iohanana nekö i Karea, memine la itre tane isi asë ka eje ngöne la hlapa, hna tro koi Gedalia e Mizepa. 14 Öni angatr: “Atre kö nyipë laka, hnei Baalisa joxu ne Amona hna upi Isamaela nekö i Nethania troa humuthi nyipë?” Ngo tha jelenyipicine kö Gedalia nekö i Ahikama.
15 Ame hnei Iohanana nekö i Karea hna qaja juetrëne koi Gedalia e Mizepa ka hape: “Pane nue ni pi troa humuthi Isamaela nekö i Nethania; pëkö ka troa atre. Ke tro pena huni a nue angeice fë nemen troa humuthi nyipë? Nge troa aisaijene fë nemen la angetre Iudra ka traqa itronyi thei nyipë? Nge troa meci fë nemen la angetre Iudra ka mele pe?” 16 Ngo öni Gedalia nekö i Ahikama jë hi koi Iohanana nekö i Karea ka hape: “The kuca kö lai! Ke ka thoi la hnei ö hna qaja göi Isamaela.”