Ezekiela
39 “Nge ame eö nekö i atr, perofetane jë la akötr ka troa traqa koi Gog, nge hape jë: ‘Hane hi la hna qaja hnei Iehova Joxu Ka Sisitria: “Tro hë ni a lepi ö Gog, joxu* ka tru ne Meseka me Tubala. 2 Tro ni a abëekë eö, me eatrongë eö, me traqa sai ö qa ngöne la itre nöje gaa nanyi ne kolopi, nge tro ni a elë sai ö hune la itre wetr ne Isaraela. 3 Tro ni a lepe la tane pehna i ö, matre tro ej a mala qa ngöne la ime mi i ö, nge tro ni a amalane la itre ane pehna qa ngöne la ime maca i ö. 4 Tro eö a kei hune la itre wetr e Isaraela, eö me itre soc i ö asë, memine la itre nöj ka troa ceme eö. Tro ni a nue eö matre ane la nöjei waco ka thele tha, me itre öni wael.”’
5 “‘Tro eö a mala ngöne la gaa papa ne la hlapa, ke ase hë ni qaja,’ öni Iehova Joxu Ka Sisitria.
6 “‘Tro ni a upe la eë koi Magog, me kowe la itre ka lapa tingeting ngöne la itre hnapet, nge tro hë angatr a atre laka, Iehova ni. 7 Tro ni a amamane la ëjeng ka hmitrötr nyipi Isaraela nöjeng, nge tha tro hmaca kö ni a nue troa adrone la ëjeng ka hmitrötr. Nge tro hë la itre nöj a atre laka, eni Iehova lo Atre Ka Hmitrötr e Isaraela.’
8 “‘Eje hi, tro kö lai a traqa nge tro kö lai a eatr,’ öni Iehova Joxu Ka Sisitria. ‘Kolo drai hnenge hna qaja. 9 Tro la itre atrene la itre traon e Isaraela a tro me athi eë memine la itre jia ne isi: ene la itre petre ka tru me ka co,* itre tane pehna me itre ane pehna, me itre hama,* me itre jo. Tro angatr a huliwan itre ej nyine athi eë ngöne la 7 lao macatre. 10 Tha tro hmaca kö angatr a nyi sinöe ngöne la itre hlapa, me hle sinöe ngöne la itre hnaxulu, ke tro hë angatr a xome la itre jia ne isi nyine athi eë.’
“‘Tro hë angatr a apë ewekën lo itre ka xome la itre ewekë i angatr, nge tro hë angatr atrekënöne la itre ka atrekënö,’ öni Iehova Joxu Ka Sisitria.
11 “‘Ngöne la drai cili, tro ni a hamëne la ketre hua koi Gog e Isaraela, ngöne la hnathup ne la itre ka ngenu ngöne la götrane koië ne la hnagejë. Nge tro la hnathupe cili a thingi gojenyi ne la itre ka cili thenge. E cili hi la hna troa kelemi Gog me itre atre i angeic asë, nge tro ha hëne la hnathupe cili ka hape, Hamona-Gog.* 12 Tro la nöje Isaraela a kelemi angatre koi 7 lao treu, matre ahmitrötrën la nöj. 13 Tro asë hi la itre atrene la nöj a ce huliwa matre kelemi angatr, nge jëne lai, tro ha atrunyi angatr ngöne la drai ne atrunyi ni,’ öni Iehova Joxu Ka Sisitria.
14 “‘Tro ha iëne la itre trahmany ka troa nyinyapën la nöj, me keleme la itre ngönetrei hna nue pe e cahu hnadro, matre troa ahmitrötrëne la nöj. Tha tro kö angatr a mano hna ithel ngöne la 7 lao treu. 15 E tro la itre hna upe troa nyinyapën la nöj a öhne la itre trapa jun, qa i angatr troa ami hatren. Nge tro pë hë la itre ka kele wezipo a kelem la itre trapa jun ngöne la hnathup ne Hamona-Gog. 16 Tro fe a amë e cili la ketre traon hna hape, Hamona.* Nge tro angatr a ahmitrötrëne la nöj.’
17 “Ngo ame kö eö nekö i atr, hane hi la hna qaja hnei Iehova Joxu Ka Sisitria: ‘Qaja ju kowe la nöjei pengöne waco me kowe la itre öni wael ka hape: “Icasikeu jë, nge jë fe! Icasikeu jë xötreithe la huuj hnenge hna hnëkëne koi epun, ketre huuj ka tru hune la itre wetr ne Isaraela. Tro epuni a öni ijön me iji madra. 18 Tro epuni a öni la ijön ne la itre atr ka catr, me iji la madra ne la itre tan ne la fen, ene lo itre mamoe trahmany, me itre neköi mamoe, me itre nani trahmany, me itre kau trahmany: lo nöjei öni ka giris ne Basana. 19 Tro epuni a nga hna öni giris, me iji madra uti hë la tro epuni a hnaitö, hnene la huuj hnenge hna hnëkën koi epun.”’
20 “‘Hune la laulaung, tro epuni a nga hna öni hos, me itre atr ka xomi ikariota, me itre atr ka catr, me nöjei pengöne soc,’ öni Iehova Joxu Ka Sisitria.
21 “‘Tro ni a amamane la elolong nyipine la itre nöj, nge tro asë hi angatr a öhn laka, ase hë ni eatrëne la hna amekötin koi angatr, nge hnenge hna huliwan la meneng* nyipi angatr. 22 Qaane ju hi la drai cili, tro ha xecie hnyawa kowe la nöje Isaraela ka hape, eni Iehova la Akötresi angatr. 23 Nge tro ha mama kowe la itre nöj laka, zöi Isaraela kö, la kola kötre sai angeic, ke tha hnei angeice kö hna mele nyipici koi ni. Celë hi kepin matre hnenge hna nuetriji angeic, me nue angeic kowe la itre ithupëjia me angeic, nge hna ce humuthi angatr asë hnei taua. 24 Hnenge hna kuca koi angatr thenge la aqane pui ngazo i angatr, me itre tria i angatr. Nge hnenge hna nuetriji angatr.’
25 “Matre hane hi la hna qaja hnei Iehova Joxu Ka Sisitria: ‘Tro ni a bëeke fë la itre matra i Iakobo hna akalabusin, me utipine la nöje Isaraela asë. Tru la trenge ajang* troa isigöline la ëjeng ka hmitrötr. 26 Thupene la hna pane thaipië angatr pine angatr tha mele nyipici koi ni, tro hë angatr a mele tingeting ngöne la nöje i angatr, nge pëkö ka troa axouenyi angatr. 27 Ame hë la eni a troa bëeke sai angatr qa ngöne la itre nöj, me acasi angatr qaathene la itre ithupëjia me angatr, tro hë ni a ahmitrötrë ni nyipi angatr, qëmekene la itre nöj ka nyimutre.
28 “‘E cili, tro hë angatr a atre laka, eni Iehova la Akötresi angatr, la eni a troa xomi angatr kowe la itre xaa nöj, me acasi angatre hmaca ngöne la nöje i angatr, nge tha tro kö a thëthëhmine la ketre. 29 Tha tro hmaca kö ni a nuetriji angatr, ke tro hë ni a nenge la uang hune la nöje Isaraela,’ öni Iehova Joxu Ka Sisitria.”