Hnaaluene Tusi Itre Joxu
22 Traqa koi 8 lao macatre i Iosea la kola acili joxu nyidrë. Hnei nyidrëti hna mus koi 31 lao macatre e Ierusalema. Iedida la ëjene la thine i nyidrë. Nge eahlo la nekö i Agaia qa Bozekath. 2 Hnei Iosea hna kuca la loi koi Iehova. Hnei nyidrëti hna nyitipu* Dravita qaaqaa i nyidrë, nge tha jea kö nyidrë kowe la götrane maca maine götrane mi.
3 Ngöne la kola 18 lao macatre ne mus i Iosea, hnei nyidrëti hna upi Safana lo sekreter, nekö i Azalia, lo nekö i Mesulama, troa tro kowe la uma ne hmi Iehova, me hape: 4 “Elë jë koi Hilekia atre huuj ka sisitria, nge sipo nyidrëti jë troa traqa fë la mani hna kuiën hnine la uma ne hmi Iehova, lo mani hna kapa qaathene la nöj, hnene la itre ka thupë qëhnelö. 5 Troa hamëne la mani kowe la itre tane huliwa, itre hna acil troa nyihnyawane la uma i Iehova. Nge tro angatr a xome la mani cili, me nyithupene la itre ka troa kuca hnyawane la itre gaa thöni ne la uma i Iehova. 6 Tro angatr a nyithupene la itre atr ka kuca la nöjei pengöne huliwa, me itre ka huliwa batima, me itre ka xupi uma. Tro fe angatr a itö sinöe, me itre etë hna thupathupa, matre nyihnyawane la uma. 7 Nge pine laka, hna mejiun kowe la itre atre cili, tha nyipiewekë kö troa hnyingë pengöne koi angatre la aqane trongene la mani.”
8 E thupen, hnei Hilekia atre huuj, hna qaja koi Safana, lo sekreter ka hape: “Hnenge hna öhne la tusi Wathebo hnine la uma i Iehova.” Matre nyidrëti a hamëne jë koi Safana, nge angeic a e jë. 9 Ame hnei Safana lo sekreter, hna tro koi joxu me hape: “Hnene la itre hlue i nyipë hna tro troa xome* la mani qa hnine la uma, me hamën kowe la itre tane huliwa hnine la uma i Iehova.” 10 Nge öni Safana hmaca jë: “Nge hnei Hilekia atre huuj hna hamë ni la itusi celë.” Nge Safana a e jë qëmekei joxu.
11 Matre ame hë la joxu a dreng la hna qaja hnene la tusi Wathebo, nyidrëti a kuie zezene pi la itre iheetre i nyidrë. 12 Thupene lai, hnene la joxu hna amekötine koi Hilekia atre huuj, me koi Ahikama nekö i Safana, me Akebora nekö i Mikaia, me koi Safana lo sekreter, me koi Asaia atre xatua joxu, ka hape: 13 “Hnyinge jë koi Iehova thatraqai ni memine la nöj, me kowe la nöje Iudra asë, göne la aliene la tus hne së hna öhn. Ke tru catre la elëhni Iehova koi së, ke tha trongëne kö itre qaaqaa së la hna qaja hnine la tusi celë. Tha trongëne kö angatr la hna cinyianyine koi së.”
14 Ame hnei Hilekia atre huuj, me Ahikama, me Akebora, me Safana, me Asaia hna tro troa wai Huleda, perofeta föe. Eahlo la föene la atre thupëne la itre iheetre i joxu, ene Saluma nekö i Tikeva, nekö i Hasera. Nge eahlo a lapa ngöne la götran ka hnyipixe ne Ierusalema. E cili la angatr a ithanata koi eahlo. 15 Eahlo a sa jë ka hape: “Hane hi la hna qaja hnei Iehova Akötresi Isaraela, ‘Hape jë kowe la trahmanyi ka upi epun koi ni ka hape: 16 “Hane hi la maca i Iehova, ‘Tro ni a axulune la akötre kowe la götrane celë, me kowe la itre atren, ene la nöjei ewekë hna cinyianyin hnine la tusi hna e hnene la joxu ne Iudra. 17 Tro la elëhning a mel tune la eë kowe la götrane celë, nge tha tro kö ej a pi, ke hnei angatr hna nuetriji ni, me huhajine la itre huuje i angatr kowe la itre xa haze, matre troa jele la trenge hning hnene la itre huliwa i angatr.’” 18 Ngo qaja ju fe kowe la joxu ne Iudra ka upi epuni troa hnyinge koi Iehova, ka hape, ‘Hane hi la hna qaja hnei Iehova Akötresi Isaraela, göne la itre trengewekë hnei ö hna dreng. 19 Hna ketr la hni ö hnene la itre trengewekë celë, nge hnei eö hna ipië qëmeke i Iehova, lo eö a drenge la hnenge hna qaja göne la nöje celë me itre atren. Eje hi, hnenge hna qaja ka hape, tro ha lepi angatr hnei akötr, nge tro la itre atr a sesëkötre ngazo, pine la ewekë ka traqa koi angatr. Nge hnei eö hna kuie zezene la itre ihetre i ö, me treije qëmekeng, matre pine lai, ase hë ni drei ö, öni Iehova. 20 Celë hi matre tro ni a acasi ö me itre qaaqaa i ö,* nge tro eö a tro ngöne la tingeting. Tro ha ami ö hnine la hua i ö, nge tha tro kö la luemeke i ö a öhne la akötr hnenge hna troa axulun kowe la götrane celë.’”’” Ame hnene la itre trahmanyi hna bëeke fë la maca cili kowe la joxu.