Salamo
43 Akötresinge fe, ameköti ni jë,
Isigöli ni jë pine la nöje celë ka tha mele nyipici.
Amele ni jë qaathene la atr ka iaö me ka tha meköti kö.
2 Ke nyipëti la Akötresing me hnapong.
Hnauëne laka, hnei nyipëti hna nuetriji ni?
Hnauëne laka, tro ni a treije trootro pine la ithupëjia ka akötrë ni?
3 Pane upe pi la lai me nyipici i nyipë.
Epi tro itre ej a thinane la gojenying;
Epi tro itre ej a tro sai ni kowe la wetre ka hmitrötr i nyipë, me kowe la uma maano ka sisitria i nyipë.
4 Tro hë ni a tro kowe la ita ne huuje i Akötresie,
Ene la Akötresie ne la nyipi madrineng.
Akötresieti fe, nge Akötresing, tro ni a atrunyi nyipëti hnene la arp.
5 Hnauëne laka, eni a kucakuca?
Hnauëne laka, eni a seseu?
Tro ni a treqe Akötresie,
Nge tro hmaca kö ni a atrunyi nyidrë, ke nyidrëti la Atre Iamele Ka Sisitria ne la meleng me Akötresing.