Genese
48 Thupene lai, hna qaja koi Iosefa ka hape: “Kucakuca ha la keme i eö.” Ame hnei angeic hna ce tro memine la lue nekö i angeice trahmany, Manase me Eferaima. 2 Ame hë la kola thuemacanyi Iakobo laka, Iosefa nekö i nyidrë a traqa troa wai nyidrë, nyidrëti* a thele jëne troa lapa hune la göhnë i nyidrë. 3 Nge öni nyidrëti jë hi koi Iosefa:
“Hnene la Akötresie Ka Tru Trenge Men hna mama koi ni e Luza, ngöne la nöje Kanana, nge hnei nyidrëti hna amanathithi ni. 4 Öni nyidrëti koi ni, ‘Tro ni a hamë nyimu nekö i eö, nge troa ala nyimu la itre matra i eö, nge tro ni a kuca matre tro hë eö a itre nöje ka nyimutre. Tro ni a hamëne paluane la nöje celë kowe la itre matra i eö.’ 5 Nge ewekënge pë hë la lue nekö i eö, lo hnei eö hna hnahon e Aigupito, qëmekene tro ni a traqa koi eö. Tro Eferaima me Manase a lue neköng, ceitu me Reubena me Simeona. 6 Ngo ame la itre nekönatre hna hnahon e thupen, ke itre nekö i eö pë hë. Tro angatr a xome la ëjene la lue mama i angatr, nge tro angatr a kepe edrö qaathei nyidro. 7 Ame lo eni a bëeke qa Padanarama, hnei Rakela hna meci ezing e Kanana, ngo nanyi pala kö la gojenyi ne tro Eferata. Matre hnenge hna kelemi angeic ngöne la gojenyi ne tro Eferata, ene Bethelema.”
8 Thupene lai, Isaraela a goeëne ju la lue nekö i Iosefa me hape: “Drei la?” 9 Matre öni Iosefa kowe la keme i angeic: “Lue nekönge trahmany, lo hna hamë ni hnei Akötresie ngöne la nöje celë.” Matre öni nyidrë: “Pane alemi nyidroti jë koi ni, matre tro ni a amanathithi nyidro.” 10 Tha öhne hnyawa ha Isaraela koilo, ke qatre catre hë nyidrë, nge easenyi hë matre ti pi la luemeke i nyidrë. Matre Iosefa a easenyi nyidroti jë koi nyidrë. Ame hnei Isaraela hna dremi nyidro, me haluthi nyidro. 11 Öni nyidrë koi Iosefa: “Tha ase kö ni mekune troa öhne hmaca la qëmeke i eö, ngo hnei Akötresieti hna aijijë ni troa öhne la itre matra i eö.” 12 Ame hnei Iosefa hna ananyi nyidro qa ngöne la lue iwatingöneca ne la keme i angeic, nge angeic a thili ju e kuhu hnadro.
13 Nge Iosefa a ce e nyidroti jë, Eferaima ngöne la ime maca i angeic, matre tro nyën a cil ngöne la götrane mi i Isaraela, nge Manase ngöne la ime mi i angeic, matre tro nyën a cil ngöne la götrane maca i Isaraela. Nge angeic a easenyi nyidroti jë koi nyidrë. 14 Ngo Isaraela a saathe pi la ime maca i nyidrë hune la he i Eferaima, ngo ka co pe nyën. Nge nyidrëti a atë ju la ime mi i nyidrë hui Manase, ngacama atre hi nyidrë ka hape, Manase la ka tru, ngo hnei nyidrëti hi hna thë troa ati ime tune lai. 15 Nge nyidrëti a amanathithi Iosefa jë me hape:
“Hnene lo itre kemeng, Aberahama me Isaaka, hna xötrethengene la nyipi Akötresie,
Lo nyipi Akötresie, atre thupë ni ngöne la meleng, nge uti pala hi enehila,
16 lo angela ka thepe ni qa ngöne la itre akötr, epi tro nyidrëti a amanathithine la lue nekönatr.
Nge epi tro pala hi a mekune la ëjeng jëne nyidro, me ëjene la itre kemeng, Aberahama me Isaaka,
Nge epi troa ala nyimu catre la itre matra i nyidro e cailo fen.”
17 Ame hë la Iosefa a öhne laka, kolo pala hi a të la ime maca ne la keme i nyidrë hui Eferaima, tha madrine kö Iosefa. Matre angeic a ea jë la ime ne la keme i angeic qa hune la he i Eferaima, me atë hune la he i Manase. 18 Matre öni angeic kowe la keme i angeic ka hape: “Waea the tune kö lai kaka, ke angeice la, la ka tru. Atë jë la ime maca i nyipë hune la he i angeic.” 19 Ngo xele kö la keme i angeic, matre öni nyidrë: “Atre hi ni, atre hi ni neköng! Tro fe nyëne lai a ketre nöj, nge tro fe nyën a tru. Ngo tro la jini nyën a sisitria catre hmaca kö, nge tro la itre matra ne la jini nyën a ala nyimu catr, uti hë tro angatr a itre nöj.” 20 Ngöne la drai cili, nyidrëti a amanathithi nyidroti ju, me hape:
“Epi tro la angetre Isaraela a qeje eö e tro angatr a thingi manathith, tro angatr a hape,
‘Epi tro Akötresie a aceitunë eö me Eferaima me Manase.’”
Nyidrëti a pane qeje Eferaima, nge pi Manase pë hë.
21 Nge öni Isaraela jë hi koi Iosefa: “Easenyi hë matre meci pi ni, ngo tro kö Akötresie a ce me epun, me bëeke sai epun kowe la nöj ne la itre qaaqaa i epun. 22 Nge ame ni, tro ni a hamë eö la ketre hnepadro nyine nyixane la nöje i eö, hune la itre trejine me eö, kolo hnepadro hnenge hna thapa qaathene la angetre Amora, hnene la tauange me pehnang.”