Pane Tusi Itre Joxu
17 Ngöne la ketre drai, hnei Elia,* atre Tisebi ka lapa e Gileada hna qaja koi Ahaba ka hape: “Maine nyipici laka, ka mele Iehova Akötresi Isaraela, lo hnenge hna nyihluen,* haawe tha tro kö a uti la wene lepany me mani koi nyimu macatre, e tha pane amekötine kö ni!”
2 Öni Iehova jë hi koi Elia ka hape: 3 “Mejë jë qa la, nge tro jë koië, pane zae ju ngöne la Hnathup* ne Kerith, hmekune la Ioridrano götrane koië. 4 Tro eö a iji la timi ne la hneopegejë, nge tro na upe la itre halo troa traqa fë a i ö.” 5 Elia a canga tro ju, me kuca la hnei Iehova hna qaja. Angeic a tro ju troa lapa ngöne la Hnathup e Kerith, hmekune la Ioridrano götrane koië. 6 E nöjei hmakanyi me hej, itre halo a traqa fë falawa me mitr koi Elia, nge angeic a iji la timi ne la hneopegejë. 7 Ngo thupene la itre hnepe ijin, qaqacile pi hi la hneopegejë, ke tha mani hë ngöne la nöj.
8 Ame hnei Iehova hna qaja koi Elia ka hape: 9 “Tro jë Sarepeta e Sidona, nge tro eö a pane lapa e cili. Tro ni a upe la ketre sine föe ne la traon troa ithua i ö.” 10 Haawe, angeic a mejë jë a tro Sarepeta. Nge traqa ju hi angeic ngöne la hnë lö a öhne la ketre föe, ketre sine föe kola nyi sinöe. Matre angeic a hë eahlo jë me hape: “Pane thue imenge tim.” 11 Eahlo pala kö a tro troa xomi tim, nge Elia a hë eahlo hmaca jë me hape: “Pane traqa fë sine falawa ju fe.” 12 Ngo öni eahlo ka hape: “Qëmeke i Iehova Akötresi nyipë ka mel, pëkö falawang, ngo ca neköi hnatrapaimë farine hi ngöne la trengene ka tru, me ca wamine oel ngöne la neköi trengen. Eni hi a nango hle sinöe, matre bëeke jë ni koi hnalapa me hnëkë xeni koi ni me neköng, nge xeni tixenuë i nyio pe hi la, nge tro hë nyio a mec.”
13 Nge öni Elia jë hi: “The xou kö, bëeke jë kowe la hnalapa i nyipo, nge kuca jë la hnei nyipoti hna qaja. Ngo pane sane pi la ca falawa ka raone koi ni memine la hnei nyipoti hna hetreny, nge traqa fë pi koi ni. Nge ase jë hi, tro nyipoti a hnëkë xeni koi nyipo me nekö i nyipo. 14 Ke hane hi la hna qaja hnei Iehova Akötresi Isaraela, ‘Tha tro kö a ae la trengene farin ka tru, nge tha tro kö a ae la neköi trengene oel, uti hë la drai ne tro ni Iehova, a axulune la mani kowe la nöj.’” 15 Ame hnene lai föe hna bëeke kowe la hnalapa i eahlo, me kuca la hna qaja hnei Elia. Matre hnei eahlo, me fami eahlo, me Elia, hna hetre xeni koi nyimu drai. 16 Nge tune lo hnei Iehova hna qaja jëne Elia, tha ae kö la trengene farin ka tru, memine la neköi trengene oel.
17 Thupene lai, hna wezipo la neköne* la föe, lo atrekë hnalapan. Wezipo catre nyën, matre meci* ju hi nyën. 18 Öni eahlo jë hi koi Elia: “Nemene la ngazong* koi nyipë, hlue ne la nyipi Akötresie? Nyipëti a traqa troa amekunëne la ngazong me humuthe la neköng?” 19 Ngo sa jë hi Elia ka hape: “Awe jë la nekö i nyipo.” Matre angeic a xome pi la nekönatr qa ngöne la lue ime i eahlo, me elë sai nyën kowe la hnahag hune la uma, lo hnë meköle i angeic, nge angeic a ami nyëne ju hune ili. 20 Thupene lai, Elia a thithi jë koi Iehova me hape: “Iehova Akötresinge fe, nyipëti fe axulune la akötr kowe la sine föe celë ka kepe ni, me humuthe la nekö i eahlo?” 21 Matre Elia a akönia thili* ju kowe la nekönatr, me thithi fë koi Iehova ka hape: “Iehova Akötresinge fe, epi tro la mele ne la nekönatre a bëeke koi nyën.” 22 Iehova a kapa ju la sipo i Elia, nge bëeke hmaca jë hi la mele ne la nekönatr, matre mele hmaca pi hi nyën. 23 Ame hnei Elia hna xepe la nekönatr, me autinyi nyëne qa ngöne la hnahag, me hamëne koi thin, me hape: “Goeën, mele hmaca ha la nekö i nyipo.” 24 Matre önine jë hi lai föe ka hape: “Enehila, xeci hnyawa ha koi ni laka, atre i Akötresie nyipë, nge ka nyipici la itre trengewekë hnei nyipëti hna qaja ngöne la ëje i Iehova.”