Daniela

12 “Ngöne la ijine cili, tro ha mejë hnei Mikaela,* lo joxu ka tru, ka cilëgöline la nöje i ö.* Tro la ijine cili, a ijine akötr hna tha hane kö melën hnene la ketre nöj qaan ekö. Nge ame ngöne la ijine cili, tro ha amelene la nöje i ö, lo itre ka hetre ëj e hnine la itus. 2 Nge ala nyimu thene la itre ka meköl ngöne la xaxau, ka troa mejë, itre xan kowe la mele ka pë pun, nge itre xan kowe hmahma me imethinë ka epine palua.

3 “Tro la itre ka atreine thelewekë a mel tune la ehudrumene la hnengödrai, nge tro la itre ka eatrongëne la ka ala nyimu kowe la meköt, a melemel tune la itre wëtresij uti hë epine palua.

4 “Ame kö eö Daniela, lapa fë hnyawa ju la itre trengewekë celë, nge pelehatrene ju la itus uti hë la ijine la pun. Ala nyimu la itre atr ka troa thel agön,* nge e cili, tro ha mana la nyipi atrehmekun.”

5 Thupene lai, hneng Daniela, hna öhne la lue xaa atr ka cil e cili, casi ngöne la ketre öline la hneopegejë, nge ketre ngöne la ketre ölin. 6 Nge hnene ka ketre e nyidro, hna qaja kowe la ka heetrë lino, lo ka cil hune la itre tim ne la hneopegejë ka hape: “Ije macatre ne tro pala kö a itreqe qëmekene troa traqa la pune la itre ewekë celë ka ketrepengön?” 7 Nge drenge ju hi ni la kola sa hnene lo atre ka heetrë lino, ka cil hune la itre tim ne la hneopegejë. Hnei angeic hna xejë draië la ime maca i angeic me ime mi, me sisiny jëne la Atre mel epine palua ka hape: “Tro pala kö a nue la ca ijin hna sa, me itre ijin hna sa, memine la sine la ca ijin.* E ase hnyawa ha apëne la trengecatrene la nöje ka hmitrötr, tro ha nyipune la itre ewekë cili.”

8 Nge ame pena ni, hnenge hna dreng ngo tha trotrohnine kö ni; matre hnenge hna hnyingëne ka hape: “Joxu fe, troa nyipune tune kaa la nöjei ewekë cili?”

9 Öni nyidrëti jë hi: “Tro jë hë Daniela, ke tro pala kö a juetrën me pelehatrene la itre trengewekë celë, uti hë la ijine la pun. 10 Ala nyimu la itre hna troa ahmitrötrën, me awiën, me tupath. Tro la itre atr ka ngazo a iakötrë, nge pëkö ala casi thei angatr ka troa trotrohnin; ngo tro hi a trotrohnin hnene la itre ka atreine thelewekë.

11 “Qaane ju hi la ijine kola apatrene la huuje hna tro fë lapan,* me acile la ewekë ka sis nge ka xulu fë la hnëjin, ke troa e la 1 290 lao drai.

12 “Madrine la atr ka itreqe* hnyawa uti hë la pune la 1 335 lao drai!

13 “Ngo ame kö eö, cile catre ju uti hë la pun. Tro eö a pane mano, nge ngöne la pune ne la itre drai, tro hë eö a mejë me kapa la edrö* i ö.”