Numera
36 Ame hnene la itre tixe ne lapa ne la itre matra i Gileada nekö i Makeri, lo nekö i Manase, qa ngöne la itre fami ne la itre nekö i Iosefa, hna traqa troa ithanata koi Mose, me itre tan, me itre tixe ne lapa ne Isaraela. 2 Öni angatr: “Hnei Iehova hna amekötin koi nyipë joxu, troa uthidrönegöti* matre thawa la nöj nyine edrö kowe la angetre Isaraela; nge hnei Iehova hna upi nyipë joxu, troa hamëne la edrö i Zelofeada, trejin me eahun, kowe la itre nekö i angeice jajiny. 3 Ngo maine tro angatr a faipoipo memine la itre trahmany ne la ketre tribu ne Isaraela, ke tro ha xome la edrö ne la itre föe cili qa ngöne la edrö ne la itre keme hun, nge tro ha nyixane la edrö ne la tribu ka xomi angatr. Haawe, tro ha xome la itre xaa hnepadro qa ngöne la edrö hun. 4 Nge e traqa ha la Iubeli* kowe la nöje Isaraela, tro la edrö ne la itre föe cili a nyixane paluane la edrö ne la itre tribu ka xomi angatr. Nge tro ha xome la itre hnepadro ne la tribu ne la itre keme hun.”
5 Ame hnei Iehova hna upi Mose troa hamën kowe la angetre Isaraela la itre hna amekötin celë: “Nyipici hi la hna qaja hnene la itre tribu ne la itre nekö i Iosefa. 6 Hane hi la hna amekötin hnei Iehova kowe la itre nekö i Zelofeada jajiny: ‘Ijiji angatre hi troa isa xomi aja. Ngo tro hmekuje hi angatr a faipoipo memine la ketre trahmany, qa ngöne la fami ne la tribu ne la keme i angatr. 7 Tha tro kö la angetre Isaraela a ihamënekeune la edrö i angatr, qa ngöne la ketre tribu kowe la ketre tribu. Ke qa ne la angetre Isaraela troa nyipiewekëne la edrö ne la tribu ne la itre qaqaa i angatr. 8 Nge ame asë hi la itre jajiny ka trene edrö nyipine la itre tribu ne Isaraela, ke qa i angatr troa faipoipo memine la ketre matra ne la tribu ne la keme i angatr, matre tro pala hi la angetre Isaraela a thupëne la edrö ne la itre qaqaa i angatr. 9 Tha tro kö la angetre Isaraela a ihamënekeun la edrö i angatr, qa ngöne la ketre tribu kowe la ketre tribu, ke qa ne la itre tribu ne Isaraela troa nyipiewekëne la edrö i angatr.’”
10 Ame hnene la itre nekö i Zelofeada hna kuca thenge la hnei Iehova hna amekötin koi Mose. 11 Hnei Mala, me Tireza, me Hogela, me Mileka, me Noa, itre nekö i Zelofeada, hna faipoipo memine la itre neköne la itre trejin ne la keme i angatr. 12 Hnei angatr hna faipoipo memine la itre trahmany ne la fami i Manase, nekö i Iosefa, matre tro kö la edrö i angatr a lapa ngöne la tribu ne la fami ne la keme i angatr.
13 Celë hi itre wathebo hnei Iehova hna amekötin kowe la angetre Isaraela, jëne Mose ngöne la hnapapa e Moaba, ezine la hneopegejë Ioridrano, hmekun e Ieriko.