Isaia
26 Ngöne la drai cili, tro ha nyimane la nyima ce ngöne la nöje Iudra:
“Ka catre la traone së.
Ceitu me ketre ihag me ketre tra etë la iamele* qaathei Nyidrë.*
2 Fe pi la itre qëhnelö i angeic,
Matre lö jë la nöj ka meköt, ene la nöj ka mele nyipici.
3 Tro nyipëti a thupëne la itre ka lapa qale koi nyipë hnene la hni ka pexej;*
Tro nyipëti a hamëne koi angatr la tingeting ka cile hut,
Ke nyipëti la hnei angatr hna mejiune kow.
4 Mejiune jë koi Iehova uti hë epine palua,
Ke Ia* Iehova la Giti ka epine palua.
5 Ke ase hë nyidrëti thaipiëne la itre ka lapa ngöne la itre gaa draië, ene la traon ka draië qa.
Nyidrëti a triji angeic,
Nyidrëti a kuië angeic e kuhu hnadro;
Nyidrëti a akeinyi angeic ngöne la xaxau.
6 Tro ha waja fici angeic,
Hnene la itre waca ne la itre ka akötr, memine la itre ka kucakuca.”
7 Ka meköt la jë ne la atr ka meköt.
Ke ka meköti nyipë,
Tro nyipëti a nyidrawane hnyawane la gojeny ne la atr ka meköt.
8 Iehova fe, eahuni a trongëne la jë ne la itre hna amekötin hnei nyipë,
Nge eahuni a mejiune koi nyipë.
Hane hi la aja ka catr ka eje the hun, ene la troa meku nyipë memine la ëje i nyipë.
9 Ame ngöne la jidr, tru catre la ajang troa thele nyipë hnene la hning ka pexej,
Eje hi, tru la ajang troa thele nyipëti pala hi;
Ke ame la nyipëti a amekötine la fen,
Itre atrene la nöj a inine la meköt.
10 Maine easë a hnim la atr ka ngazo,
Ngo tha tro jë kö angeic a inine la meköt.
Maine tro angeic a mel ngöne la nöj ka meköt, ngo tro pala hi angeic a qali thiina,
Nge tha tro kö angeic a öhne la lolo i Iehova.
11 Iehova fe, hnei nyipëti hna xejë la ime i nyipë, ngo tha öhne kö hnene la itre atr ka ngazo.
Tro hë angatr a hmahma, ngöne la angatr a öhne la trenge aja i nyipë kowe la nöje i nyipë.
Eje hi, tro la eë hna hnëkën thatraqane la itre ithupëjia me nyipë, a dreuthetriji angatr.
12 Iehova fe, tro nyipëti a hamë huni la tingeting,
Ke ame asë hi la itre ewekë hne huni hna kuca
Hnei nyipëti hna kuca thatraqai hun.
13 Iehova fe Akötresi hun, hna musinë hun hnene la itre xaa joxu,
Ngo ëje i nyipëti hmekuje hi la hne huni hna atrun.
14 Meci hë angatr, nge tha tro hmaca kö angatr a mel.
Pëhë trengecatre i angatr ngöne la mec, nge tha tro hmaca kö angatr a mejë.
Ke hnei nyipëti hna waipengö i angatr
Hnei nyipëti hna apatrenyi angatr, tha tro hmaca kö a meku angatr.
15 Iehova fe, hnei nyipëti hna atrune la nöj,
Hnei nyipëti hna atrune la nöj;
Hnei nyipëti hna atrunyi nyipë.
Hnei nyipëti hna ahuëne la itre ifego ne la nöj.
16 Iehova fe, hnei angatr hna thele nyipë ngöne la akötr;
Hnei angatr hna thithi thaup me thithi iel ngöne la nyipëti a haji angatr.
17 Tune la föe ka troa hnaho
Ka akötr me treij hnei akötr,
Celë hi la hnei nyipëti hna kuca koi hun, Iehova fe.
18 Hne huni hna upune, me drenge la akötrene la troa hnaho,
Ngo kösë hne huni hna hnahone la eny.
Tha hne huni kö hna traqa fë la iamele kowe la nöj,
Nge pëkö hna hnahon e celë fen matre lapane la nöj.
19 “Tro ha mele hmaca la itre wezipo i ö.
Tro ha mejë hmaca la itre ka mec.*
Hlë jë nge sue madrine jë,
Epun itretre lapa ngöne la xaxau!
Ke ceitu la wene lepanyi ö memine la xaxapo e hmahmakany,*
Nge tro la ihnadro a amelene hmaca* la itre ka pë trengecatr ngöne la mec.
Zae ju koi hnepe hawa hi
Uti hë la kola patre la elëhni.
21 Ke Iehova a tro qa ngöne la göhne i nyidrë
Matre hnyingën kowe la itre atrene la nöj la ngazo hna kuca,
Nge tro la nöj a amamane la madra hna anenin
Nge tha tro hmaca kö a juetrëne la itre hna humuth.”