Esodro
10 Ame hnei Iehova hna qaja koi Mose ka hape: “Lö jë koi Farao, ke ase hë ni nu troa axetine la hni angeic, me itre hlue i angeic, matre troa eatr qëmekei angeic la itre hatren qaatheng. 2 Nge matre tro eö a qaja kowe la itre nekö i eö, me itre api eö la aqane nyithupene ni kowe la angetre Aigupito, memine la itre hatren hnenge hna kuca nyipi angatr. Nge tro hë epuni a atre laka, Iehova ni.”
3 Mose me Arona a tro koi Farao me hape: “Hane hi la hna qaja hnei Iehova Akötresi angetre Heberu, ‘Tro eö a tha idrei uti hë eu? Nue pi la nöjeng, matre tro angatr a nyihlueng. 4 Maine tha nue kö eö la nöjeng, ame elany, tro ni a upe la itre sipa kowe la nöje i eö. 5 Tro itre ej a haöthe la ihnadro, uti hë la tha mama la ihnadro. Tro itre ej a xeni asë la hna nue pe hnene lo mani ka catr. Nge tro itre ej a xeni la nöjei sinöe i epun ka cia ngöne la itre hlapa. 6 Tro itre ej a nyialiene la itre uma i eö, me itre uma ne la nöjei hlue i eö, me itre uma ne la nöje Aigupito asë. Tha hna öhne kö la ewekë cili hnene la itre keme i epun, me itre qaaqaa i epun, qaane lo angatr a lapa ngöne la nöj.’” Ame hnei angeic hna thaujë, me tro qaathei Farao.
7 Matre önine la itre hlue i Farao koi nyidrë ka hape: “Uti hë eu tro la atre cili a akötrë* së? Nue angatre pi troa nyihlue i Iehova Akötresi angatr. Tha trotrohnine pala kö nyipë laka, ase hë lepe la nöje Aigupito?” 8 Ame hna abëekë Mose hmaca me Arona koi Farao. Nge öni nyidrë ka hape: “Tro jë hë epun troa nyihluei Iehova Akötresi epun. Ngo tro drei a tro?” 9 Sa jë hi Mose ka hape: “Tro huni a ce tro me itre nekö hun, me itre qatr, me itre nekö huni trahmanyi me jajiny, me itre mamoe trahmany hun, me kau trahmany,* matre tro huni a atrunyi Iehova.” 10 Matre öni nyidrëti jë hi: “E tro ni a nue epun, epun me itre nekö i epun, hatrene hi lai laka, ce Iehova me epun. Mama hi laka, hetre ewekë ka ngazo hnei epun hna pi kuca. 11 Waea! Tro hi la itre trahmany a tro troa nyihlue i Iehova. Ke kolo hi lo sipo i epuni lai.” Thupene lai, hna helë nyidro qaathei Farao.
12 Nge öni Iehova jë hi koi Mose ka hape: “Saathe pi la ime i eö hun e Aigupito, matre hëne la itre sipa kowe la nöj asë. Nge matre tro itre ej a xeni la itre feja hna nue pe hnene la wene mani ka catr.” 13 Mose a canga saathe pi la sine tö i angeic hun e Aigupito, nge Iehova a axulune jë la enyi qa koië kowe la nöj, ca drai nge ca jidr ka pexej ne hnahna la eny. Nge e hmakany, hnene la enyi qa koië hna traqa fë la itre sipa. 14 Hnene la itre sipa hna traqa ngöne la nöje Aigupito asë, nge itre ej a lapan asë la nöj. Jole catre pi hë, ke tha hna hane kö traqa la itre sipa ka nyimutre, nge tha tro hmaca kö a tun. 15 Nge hnen itre ej hna haöth asë la nöj, nge miti ju hi la nöj hnene la itre sipa. Itre ej a xeni asë jë la itre feja, me nöjei wene sinöe hna nue pe hnene lo wene mani ka catr. Nge pë hë dröne ngöne la itre sinöe, me iengen ngöne la nöjei hlapa ne Aigupito asë.
16 Ame hnei Farao hna canga iupe jë troa hë Mose me Arona. Nge öni nyidrë: “Hnenge hna ngazo koi Iehova Akötresi epon, me koi epon. 17 Matre enehila hi, epi nue la ngazong. Nge xëwe sai ni jë koi Iehova Akötresi epon, matre tro nyidrëti a ananyine qaathenge la akötr hna mecin celë.” 18 Nge hnei angeic* hna tro qaathei Farao, me xëwe koi Iehova. 19 Ame hnei Iehova hna kuca matre ujë jë la eny, nge hnahna pi hi la enyi qa kuë. Nge ej a ufe la itre sipa uti hë ngöne la Hnagejë Ka Palulu. Matre pë hmaca kö ca sipa ngöne la nöje Aigupito asë. 20 Ngo hnei Iehova kö hna nu troa axetine la hni Farao. Nge xele kö Farao ma nue la angetre Isaraela.
21 Nge öni Iehova hmaca koi Mose: “Xejë jë la ime i eö matre menihao pi e Aigupito, nge tro ej a menihao ka tru, nge ijije hi tro sa xolouth.” 22 Thupene lai, hnei Mose hna canga li ime draië, ame hna menihao asë pi e Aigupito koi köni drai. 23 Nge thatreine kö la angetre Aigupito goeëne la ketre me ketre, matre traqa koi köni drai ne tha enij angatr qa ngöne la itre hnalapa i angatr. Ngo lai pe kö la götrane hna lapan hnei angetre Isaraela. 24 Ame hnei Farao hna hë Mose me hape: “Tro jë troa nyihlue i Iehova, ngo tro pe kö a lapa la itre mamoe trahmany i epun, me itre kau trahmany i epun. Nge ame itre nekö i epun, ce tro jë me nyudren.” 25 Ngo öni Mose ka hape: “Nyipëti la ka troa hamëne* koi hun la itre öni nyine tro huni a huujën, me nyine huuj ne dreuth asë, matre tro huni a tro fë koi Iehova Akötresi hun. 26 Tro huni a ce tro memine la itre si hun, pëkö ca öni ka troa lapa, ke tro huni a xome la itre xan göi troa atrunyi Iehova Akötresi hun. Nge thatre kö huni la nyine tro huni a huujëne koi Iehova, e tha traqa pala kö huni e koilo.” 27 Ame hnei Iehova hna nu troa axetine la hni Farao, nge xele pala hi Farao troa nue angatr. 28 Öni Farao ka hape: “Tro pi qa la, nge the bëeke hmaca kö koi ni, ke e tro hmaca eö a thele troa cile qëmekeng, tro hë eö a mec.” 29 Nge hnei Mose hna sa ka hape: “Ka loi, tha tro hmaca kö ni a thele troa cil qëmeke i nyipë.”