Hnaaluene Tus i Samuela

12 Ame hnei Iehova hna upi Nathana koi Dravita. Nge Nathana a lö jë koi Dravita me hape: “Ame ngöne la ketre traon, ca atr ka trenamo, nge ca atr ka pë ewekë. 2 Ame lai trenamo, nyimutre la itre mamoe me kau i angeic. 3 Nge ame lai pë ewekë, casi hi la hnei angeic hna hetrenyi, a neköi mamoe föe. Hnei angeic hna itön, me thupën, nge hna ce hetrun ej me itre nekö i angeic ngöne la hnalapa i angeic. Ngacama tha tru kö hnei xen, ngo angeice pala hi a ithuan. Ej a iji ngöne la kape i angeic, nge ej a meköle hune la imano i angeic. Nge kösë nekö i angeice jajinyi lai neköi mamoe. 4 Ngo ngöne la ketre drai, traqa pi hi la trenyiwa kowe la hnalapa ne lai trenamo, matre angeic a hnëkë xeni jë kowe lai trenyiwa. Ngazo pe, tha xome kö angeic la ketre mamoe maine kau i angeic, ngo angeic a xome pi la neköi mamoe föe ne la atre ka pë ewekë, me atron kowe lai trenyiwa.”

5 Elëhni jë hi Dravita kowe lai trenamo, nge öni nyidrë koi Nathana: “Qëmeke i Iehova Akötresie ka mel, troa humuthe lai atre cili! 6 Tro la atre cili a a 4 lao të la thupen ne la neköi mamoe kowe lai atr ka pë ewekë, ke ka pë hni la atre cili.”

7 Öni Nathana jë hi koi Dravita: “Eö hi lai atre cili. Hane hi la hna qaja hnei Iehova, Akötresi Isaraela: ‘Eni la ka ië eö troa joxu ne Isaraela, me amele eö qaathei Saulo. 8 Hnenge hna hamëne xecie koi eö la nöjei ewekë i Saulo, itre föi angeic, me musi angeic hui Isaraela me Iudra. Nge e tha ijije kö, tro kö ni a nyixan. 9 Hnauëne la eö a methinëne la trengewekë i Iehova me kuca la ka ngazo koi ni? Hnei eö hna humuthi Uria atre Heth, me eköthe la aqane tro angetre Amona a humuthi angeic. Nge thupene lai, eö a xome jë la föi angeic nyine föi eö. 10 Qaane enehila, tha tro kö la taua a ananyine la fami eö, pine eö methinë ni me xome la föi Uria atre Heth nyine föi eö.’ 11 Nge öni Iehova hmaca jë: ‘Tro ni a axulune la itre hulö kowe la hnalapa i eö, nge qëmeke i eö, tro ni a thapa la itre föi eö me hamën kowe la ketre trahmany,* nge tro angeic a ce meköl me angatr qëmekene la nöjei atr. 12 Ame la hnei eö hna kuca juetrën, tro ni a kuca amaman qëmekei Isaraela asë.’”

13 Haawe, öni Dravita koi Nathana: “Ase hë ni ngazo koi Iehova.” Sa jë hi Nathana ka hape: “Tro Iehova a nue la ngazo i eö, tha tro kö eö a mec. 14 Ngo ame la nekö i eö hna hnyipi malan, tro nyën a mec, pine eö tha metrötrë Iehova.”

15 Thupene lai, Nathana a bëeke ju kowe la hnalapa i angeic.

Nge Iehova a lepe jë hnei meci lai nekönatr, lo hna hnahon hnene la föi Uria me Dravita. 16 Dravita a treije fë jë kowe la nyipi Akötresie troa amelene la nekönatr, nge tha xeni pi kö nyidrë. Nge ame la nyidrëti a bëeke kowe la hnalapa, hnei nyidrëti pala hi hna meköl e kuhu hnadro. 17 Nge hnene la itre qatr hnine la hnalapa i joxu hna tro troa wai nyidrë, me thele troa amejë nyidrë. Ngo xele kö nyidrë, nge goi xele fe nyidrë ma ce xeni me angatr. 18 Nge ngöne la hna 7 ne drai, meci pi hi lai nekönatr. Ngo tha hna thuemacanyi Dravita kö hnene la itre hlu, ke öni angatr: “Ame lo mele pala kö lo nekönatr, meci hë huni hna ithanata koi nyidrë, ngo xele kö nyidrë ma drei hun. Ngo maine tro sa qaja enehila ka hape, meci hë la nekönatr, ma tro hë nyidrëti lai a kuca la ketre ewekë ka ngazo.”

