Pane Tus Samuela
11 E thupen, hnei Nahasa atre Amona, hna acil la göhnë ne la itre soc ezine Iabese, e Gileada, matre troa thapa la nöj. Ame hnene la nöjei trahmanyi ne Iabese, hna qaja koi angeic ka hape: “Isisinyikeu* jë me eahun, nge tro huni a itre hlue i eö.” 2 Sa jë hi Nahasa atre Amona ka hape: “Tro ni a sisinyi me epun, e troa pane thin axulun la alameke maca i epun. Nge tro ni a kuca lai, matre ahmahmane la nöje Isaraela.” 3 Ngo önine la itre qatr ne Iabese ka hape: “Pane nue pi la 7 lao drai, matre tro huni a iupi fë maca kowe la nöjei tribu ne Isaraela. Nge e pëkö ka troa xatua hun, tro hë huni a nyihlue i eö.” 4 Matre ame hë la kola traqa hnei itre ka tro fë maca e Gibea, lo traone i Saulo, angatr a thuemacane jë la itre atr. Ame hnei angatr hna itreijeny.
5 Saulo a bëeke qa helep me itre kau, matre öni angeic: “Kola ue la? Hnauëne la angatr a itreijeny?” Matre itre atr a qaja jë koi angeic la hna qaja hnei angetre Iabese. 6 Nge ame hë la Saulo a drenge lai, huliwa jë hi la ua i Akötresie hui angeic, matre elëhni jë hi angeic. 7 Nge Saulo a xome pi la lue kau me sasa. Thupene lai, angeic a iupi fë pi la itre sine mitr kowe la nöje Isaraela asë. Nge qa ne la itre ka tro fë maca troa qaja kowe la nöje ka hape: “Hane hi la ewekë ka troa traqa kowe la itre kau ne la itre ka xele ma xötrethenge Saulo me Samuela.” Ame hnei Iehova hna aciane la xou me metrötr thene la nöj, nge itre trahmany a ce uti pi.* 8 Saulo a e angatre jë e Bezek, nge ala 30 000 la ka traqa qa Iudra, nge 300 000 qa ngöne la itre xa tribu. 9 Thupene lai, öni Saulo me itre atre i angeic kowe la itre ka tro fë maca ka hape: “Tro jë qaja kowe la angetre Iabese ka hape, elany e midi, tro ha amele angatr.” Matre itre ka tro fë maca a tro ju troa qaja koi angetre Iabese, nge tru la madrin i angatr. 10 Önine jë hi la angetre Iabese kowe la angetre Amona ka hape: “Elany, tha tro hmaca kö huni a cil koi epun, nge ewekë i epun pë hë hun.”
11 Ngöne la drai thupen, hnei Saulo hna thawa koi könitre la trongene isi i angeic. Nge angatr a lö jë kowe la hna lapa ne la itre soc ne Amona, hmekune la hawa ne thup e hmahmakany.* Angatr a lepe jë la angetre Amona uti hë e midi, matre ala nyimu la hnei angatr hna humuth. Nge kola ikötreny la angetre Amona ka mele pe, pëkö ca ka tro ala lu. 12 Önine jë hi la nöje koi Samuela ka hape: “Ekaa ha lo itre atr ka xele tro Saulo a joxu koi së? Traqa sai angatre pi, matre tro huni a humuthi angatr.” 13 Ngo öni Saulo: “Pëkö ala casi hna troa humuth enehila, ke ngöne la drai ce, hnei Iehova hna amele Isaraela.”
14 E thupen, öni Samuela kowe la nöj: “Jë fe a tro Gilegala, matre tro hmaca së a qaja ka hape, joxu hë Saulo.” 15 Ame hnene la nöj asë hna tro Gilegala. Nge e cili hi la kola acili joxu Saulo qëmeke i Iehova. Nge hnei angatr hna tro fë huuj ne tingeting qëmeke i Iehova. Ame hnei Saulo me itre trahmanyi ne Isaraela hna pane feetëne lai, me ce madrin.