Genese

41 Lue macatre thupen, hnei Farao hna puji nyidrë ezine la hneopegejë Nil. 2 Hna elë qa ngöne la Nil la 7 lao kau föe ka kökötre lolo me giris. Nge angatr a nyiqaane xeni haö trootro jë ezine la hneopegejë. 3 Nge hnene la 7 lao kau föe, ka ngazo itrei nge ka wegeju, hna hane fe elë qa ngöne la Nil, thupene la itre kau ka giris. Nge hnene la itre ka wegeju hna ce cile me itre ka giris. 4 Matre hnene la itre kau ka ngazo itrei nge ka wegeju, hna nyiqaane öni la 7 lao kau ka kökötre lolo me giris. Nge hlë jë hi Farao.

5 Nyidrëti a meköle hmaca pi, me puj la kola ce cia la 7 lao ene qitr ka kökötre lolo, ngöne la ca ngöne qitr. 6 Nge hna cia fe la 7 lao qitr ka aenë me fitr, ke qaqacile hë hnene la enyi ne koië. 7 Nge hnene la 7 lao qitre ka aenë hna ulume la 7 lao qitre ka kökötre lolo. Nge hlë jë hi Farao a atre laka, nyidrëti a pu.

8 E hmakany, tha lapa hnyawa ha Farao. Matre nyidrëti a hën asë jë la itre atre huuj ka trene haze, me itre ka inamacan e Aigupito. Nyidrëti a qaja jë koi angatr la itre pu i nyidrë, ngo pëkö ka atreine qejepengön.

9 Matre hnene la tane la itre ka kepe trepe ime i Farao hna hape: “Menu hë ni ke ca ngazonge la. 10 Ngöne la ketre drai, hnei Farao hna wesitre kowe la itre hlue i nyidrë, nge hnei nyidrëti hna kuië ni hnine la kalabus ne la tane la itre sooc i joxu. Hna ce umë ni memine lo tane la itre ka sa falawa. 11 Thupene lai, hnei nyio hna isa pu ngöne la ca jidr, ngo ame la lue pu i nyio, isa pengöne kö la alien ej. 12 Ce nyio memine la ketre thupëtresij, atre Heberu. Angeice la hlue ne la tan la itre sooc i joxu. Nge ame la nyio a ase qaja koi angeic la lue pu i nyio, angeic a qejepengöne jë koi nyio. 13 Nge hna eatre hnyawa la hnei angeice hna qaja. Hna acili ni hmaca ngöne la hnëqang, nge hna athipe pë hë lo ketre trahmany.”

14 Ame hnei Farao hna iupe troa thei Iosefa. Nge hna canga xomi angeic qa kalabus, nge angeic a icinyi jë, me saze iheetr, me lö koi Farao. 15 Farao a qaja ju koi Iosefa ka hape: “Hnenge hna pu, ngo pëkö ka atreine qejepengön. Ngo drenge hë ni laka, e troa qaja la ketre pu, atreine hi eö troa qejepengön.” 16 Ngo sa jë hi Iosefa ka hape: “Tha eni kö, ngo tro kö Akötresie a qaja la maca ka loi koi Farao.”

17 Ame hnei Farao hna qaja koi Iosefa ka hape: “Eni a puj la eni a cil ezine la hneopegejë Nil. 18 Hnene la 7 lao kau föe ka kökötre lolo me giris, hna elë qa ngöne la Nil, me xeni haö trootro ezine la hneopegejë. 19 Nge hnene la 7 lao kau föe, hna hane fe elë thupene la itre ka giris. Itre kau ka kucakuca, nge ka ngazo itrei me wegeju. Pë fe kö itre kau ka ngazo itreine tun hnenge hna hane öhne e Aigupito. 20 Nge hnene la itre kau cili, ka ngazo itrein me wegeju, hna öni la 7 lao kau ka giris. 21 Ngo ame hë la angatr a ase öni, pëkö ka atreine qaja ka hape, hnei angatr hna öni lo itre xan, ke casi pala hi la aqane ngazo la itrei i angatr, me wegeju, ene pe hlë jë hi ni.

22 “Thupene lai, hnenge hna öhne ngöne la pung, la 7 lao ene qitr ka kökötre lolo ngöne la ca ngöne qitr. 23 Nge hna cia fe la 7 lao ene qitr ka qaqacil, me aenë me fitr, ke qaqacil la enyi ne koië. 24 Nge hnene la itre ene qitre ka aenë, hna ulume la 7 lao ene qitre ka kökötre lolo. Ase hë ni qaja lai kowe la itre atre huuj ka trene haze, ngo pëkö ka atreine qejepengöne koi ni.”

25 Matre öni Iosefa koi Farao: “Casi hi la aliene la lue pu i Farao, matre hnene la nyipi Akötresie hna thuemacanyi Farao la hnei nyidrëti hna troa kuca. 26 Ame la 7 lao kau föe ka lolo, ke 7 lao macatre. Nge ame la 7 lao ene qitr ka lolo, ke 7 fe lao macatre. Casi hi la aliene lai lue pu. 27 Ame la 7 lao kau föe, thupen lo ka ngazo itrein me wegeju, ke 7 lao macatre. Nge ame la 7 lao ene qitr ka aenë, nge ka qaqacil hnene la enyi ne koië, tre 7 lao macatre ne jiin. 28 Nge tune lo hnenge hna qaja koi Farao, kola amamane koi Farao hnene la nyipi Akötresie, la itre ewekë hnei nyidrëti hna troa kuca.