19 Nge ame hë la Dravita a öhne la itre hlu a kola iulili, trotrohnine ju hi nyidrë ka hape, meci hë la nekönatr. Nyidrëti a hnyingë angatre jë ka hape: “Meci hë la nekönatr?” Nge öni angatr: “Öö meci hë nyën.” 20 Ame hnei Dravita hna mejë jë, me si, me köle oel ka pui lolo, me saze iheetr. Nge nyidrë a tro ju kowe la uma maano i Iehova, me thil, me bëeke hmaca kowe la hnalapa.* Nge nyidrë a iupi jë troa traqa fë xen, nge nyidrëti a xeni ju. 21 Itre hlue i Dravita a qaja jë koi nyidrë ka hape: “Hnauëne la nyipëti a kuca tune la? Ame lo mele pala kö la nekönatr, nyipëti a tha xen me treije lapaa. Ngo ame ju hi la nyën a mec, mejë jë hi nyipë a xen.” 22 Öni Dravita koi angatr: “Ame lo mele pala kö la nekönatr, eni lo a tha xen, me treije lapaa, ke öning, ‘Ma tro jë Iehova a hnimi ni me amelene la nekönatr.’ 23 Ngo enehila, meci hë la neköng, matre nyine u la tro ni a tha xen? Thatreine kö ni amele nyëne hmaca, tro pe ni la a tro koi nyën ngöne la hua, ngo tha nyëne kö la ka troa bëeke koi ni.”

24 Thupene lai, hnei Dravita hna aupune la hni i Batheseba föi nyidrë. Nyidrëti a tro ju thene la föi nyidrë, nge nyidroti a ce meköle ju. Nge e thupen, Batheseba a hnahone pi la nekönatr trahmany, Solomona* la ëjen. Nge Iehova a hnimi Solomona. 25 Celë hi matre nyidrëti a upi Nathana perofeta troa sipon matre, ati ëjen la nekönatr, Iedidia,* ke Iehova a hnimi nyën.

26 Nge Ioaba pala hi a isi me Raba, traon i angetre Amona, nge angeic a thapa pi la traone i joxu.* 27 Ioaba a upe pi la itre ka tro fë maca koi Dravita, me hape: “Hnenge hna isi me Raba, nge ase hë ni thapa la traon ne la itre tim.* 28 Ngo enehila, pane acasine jë la trongene isi asë, nge jë fe troa lapa xötreithe la traon, me thapa, wanga tro ni a thapa lai traon, nge eni pë hë la hna troa atrun.”*

29 Dravita a hën asë jë la trongene isi, nge nyidrë a tro ju a tro Raba. Nyidrëti a isi jë memine la traon, me thapa. 30 Nge nyidrëti a xome pi la korona hna petrën hnei Malekam, nge ca talane* gool la ehacene lai korona, nge hna thaipin ej hnei itre etë ka tru thupen. Hna atë la korona cili hune la he i Dravita, nge nyidrëti a xome pi fe qa hnine la traon, la ketre trengamo ka tru. 31 Nge Dravita a xome pi la itre atrene la traon, me upi angatr troa huliwa. Qa i angatr troa gili etë, me huliwa me itre jia ne huliwa ka idrei hna kuca hnei fao, me itre ze fao, me xupi birik. Celë hi hna kuca hnei Dravita ngöne la nöjei traon i angetre Amona. Ame hnei Dravita memine la trongene isi asë, hna bëek hmaca a tro Ierusalema.