Nehemia

13 Ngöne la ijine cili, hna e la tusi Mose kowe la nöj, nge öhne ju hi angatr laka, tha tro kö a hane lö hnine la icasikeu* i Akötresie, hnene la angetre Amona me Moaba. 2 Ke eje hi, tha hnei angetre Amona me Moaba hna tro fë ekö la falawa me tim koi Isaraela, nge hnei angatre fe hna nyithupei Balaama matre troa eji Isaraela. Ngo hnene la Akötresi së hna saze la ieji cili koi manathith. 3 Matre ame hë la itre atrene la nöj a drenge la Wathebo, hnei angatr hna iananyi memine la nöjei trenyiwa.

4 Ngo qëmekene lai, Eliasiba lo atre huuj, la atrekë hnëqane troa thupëne la itre hnë ami xen* hnine la uma ne hmi ne la Akötresi së. Angeice la ketre atrene la fami i Tobia. 5 Hnei angeice hna nue koi Tobia la ketre hnahage ka tru ne ami mo, lo hnë ami huuj ne wene feja, me libanu,* me itre ewekë hna huliwan hnine la uma ne hmi, memine la sin* ne la itre wene feja, me waina ka hnyipixe, me oel, lo hna nue koi angetre Levi, me itre ka nyima, me itre ka thupë qëhnelö, memine la ahnahna kowe la itre atre huuj.

6 Patre kö ni ngöne la ijine cili e Ierusalema, ke hnenge hna tro koi Aretaseta joxu ne Babulona, hmekune la kola 32 lao macatre ne mus i nyidrë. Itre hnepe ijin thupen, hnenge hna sipo nyidrë troa pane bëek. 7 Nge ame la eni a traqa e Ierusalema, hnenge hna öhne laka, hnei Eliasiba hna kuca la ketre ewekë ka ngazo, ke hnei angeic hna nue koi Tobia la ketre hnahag ne ami mo, hmekune la götrane gaa pë ihakun ne la uma ne hmi ne la nyipi Akötresie. 8 Tru catre la elëhning, matre hnenge hna trij asë la itre ewekë i Tobia, tröne la hnahag ne ami mo. 9 Thupene lai, hnenge hna amekötin troa ahmitrötrëne la itre hnahag ne ami mo. Nge hnenge hna alöne hmaca la itre ewekë ne la uma ne hmi ne la nyipi Akötresie, me itre huuj ne wene feja, me libanu.

10 Nge drenge hë ni laka, tha hnei angetre Levi kö hna kapa lo edrö hna amekötin thatraqai angatr. Celë hi kepin matre hnene la angetre Levi ka trene hnëqa, me itre ka nyima, hna tro troa eëny ngöne la isa zi angatr. 11 Eni a wesitrëne jë la itre ka isenyin, me hape: “Hnauëne laka, hna nuetrije la uma ne la nyipi Akötresie?” Thupene lai, hnenge hna hëne lo itre ka tro, me upi angatr troa cilëne hmaca la hnëqa i angatr. 12 Matre hnene la angetre Iudra asë, hna traqa troa amë la sin* ne la itre wene feja, me waina ka hnyipixe, me oel, hnine la itre hnahag ne ami mo. 13 Thupene lai, hnenge hna acili Selemia atre huuj, me Zadoka atre feja itus, me Pedaia atre Levi, troa thupëne la itre hnahag ne ami mo. Nge kola xatua angatr hnei Hanan nekö i Zakuri, nekö i Matania. Eje hi, itre trahmanyi lai hna mejiune kow, nge angatre hi la hna upe troa thewe ewekë kowe la itre trejin me angatr.

14 “Haawe, Akötresieti fe, the thëthëhmi ni kö göne la ewekë celë, nge the thëthëhmine kö la ihnimi nyipicing kowe la uma i nyipë, me itre huliwa hna kuca* hnine la uma!”

15 Ngöne la ijine cili, hnenge hna öhn e Iudra la itre atr ka weje wene vin,* hnine la hnë weje wene vin ngöne la drai Sabath. Nge itre xan fe a xawane la itre wene feja, me atë hune la itre boliko, me lö fë waina e Ierusalema, me itre wene vin, me itre wene iwacua, me nöjei pengöne ewekë la drai Sabath. Matre hnenge hna wathebo angatr troa salemë xeni la drai cili.* 16 Nge hnene la angetre Turo ka lapa ngöne la traon, hna traqa fë ie me nöjei pengöne ewekë, nge angatr a salemën koi angetre Iudra e Ierusalema ngöne la drai Sabath. 17 Matre hnenge hna wesitrëne la itre tan ne Iudra, nge öning: “A tha öhne fe kö epun laka, ewekë ka ngazo catre la hnei epuni hna kuca? Tha metrötrëne hë epuni la drai Sabath! 18 Hapeu, tha aqane ujë ne la itre qaaqaa i epun, matre hnene la Akötresi së hna axulune la akötr koi së, me kowe la traone celë? Ngo pine epuni tha metrötrëne la Sabath, tro ha tru catr la trenge elëhni i Akötresie koi Isaraela.”