29 “Tro ha traqa la 7 lao macatre ne mana e Aigupito. 30 Thupene lai, troa xulu la 7 lao macatre ne jiin. Nge troa thëthëhmine la aqane mana e Aigupito. Nge tro ha kucakuca la nöj hnene la jiin. 31 Pine laka, tro ha catrehnine la jiin, tro ha thëthëhmine la aqane mana la xeni ngöne la nöj. 32 Hna alua pu hnei Farao, ke xecie hnyawa kowe la nyipi Akötresie troa eatrën asë lai. Nge easenyi hë matre eatrëne jë nyidrë.

33 “Enehila, epi tro Farao a thele la ketre atre ka hetre wangatrehmekun, nge ka inamacan, matre troa acilë angeic hune la nöje Aigupito. 34 Tro angeic a acile la itre tan ngöne la nöj, nge qa i angatr troa xome la sin* ne la itre xeni hna menuën e Aigupito, hmekune la 7 lao macatre ne mana la xen. 35 Tro angatr a ce amë la nöjei xeni hna troa menuëne ngöne la itre macatre ka lolo ka troa traqa. Nge tro angatr a hnëkë göhnene la itre wene feja, nge tro ha thupën hnei Farao. Nge troa amë hnyawane la itre wene feja cili ngöne la itre traon. 36 Nge tro la itre xeni cili, a nyi kemeje kowe la 7 lao macatre ne jiin e Aigupito. Qa ngöne lai, tha tro kö la nöjei atr me öni a meci hnene la jiin.”

37 Madrine hi Farao me itre hlue i nyidrë kowe la hna qaja. 38 Öni Farao jë hi kowe la itre hlue i nyidrë: “Hetre ketre atre kö ka tui angeice la, ka hetrenyi la ua i Akötresie?” 39 Thupene lai, öni nyidrëti koi Iosefa: “Pine laka, Akötresie la ka amamane lai koi eö, pëkö xa atre ka hetre wangatrehmekun, nge ka inamacane tui eö. 40 Eö hi la ka ijij troa thupën la hnalapang, nge tro asë hi la nöjeng a drengethenge eö. Ngo eni a draië hui eö, ke joxu ni.”* 41 Öni Farao hmaca: “Dreng! Eni a nue la nöje Aigupito asë koi eö.” 42 Thupene lai, Farao a hule pi la otrene wanakoime i nyidrë nyine pele hatren, me line kowe la hene* wanakoime i Iosefa, me heetrë angeic hnei nyipi iheetre lino, me afenane ngöne la nyinawa i Iosefa la finiceine gool. 43 Nge nyidrëti a aelë angeice jë hune la hnaaluene ikatre ka mingöming i nyidrë, nge kola suen qëmeke i Iosefa ka hape: “Avrek!”* Celë hi aqane kuca i Farao troa acili Iosefa hune la nöje Aigupito asë.

44 Öni Farao hmaca koi Iosefa: “Farao ni, ngo e tha hna pane sipo eö kö, pëkö ka atreine kuca la ketre ewekë* e Aigupito.” 45 Thupene lai, Farao a ati ëje i Iosefa, Zafenatha-paenea. Nge nyidrëti a hamë Asenatha jë, la nekö i Potifera atre huuj e Ona,* troa föi Iosefa. Nge angeic a nyiqaane musi ju e Aigupito. 46 Traqa koi 30 lao macatre i Iosefa, lo angeic a nyiqaane huliwa* koi Farao joxu ne Aigupito.

Thupene lai, Iosefa a tro ju qaathei Farao, me trongëne la nöje Aigupito asë. 47 Ngöne la 7 lao macatre ne mana la xen, kola hame menu la itre hlapa. 48 Matre angeic a xawane jë la xeni hna menuën e Aigupito, ngöne la 7 lao macatre, nge angeic a amë acone jë hnine la itre traon. Ngöne la nöjei traon, angeic a amë hnyawa la itre xeni hna traqa fë qa ngöne la itre hlapa ezin. 49 Angeice pala hi a amë acone la itre wene feja ka nyimutre, kösë wenengöni ne ngönegejë. Nge tha e hë angatre la etrune la xen, ke thatreine hë angatr.

50 Qëmekene la pane macatre ne jiin, hnei Asenatha nekö i Potifera atre huuj e Ona,* hna hnahone la lue nekö trahmany koi Iosefa. 51 Hnei Iosefa hna hëne la ka tru, Manase,* ke öni angeic: “Hnei Akötresie hna kuca matre thëthëhmine pi ni la itre akötreng, me fami i kaka.” 52 Nge angeic a hëne jë la hnaaluen, Eferaima,* ke öni angeic: “Hnei Akötresie hna hamë neköng ngöne la nöj hna akötrë ni.”

53 Thupene lai, fenesi pi hi la 7 lao macatre ne mana la xen e Aigupito. 54 Nge hna nyiqaane la 7 lao macatre ne jiin, tune lo hna qaja hnei Iosefa. Kola jiin ngöne la nöjei nöj, ngo tha e Aigupito fe kö, ke hetre xeni pala hi. 55 Ngo ame hë la kola lapan asë la nöje Aigupito hnei mecijiin, hnene la itre atr hna treije koi Farao troa hetre falawa. Ame hnei Farao hna qaja kowe la angetre Aigupito asë ka hape: “Tro jë koi Iosefa, nge kuca jë la hnei angeice hna troa qaja.” 56 Ase hë haöthe la fen asë hnene la jiin, matre Iosefa a fe pi la itre hnë ami xen, me salemëne la itre wene feja koi angetre Aigupito, ke catrehnine catre la jiin e Aigupito. 57 Nge kola tro Aigupito hnene la itre atr qa ngöne la nöjei nöj, troa itö wene feja thei Iosefa, ke catrehnine catre la jiin ngöne la fen asë.