Salamo
Nyima ne Elë.
132 Iehova fe, meku Dravita kö
Me itre akötre i angeic;
2 The thëthëhmine kö laka, hnei angeic hna sisinyi koi Iehova,
Nge hnei angeic hna nyi xepu* kowe la Ka Tru Trenge Men i Iakobo:
3 “Waea, tha tro kö ni a lö hnine la itateng, ene la umang.
Waea, tha tro kö ni a saaju ngöne la göhneng, ene la hnë meköleng;
4 Waea, tha tro kö ni a nue la luemekeng troa meek,
Me luemekeng* troa pi meköl
5 Uti hë la tro ni a öhne la ketre göhnë koi Iehova,
Ketre uma* ka mingöming kowe la ka Tru Trenge Men i Iakobo.”
6 Goeën! Hne huni hna drenge la kola ithanatane lai* e Eferatha;
Hne huni hna öhne lai ngöne la itre hlapa ne la hnaxulu.
7 Lö jë së ngöne la uma* i nyidrë;
Sa iwatingöneca ju së qëmekene la tan ne la lue ca i nyidrë.
8 Iehova fe, mejë jë troa wange la göhnë ne mano i nyipë,
Nyipë memine la Pua ne la trengecatre i nyipë.
9 Loi e tro la itre atre huuje i nyipëti a heetrëne la meköt,
Nge tro la itre ka mele nyipici koi nyipë a sue madrin.
10 Pi Dravita hlue i nyipë,
The nue kö* la hnei nyipëti hna iën.
11 Hnei Iehova hna sisinyi koi Dravita;
Tha tro kö nyidrëti a saze la hnei nyidrëti hna qaja ha:
“Ketre matra* i ö hi,
La hnenge hna troa acil hune la therone i ö.
12 Maine tro la itre nekö i ö a metrötrëne la isisinyikeung
Memine la itre hna amexej hnenge hna ini angatr,
Tro fe la itre nekö i angatr a lapane la therone i eö
Uti hë epine palua.”
13 Ke eje hi, hnei Iehova hna ië Ziona;
Aja i nyidrë troa lapane la götrane cili:
14 “Hnë manonge hi lai uti hë epine palua;
Tro ni a lapane la götrane cili, ke ajange hi lai.
15 Tro ni a hamën atrun la itre xen koi angatr;
Tro ni a amejin la itre ka pë ewekë hnei falawa.
16 Tro ni a heetrëne la itretre huuj hnei iamele,*
Nge tro la itre ka mele nyipici a sue madrin.
17 E cili, tro hë ni a akökötrene la trengecatre* i Dravita.
Hnenge hna hnëkëne la lamepa kowe la hnenge hna iën.
18 Tro ni a heetrëne la itre ithupëjia me angeic hnei hmahma,
Ngo ame la korona hnei angeic hna petrën, ke tro ej a melemel.”