19 Celë hi kepin matre, ame hë la kola nyiqaane lö la jö e Ierusalema, qëmekene troa nyiqaane la Sabath, hnenge hna iupe troa thinge la itre qëhnelö, nge tha tro hmaca kö a fe qëmekene troa ase la drai Sabath. Nge hnenge hna acile la itre xa sine ce huliwang kowe la itre qëhnelö ne la traon, matre tha tro kö la ketre atr a alöne la ketre ewekë ngöne la drai Sabath. 20 Matre hnene la itre ka salem, me itre ka salemëne la nöjei pengöne ewekë, hna meköl tröne Ierusalema koi cas maine lue jidr. 21 Nge hnenge hna hmekë angatr me hape: “Epuni a meköle fë nemen qëmekene la ihag? E tro hmaca kö epuni a kuca tun, tro hë ni a kuca la ketre ewekë koi epun.” Qane ju hi lai, tha bëeke hmaca kö angatr la drai Sabath.

22 Thupene lai, hnenge hna sipon kowe la angetre Levi troa ahmitrötrë angatre pala hi, me thupëne la itre qëhnelö, matre tro pala hi a hmitrötr la drai Sabath. “Haawe Akötresinge fe, the thëthëhmine kö la hnenge hna kuca, nge utipi ni jë thenge la etrune la ihnimi gufa i nyipë!”

23 Nge ngöne la ijine cili, hnenge fe hna öhne la itre xa atre Iudra ka xomi föe* qaathene la angetre Asedoda, me Amona, me Moaba. 24 Ame la ketre sine la itre nekö i angatr, angatr a qene Asedoda, nge ame la munën, angatr a ithanatane la itre qene hlapa ne la itre xa nöj. Ngo pëkö ala casi thei angatr ka atreine ithanatane la qene hlapa i angetre Iudra. 25 Matre hnenge hna wesitrë angatr, me eji angatr, me xe la itre xan, me hule la ipene he i angatr. Nge hnenge hna upi angatr troa sisinyi koi Akötresie ka hape: “Hmitrötr tro epuni a hamëne la itre nekö i epuni jajiny, kowe la itre nekö i angatre trahmany. Nge tha tro kö epuni a xome la itre nekö i angatre jajiny, kowe la itre nekö i epuni trahmany, me koi epuni fe. 26 Hapeu, tha hnene kö la itre föe trenyiwa matre kei pi Solomona joxu ne Isaraela? Pëkö ca joxu ka tui nyidrë e celë fen, nge hna hnimi nyidrë hnene la Akötresi nyidrë, matre hnei Akötresie hna acili nyidrë troa joxu hui Isaraela asë. Ngo hna akeinyi nyidrëti fe hnene la itre föe trenyiwa. 27 Haawe, tha hmahma kö epuni troa xomi föe trenyiwa me tha mele nyipici kowe la Akötresi epun!

28 Nge ame la ketre nekö i Iehoiada, nekö i Eliasiba atre huuj ka sisitria, angeice la tresi i Sanebalata qa Horono. Matre hnenge hna helë angeic qaatheng.

29 “Haawe Akötresinge fe, mekune kö la hnei angatre hna kuca, ke hnei angatre hna adrone la hnëqa ne la itre atre huuj, memine lo isisinyikeu ne la itre atre huuj, me angetre Levi!”

30 Ame hnenge hna ahmitrötrë angatr qa ngöne la itre ewekë ka sis ne la itre nöje trenyiwa. Nge hnenge hna acili hnëqa kowe la itre atre huuj, me angetre Levi, matre tro angatr a isa kuci hnëqan. 31 Nge hnenge hna ameköti ewekë, göne la itre sinöe nyine traqa fë ngöne la ijine hna sa, me kowe la itre pane wen hna menuën.

“Haawe, the thëthëhmi ni kö Akötresinge fe, nge amanathithi* ni ju!”