Iosua

5 Hnene asë hi la itre joxu ne Amora ka lapa ngöne la götrane kuë ne Ioridrano,* me itre joxu ne Kanana ka lapa ezine la hnagejë, hna dreng ka hape, hnei Iehova hna aqaqacilëne la tim ne Ioridrano qëmekene la angetre Isaraela, uti hë la angatr a sasaith ej. Matre hnei angatr hna xou me pë trengecatr* pine la angetre Isaraela.

2 Ngöne la ijine cili, öni Iehova koi Iosua ka hape: “Kuca jë la itre hele hnei etë ka ixöj, nge xötrehatrene hmaca jë la itre trahmanyi ne Isaraela.” 3 Ame hnei Iosua hna kuca la itre hele hnei etë ka ixöj, me xötrehatrene* la itre trahmanyi ne Isaraela e Gibea-Aralota.* 4 Hane hi la kepin matre Iosua a xötrehatrenyi angatr: ame asë hi la itre trahmanyi ka tro qa Aigupito, ene la itre trahmanyi ka qa hna isi,* ke meci asë hë angatr ngöne la hnapapa, lo angatr a tro qa Aigupito. 5 Ame asë hi la itre trahmanyi ka tro qa Aigupito, ke hna xötrehatrenyi angatr, ngo ame pë hë la itre hna hnahon ngöne la hnapapa thupene lo angatr a tro qa Aigupito, ke tha hna xötrehatrenyi angatre kö. 6 Hnene la angetre Isaraela hna tro ngöne la hnapapa koi 40 lao macatre, uti hë la kola patr asë la itre atren la nöj, ene la itre trahmanyi ka qa hna isi, lo itre ka tro qa Aigupito me ka tha drengethenge Iehova. Hnei Iehova hna sisinyi koi angatr laka, tha tro kö nyidrëti a amamane la nöj, lo hnei Iehova hna sisinyi kowe la itre qaaqaa i angatr troa hamë së, ene la nöj gaa neni gala hnei melek me miel. 7 Matre hna nyihnai angatr hnene la itre nekö i angatr. Angatre hi la itre hnei Iosua hna xötrehatren;* tha hna xötrehatrenyi angatre kö ngöne la hnapapa.

8 Ame hë la kola ase xötrehatren* la itre trahmanyi ne Isaraela, hnei angatr hna pane lapa ngöne la lapa, uti hë la kola meu la hna xötrehatrenyi angatr.

9 Matre öni Iehova jë hi koi Iosua: “Ngöne la drai celë, hnenge hna apatrene la nyine hmahman hna kuca hnene la angetre Aigupito.” Nge qaane ju hi lai, hna ati ëjene la götrane cili, Gilegala.*

10 Hnene pala hi la angetre Isaraela hna lapa e Gilegala; hnei angatr hna atrune la Paseka,* lo heji ne la drai 14 ne la treu, ngöne la itre hnapapa e Ieriko. 11 Nge ngöne ju kö la drai thupene la Paseka, hnei angatr hna xen la itre xeni ne la nöj: ene la itre falawa hna tha levenëne kö, me itre wene feja hna dreuth. 12 Ame hë la ijin angatr a nyiqaane xen la itre xeni ne la nöj, ke pë ju hi mana; pëhë mana kowe la angetre Isaraela. Ngöne la macatre cili, hnei angatre hna nyiqaane xen la itre xeni ne la nöje Kanana.

13 Ame lo Iosua a nyiqaane traqa e Ieriko, hnei angeic hna öhn la ketre trahmanyi ka cile fë taua qëmekei angeic. Ame hnei Iosua hna tro koi nyidrë, me hnying ka hape: “Nyipëti kö a ce xöle me eahun, maine nyipëti a ce xöle memine la itre ithupëjia me hun?” 14 Ame hnei nyidrëti hna sa ka hape: “Eni a traqa, ke tane isi Iehova ni.” Ame hnei Iosua hna thil me sa iwatingöneca, me hape: “Joxu fe, nemene la hnei nyipëti hna pi qaja koi ni?” 15 Önine jë hi la tane isi i Iehova koi Iosua: “Una pi la lue ibutre i ö, ke ka hmitrötr la götrane hnei ö hna cile ngön.” Ame hnei Iosua hna canga uni ibutr.