Levitiko
24 Öni Iehova hmaca jë hi koi Mose: 2 “Upe jë la angetre Isaraela troa traqa fë la nyipi oelë oliv hna tranetran thatraqane la tane laam, matre tro pala hi a mel la itre laam. 3 Qa i Arona troa kuca matre tro pala hi a mel la itre laam qëmekene* la imaano ne thewe hnahag, e hnine la itat ne icasikeu. Tro itre ej a mel qaan e hej uti hë e hmakanyi qëmekei Iehova. Celë hi wathebo ka cile hut kowe la nöjei xötre atr. 4 Tro pala hi angeic a atë qëmekei Iehova, la itre laam hune la tane laam hna kuca hnei nyipi gool.
5 “Qa i ö troa xome la farin ka lolo, me kuca la 12 lao falawa kösë korona. Troa isa kuca la itre falawa cili, hnene la lue omera* ne farin ka lolo. 6 Nge tro eö a iatëkeun la itre falawa hune la laulau hna kuca hnei nyipi gool qëmekei Iehova, 6 lao falawa ngöne la ketre ita, nge 6 ngöne la ketre. 7 Tro eö a atë hune la lue ita cili, la nyipi libanu, me huujëne koi Iehova jëne la eë, nyine huuj ka nyihatrene la itre falawa. 8 E nöjei Sabath, tro pala hi a amë qëmekei Iehova la falawa. Celë hi isisinyikeu ka cile hut memine la angetre Isaraela. 9 Nge ame la falawa, ke thatraqai Arona me itre nekö i angeic. Tro angatr a xeni lai ngöne la götrane gaa hmitrötr, ke ewekë ka nyipi hmitrötr kowe la atre huuj, hna xome qa ngöne la itre huuj ne eë koi Iehova. Celë hi wathebo ka cile hut.”
10 Nyipine la angetre Isaraela, hetre trahmany hna hnahon hnene la ketre föe ne Isaraela, me ketre trahmanyi ne Aigupito. Hnei angeic hna iwesitrë memine la ketre atre Isaraela ngöne la lapa. 11 Nge hnene la neköne la föe ne Isaraela, hna qaja angazon me ejine la Ëj.* Ame hna tro sai angeice koi Mose. Nge ame la thine i angeic ke atre Selomith, nekö i Diberi qa ngöne la tribu i Dana. 12 Nge hna pane amë aconyi angeic, treqene la hnei Iehova hna troa amekötine koi angeic.
13 Nge öni Iehova hmaca jë hi koi Mose: 14 “Tro sai angeice pi tröne la lapa, lo atre ejin la ëjeng, nge tro la itre ka drei angeic a atë la iwanakoime i angatr hune la he i angeic, nge tro la nöj asë a tranyi angeic hnei etë. 15 Nge tro eö a qaja kowe la angetre Isaraela ka hape: ‘Maine tro la ketre atr a ejine la Akötresi angeic, tro kö angeic a xeni pun la ngazo i angeic. 16 Haawe, ame la atre qaja angazone la ëje i Iehova, ke tro ha humuthi angeic. Nyipiewekë tro la nöj asë a tranyi angeic hnei etë. Ame la trenyiwa ka qaja angazone la Ëj, ke tro fe a hane humuthi angeic tune la sipu atre Isaraela.
17 “‘Maine tro la ketre atr a humuthe la ketre, ke tro fe a hane humuthi angeic. 18 Nge ame la atre lep amecine la öni ka mem, ke tro hë angeic a nyithupen: mel hnane la mel. 19 Nge maine tro la ketre atr a eatrëne la ketre, tro fe a hane kuca tune koi angeic. 20 Eatr hnane la eatr, nge alamek hnane la alamek, nge nyö hnane la nyö. Tro ha kuca koi angeic tune la hnei angeice hna kuca kowe la atr. 21 Nge ame la atre lep amecine la ketre öni, ke tro hë angeic a nyithupen ej. Ngo ame la atre lep amecine la ketre atr, ke tro ha humuthi angeic.
22 “‘Casi hi la wathebo kowe la trenyiwa memine la atre Isaraela, ke Iehova ni Akötresi epun.’”
23 Ame hnei Mose hna ithanata kowe la angetre Isaraela, matre hnei angatre pë hë hna tro fë tröne la lapa lo atre ieji, me tranyi angeic hnei etë. Ame hnene la angetre Isaraela hna kuca thenge lo hnei Iehova hna ahnith koi Mose.